ലക്ഷങ്ങള്‍ ശമ്പളം മേടിച്ച് ചുമ്മാ കറങ്ങി നടന്ന സ്വപ്ന സുരേഷിനെ ഈ ഗതിയിലാക്കിയതിന് പിന്നില്‍ സാക്ഷാല്‍ എയര്‍ കസ്റ്റംസ് കാര്‍ഗോ മേധാവി രാമമൂര്‍ത്തിയാണുള്ളത്. രാമമൂര്‍ത്തിക്ക് തോന്നിയ ചെറിയൊരു സംശയമാണ് രാജ്യാന്തര ശ്രദ്ധനേടിയ വലിയൊരു സ്വര്‍ണക്കടത്ത് കേസ് വെളിച്ചത്തായത്. മാത്രമല്ല സ്വപ്ന സുരേഷിനെ പൂട്ടി അകത്താക്കുകയും ചെയ്തു. എയര്‍പോര്‍ട്ടില്‍ എത്തിയ 30 കിലോ തൂക്കമുള്ള യുഎഇ കോണ്‍സുലേറ്റിലേക്കുള്ള പാഴ്‌സലില്‍ സ്വര്‍ണമാണന്ന് ദുബായില്‍ നിന്നു തന്നെ സൂചന ലഭിച്ചിരുന്നു. എന്നാല്‍ നയതന്ത്ര പരിരക്ഷയുള്ള പെട്ടി പൊട്ടിച്ചാല്‍ ഉണ്ടാകുന്ന ഭവിഷ്യത്ത് വലുതോര്‍ത്ത് ഒന്നാലോചിച്ചു. എന്നാല്‍ കൃത്യമായ നടപടികളോടെ സ്വപ്നാ സുരേഷിനേയും സരിത്തിനേയും രാമമൂര്‍ത്തി കുടുക്കുകയായിരുന്നു.

സ്വര്‍ണ കടത്തില്‍ മനസ്സിലായ കാര്യങ്ങള്‍ ജൂലൈ ആദ്യം രാമമൂര്‍ത്തി, കമ്മീഷണര്‍ വഴി വിവരം രേഖാമൂലം തന്നെ കേന്ദ്ര വിദേശ കാര്യ മന്ത്രാലയത്തെ ധരിപ്പിച്ചു. ഇമെയില്‍ മുഖാന്തിരം നല്കിയ അപേക്ഷയില്‍ രണ്ടു ദിവസം കഴിഞ്ഞിട്ടും മറുപടി ലഭിക്കാത്തതു കൊണ്ടു തന്നെ അനുമതി ലഭിക്കില്ലന്നായിരുന്നു കസ്റ്റംസിന്റെ കണക്കുകൂട്ടല്‍. എന്നാല്‍ വന്ദേഭാരത് ദൗത്യവുമായി ബന്ധപ്പെട്ട് ചില വിഷയങ്ങളില്‍ ഇന്ത്യ യു എ ഇ തര്‍ക്കം നിലനിന്നതും കസ്റ്റംസിന്റെ നീക്കത്തിന് ഗുണകരമായി. ഇതോടെയാണ് സ്വപ്നയെ പൂട്ടിയത്.


അങ്ങനെ രാമമൂര്‍ത്തി വെളിച്ചത്ത് കൊണ്ടുവന്ന സ്വപ്നയും സ്വര്‍ണവും അകത്തായപ്പോള്‍ പിന്നീട് എല്ലാവരും നോക്കിയത് ശിവശങ്കറിന്റെ കാര്യമാണ്. ശിവശങ്കറെ പൂട്ടാന്‍ എന്‍ഫോഴ്‌സ്‌മെന്റ് പഠിച്ച പണി പതിനെട്ടും നോക്കിയിട്ടും നടന്നില്ല. അതോടെ ശിവശങ്കറിന് ആശ്വാസമായി. എന്നാല്‍ അപ്രതീക്ഷിതമായി ഈ രാമമൂര്‍ത്തി ശിവശങ്കറിന്റെ വീട്ടിലെത്തിയതോടെ എല്ലാം കൈവിട്ടു. സ്വപ്നയെ പൂട്ടിയ അതേ ഉദ്യോഗസ്ഥന്‍ തന്നെയാണ് ശിവശങ്കറിനെ അറസ്റ്റ് ചെയ്യാന്‍ കഴിഞ്ഞ ദിവസം എത്തിയത്. എല്ലാം അതീവ രഹസ്യമാക്കിയാണ് നാടകീയമായി വീട്ടിലേക്ക് എത്തിയത്. എന്നാല്‍ രാമമൂര്‍ത്തിയെ കണ്ടപ്പോള്‍ ശിവശങ്കറിന്റെ ചങ്കിടിച്ചു. വെറുതേ രാമമൂര്‍ത്തി വരില്ല. അറസ്റ്റ് മണത്തു. ഇതോടെയാണ് ശിവശങ്കറിന് ബോധം പോയത്.

ശിവശങ്കറിനെ മാരത്തോണ്‍ ചോദ്യം ചെയ്തിട്ടും കൂളായി നിന്നതാണ്. എന്നാല്‍ ഡോളര്‍ കടത്തിലാണ് അല്‍പമെങ്കിലും തെളിവ് കിട്ടിയത്. ഡോളര്‍ കടത്തിയതുമായി ബന്ധപ്പെട്ട കേസില്‍ സ്വപ്നയ്ക്കും സരിത്തിനുമെതിരെ കസ്റ്റംസ് കേസെടുത്ത് അന്വേഷണം ആരംഭിച്ചതോടെയാണ് ഡോളര്‍ ബന്ധം പുറത്തായത്. ലൈഫ് മിഷന്‍ വഴി ലഭിച്ച കൈക്കൂലി തുക ഡോളര്‍ ആക്കി മാറ്റി യു.എ.ഇ കോണ്‍സുലേറ്റിലെ ഉദ്യോഗസ്ഥന്‍ വഴി വിദേശത്തേക്ക് കടത്തിയെന്നാണ് അന്വേഷണ സംഘത്തിന്റെ കണ്ടെത്തല്‍. 1.90 ലക്ഷം ഡോളര്‍ ആണ് വിദേശത്തേക്ക് കടത്തിയത്. ഇന്ത്യന്‍ കറന്‍സി ഡോളര്‍ ആയി മാറ്റിക്കിട്ടാന്‍ ശിവശങ്കര്‍ സമ്മര്‍ദ്ദം ചെലുത്തിയെന്ന് ബാങ്ക് അധികൃതര്‍ കസ്റ്റംസിനു മൊഴി നല്‍കിയിരുന്നു. ഇത്രയേറെ തുകയുടെ ഡോളര്‍ നല്‍കാന്‍ ബുദ്ധിമുട്ട് ഉണ്ടെന്ന് അറിയിച്ചെങ്കിലും ശിവശങ്കറിന്റെ സമ്മര്‍ദ്ദത്തെ തുടര്‍ന്ന് നല്‍കുകയായിരുന്നുവെന്നാണ് മൊഴി. ഈ മൊഴിയാണ് ശിവശങ്കറിന് വിനയായത്. ഇതോടെയാണ് രാമമൂര്‍ത്തി ശിവശങ്കറിനെ പിടിക്കാന്‍ പൂജപ്പുരയിലെ വീട്ടില്‍ എത്തിയത്.

ശിവശങ്കറിനെ 23 വരെ അറസ്റ്റ് ചെയ്യരുതെന്ന് എന്‍ഫോഴ്‌സ്‌മെന്റ് ഡയറക്ടറേറ്റിനു ഹൈക്കോടതി നേരത്തേ നിര്‍ദ്ദേശം നല്‍കിയിരുന്നു. എന്നാല്‍, ആവശ്യമെങ്കില്‍ വാറന്റില്ലാതെ അറസ്റ്റ് ചെയ്യാന്‍ അധികാരം നല്‍കുന്ന, ക്രിമിനല്‍ നടപടിച്ചട്ടം 41 (എ) നോട്ടീസുമായാണ് സ്വര്‍ണക്കടത്ത് പിടിച്ച അസിസ്റ്റന്റ് കമ്മിഷണര്‍ രാമമൂര്‍ത്തി കഴിഞ്ഞ ദിവസം നേരിട്ടെത്തിയത്. ഗൗരവം തിരിച്ചറിഞ്ഞതോടെയാണു ശിവശങ്കറിന് ബോധം പോയത്. ശാരീരിക ബുദ്ധിമുട്ട് ഉണ്ടെന്നറിയിച്ച ശിവശങ്കറെ അറസ്റ്റ് ചെയ്യാന്‍ രാമമൂര്‍ത്തി തയ്യാറായില്ല. പകരം അദ്ദേഹം പറഞ്ഞ ആശുപത്രിയില്‍ പ്രവേശിപ്പിച്ച് വിദഗ്ധ ചികിത്സ ഉറപ്പാക്കി. അവിടേയും രാമമൂര്‍ത്തിയുടെ മനുഷ്യത്വ മുഖമാണ് കണ്ടത്. ആദ്യം ചികിത്സ അതിന് ശേഷം നടപടി എന്ന നയമാണ് രാമമൂര്‍ത്തി സ്വീകരിച്ചത്. രാമൂര്‍ത്തി ഡോക്ടര്‍മാരുമായി സംസാരിച്ച് ശിവശങ്കറിന്റെ ആരോഗ്യനില ഗുരുതരമല്ലെന്ന് ഉറപ്പാക്കിയാണ് ആശുപത്രി വിട്ടത്. എന്നുകരുതി വിടുന്നയാളല്ല രാമമൂര്‍ത്തി, പൊക്കുമെന്ന് പറഞ്ഞാല്‍ പൊക്കിയിരിക്കും.