പൂട്ടിട്ട് കസ്റ്റംസ്... കോടതിയില്ലാത്ത സമയത്ത് അറസ്റ്റ് ചെയ്യാന് വന്ന കസ്റ്റംസിനെ വട്ടം ചുറ്റിച്ച് എം ശിവശങ്കര്; കൊച്ചിയിലേക്കുള്ള കസ്റ്റഡി യാത്ര വഴി തെറ്റിച്ച് ഭാര്യയുടെ ആശുപത്രിയിലെ ഐസിയു യാത്രയാക്കി; ഹൃദയത്തിന് പ്രശ്നമില്ലെന്ന് കണ്ടപ്പോള് നടുവേദനയായി; പാവങ്ങള്ക്ക് ഐസിയു കിട്ടാക്കനിയാകുമ്പോള് നടുവേദനയ്ക്ക് ഐസിയുവോ എന്ന ചോദ്യം ശക്തമാകുന്നു
കോടതിയില്ലാത്ത സമയം നോക്കി സര്ക്കാര് മുന് പ്രിന്സിപ്പല് സെക്രട്ടറി എം ശിവശങ്കറിനെ കസ്റ്റംസ് പൊക്കിയത് രണ്ട് ദിവസം കസ്റ്റഡിയില് ചോദ്യം ചെയ്യാം എന്ന് കരുതിയാണ്. തിരുവനന്തപുരം കസ്റ്റംസ് ഓഫീസില് നിന്നും കൊച്ചി ഓഫീസില് കൊണ്ടുപോയി അറസ്റ്റ് രേഖപ്പെടുത്താനാണ് ഇരുന്നത്. എന്നാല് ശിവശങ്കറിന്റെ പെട്ടന്നുണ്ടായ ദേഹാസ്വാസ്ഥ്യമാണ് കൊച്ചി യാത്ര തിരുവനന്തപുരം പിആര്എസ് ആശുപത്രി യാത്രയാക്കിയത്. ഭാര്യയുടെ ആശുപത്രിയില് തന്നെ പോകണമെന്ന് ശിവശങ്കര് പറഞ്ഞപ്പോള് കസ്റ്റംസ് അതില് ഒന്നും കണ്ടില്ല. എന്നാല് ആശുപത്രിയിലെത്തിയതോടെ ശിവശങ്കറിനെ ആശുപത്രി ഏറ്റെടുത്ത് ഐസിയുവിലാക്കി. എന്നാല് കസ്റ്റംസും ഐബിയും കര്ശന നിലപാടുമായി ആശുപത്രിയില് തങ്ങിയതോടെ ആശുപത്രിക്കാരും പെട്ടു. ആശുപത്രി തരികിട കാട്ടിയാല് പൊക്കാനുള്ള വല കസ്റ്റംസ് വിരിച്ചു. അതോടെ വേഗത്തില് ആന്ജിയോഗ്രാം നടത്തി. എന്നാല് ഹൃദയത്തിന് കുഴപ്പമില്ലെന്ന് കണ്ടതോടെ നടുവേദനയായി. നടുവേദനയ്ക്ക് ഐസിയുവോ എന്ന ചോദ്യം വന്നതോടെ കസ്റ്റംസ് ഇടപെട്ടു.
ഉടന് തന്നെ തിരുവനന്തപുരം മെഡിക്കല് കോളേജിലേക്ക് മാറ്റി. അവിടേയും ശിവശങ്കര് സാറിന് ഐസിയു തന്നെ നല്കി. എല്ല് രോഗ വിഭാഗം ഐസിയുവായ ഓര്ത്തോ ഐസിയുവില്. പഴയ ശ്രീറാം വെങ്കിട്ടരാമന് ഐഎഎസിന് മറവി രോഗം റിപ്പോര്ട്ട് ചെയ്ത അതേ മെഡിക്കല് കോളേജില് മറ്റൊരു ഉന്നത ഐഎഎസ് ഉദ്യോഗസ്ഥന് എത്തിയപ്പോള് വീണ്ടും അത് ചാനല് ചര്ച്ചയായി. ബിജെപി അതേറ്റെടുക്കുകയും ചെയ്തു. അതേസമയം എല്ലാം വീക്ഷിച്ച് വരികയാണ് കസ്റ്റംസ്. വേണ്ടി വന്നാല് ഇടപെടും.
കസ്റ്റംസ് കസ്റ്റഡിയിലെടുത്ത് ചോദ്യം ചെയ്യാന് കൊണ്ടുപോകവേ ദേഹാസ്വാസ്ഥ്യം അനുഭവപ്പെട്ട് പി.ആര്.എസ് ആശുപത്രിയില് പ്രവേശിപ്പിച്ച ശിവശങ്കറിന് ഹൃദയസംബന്ധമായ തകരാറില്ലെന്ന് ആന്ജിയോഗ്രാം പരിശോധനയിലാണ് കണ്ടെത്തി. നട്ടെല്ലിലെ വേദനയ്ക്ക് നടത്തിയ പരിശോധനയില് ഡിസ്കിന് തകരാര് കണ്ടു. തുടര്ന്ന് ഇന്നലെ ഉച്ചയ്ക്ക് രണ്ടിന് തിരുവനന്തപുരം മെഡിക്കല് കോളേജാശുപത്രിയിലേക്ക് മാറ്റിയാണ് ഓര്ത്തോ ഐ.സി.യുവില് പ്രവേശിപ്പിച്ചു.സ്വര്ണക്കടത്ത് പ്രതി സ്വപ്നയ്ക്ക് 1.90 ലക്ഷം ഡോളര് (1.40 കോടി രൂപ) വിദേശത്തേക്ക് കടത്താന് ഒത്താശ ചെയ്തെന്ന പുതിയ കേസില് ശിവശങ്കറിനെ വെള്ളിയാഴ്ച വൈകിട്ട് വീട്ടില് നിന്ന് കസ്റ്റഡിയിലെടുത്ത് കൊണ്ടുപോകവേ ആണ് ആശുപത്രിയിലാക്കിയത്.
മെഡിക്കല് കോളേജില് ന്യൂറോ വിഭാഗത്തിന്റെ പരിശോധനയില് ശിവശങ്കറിന് കാര്യമായ പ്രശ്നങ്ങളില്ലെന്ന് കണ്ടെത്തി. ആരോഗ്യനില തൃപ്തികരമാണ്. തുടര്ചികിത്സയ്ക്കായി ന്യൂറോ, ഹൃദ്റോഗ വിഭാഗം ഡോക്ടര്മാരടങ്ങിയ മെഡിക്കല് ബോര്ഡ് രൂപീകരിച്ചു.കടുത്ത പുറംവേദനയ്ക്ക് വിദഗ്ദ്ധ പരിശോധന വേണമെന്ന് സ്വകാര്യാശുപത്രിയിലെ ഡോക്ടര്മാര് കസ്റ്റംസിനെ അറിയിച്ചിരുന്നു.ഇ.സി.ജിയില് നേരിയ വ്യതിയാനമേയുള്ളൂ. രക്തസമ്മര്ദ്ദം സാധാരണനിലയിലാണ്. എം.ആര്.ഐ സ്കാനിംഗ് നടത്തിയെങ്കിലും ഗുരുതര പ്രശ്നങ്ങളൊന്നും കണ്ടെത്തിയില്ല. ഉച്ചയ്ക്ക് 12ന് ആശുപത്രി മെഡിക്കല് ബുള്ളറ്റിന് പുറത്തിറക്കി രണ്ടു മണിക്കൂറിനകം ശിവശങ്കറിനെ മെഡിക്കല് കോളേജിലേക്ക് മാറ്റുകയായിരുന്നു.
ആംബുലന്സിനെ കസ്റ്റംസ് ഉദ്യോഗസ്ഥര് അനുഗമിച്ചു. അദ്ദേഹത്തിന്റെ വിവരങ്ങള് ആശുപത്രി അധികൃതര് കസ്റ്റംസിനെ അറിയിക്കുന്നുണ്ട്. സ്വകാര്യ ആശുപത്രിയുടെ മെഡിക്കല് റിപ്പോര്ട്ട് ഇങ്ങനെയായിരുന്നു. ആശുപത്രിയില് എത്തിക്കുമ്പോള് രക്തസമ്മര്ദ്ദം ഉയര്ന്നതായിരുന്നു. ഇ.സി.ജിയില് നേരിയ വ്യതിയാനമുണ്ടായിരുന്നു. കാര്ഡിയാക് ഐ.സി.യുവിലാക്കി എം.ആര്.ഐ, സി.ടി പരിശോധനകളില് ഡിസ്കിന് തള്ളല് കണ്ടെത്തി. ഹാര്ട്ട് അറ്റാക്ക് ഉണ്ടായോ എന്നറിയാനുള്ള ട്രോപ് ടി രക്ത പരിശോധന നെഗറ്റീവ് രക്തക്കുഴലില് ബ്ലോക്കില്ല. ഹൃദയത്തകരാറുമില്ല. രക്തസമ്മര്ദ്ദം നിയന്ത്രണത്തിലായി. നടുവേദനയ്ക്ക് ന്യൂറോളജി വിദഗ്ദ്ധര് പരിശോധിച്ചു. ഇങ്ങനെ കൊഴുക്കുമ്പോഴാണ് മെഡിക്കല് കോളേജിലേക്ക് മാറ്റിയത്. ഇന്നത്തെ മെഡിക്കല് ബോര്ഡിന്റെ തീരുമാനമനുസരിച്ചായിരിക്കും കസ്റ്റംസിന്റെ അടുത്ത നീക്കം.
"
https://www.facebook.com/Malayalivartha
