തിരുവനന്തപുരം പിആര്‍എസ് ഐസിയുവിലും പിന്നീട് മെഡിക്കല്‍ കോളേജ് ഓര്‍ത്തോ ഐസിയുവിലും സര്‍ക്കാര്‍ സെക്രട്ടറി എം ശിവശങ്കര്‍ എത്തിയത് കസ്റ്റംസിന്റെ അറസ്റ്റ് തടയിടാനെന്ന സംശയം ബലപ്പെടുന്നു. ആദ്യം നെഞ്ചുവേദനയായിരുന്നു. അത് നടുവേദനയും പുറം വേദനയും കഴുത്ത് വേദനയുമായി. മെഡിക്കല്‍ സയന്‍സിന് കണ്ടുപിടക്കാന്‍ കഴിയാത്ത എന്തെങ്കിലുമാണോയെന്ന് കണ്ടുപിടിക്കേണ്ടത് മെഡിക്കല്‍ ബോര്‍ഡാണ്. പഴയ ബോര്‍ഡ് മറ്റൊരു ഐഎഎസ് കാരനായ ശ്രീറാം വെങ്കിട്ടരാമന് ജാമ്യം നേടി കൊടുത്തത് പോലെയാകുമോയെന്ന് കണ്ടറിയാം. അങ്ങനെയെങ്കില്‍ മറ്റൊരു ഓപ്പറേഷനൊരുങ്ങുകയാണ് കസ്റ്റംസ്.

ഡോളര്‍ കടത്തുകേസുമായി ബന്ധപ്പെട്ട് ചോദ്യം ചെയ്യാനിരിക്കെ എം. ശിവശങ്കര്‍ മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്നതില്‍ ഒത്തുകളി സംശയിക്കുകയാണ് കസ്റ്റംസ്. ജാമ്യത്തിന് കോടതിയെ സമീപിക്കാനുള്ള സാവകാശമാണ് ആശുപത്രിവാസത്തിലൂടെ നേടുന്നതെന്നാണ് കേന്ദ്ര ഏജന്‍സികളുടെ നിഗമനം.

ഡിസ്‌കിന് തകരാറല്ലാതെ, കാര്യമായ ആരോഗ്യപ്രശ്‌നങ്ങളൊന്നുമില്ലാത്ത ശിവശങ്കറിന് ചികിത്സയുടെ പേരില്‍ സുരക്ഷിതതാവളം ഒരുക്കിയിരിക്കുകയാണെന്ന വിലയിരുത്തലാണ് അന്വേഷണ ഉദ്യോഗസ്ഥര്‍ മേലുദ്യോഗസ്ഥര്‍ക്ക് കൈമാറിയത്. അസ്ഥിരോഗവിഭാഗം ഐ.സി.യു.വില്‍ കഴിയുന്ന ശിവശങ്കറിന് ശക്തമായ സുരക്ഷാ സംവിധാനമാണ് ഒരുക്കിയിട്ടുള്ളത്. വിശ്വസ്തരായ ജീവനക്കാരല്ലാതെ ആരെയും ഈ ഭാഗത്തേക്ക് കടത്തി വിടുന്നില്ല. തിങ്കളാഴ്ച മെഡിക്കല്‍ ബോര്‍ഡ് ചേരും. ഇതിനു ശേഷമാകും തുടര്‍ചികിത്സ തീരുമാനിക്കുക.

അതേസമയം തന്നെ എം. ശിവശങ്കര്‍ ഇന്ന് മുന്‍കൂര്‍ ജാമ്യം തേടി ഹൈക്കോടതിയെ സമീപിച്ചേക്കും. ശിവശങ്കറിനെതിരെ കൂടുതല്‍ കുറ്റങ്ങളാരോപിച്ച് കോടതിയില്‍ റിപ്പോര്‍ട്ട് നല്‍കാനുള്ള തയാറെടുപ്പിലാണ് കസ്റ്റംസും. ശിവശങ്കറിന് ചികിത്സ തുടരണോയെന്നു നിശ്ചയിക്കുന്ന നിര്‍ണായക മെഡിക്കല്‍ ബോര്‍ഡ് യോഗം ഇന്ന് വൈകിട്ട് മൂന്ന് മണിയോടെ ചേരും.

നടുവിനും കഴുത്തിനും വേദനയെന്നു പറഞ്ഞ ശിവശങ്കറിനെ വിവിധ പരിശോധനകള്‍ക്ക് വിധേയമാക്കിയെങ്കിലും ഗുരുതര പ്രശ്‌നങ്ങള്‍ കാണാത്തതിനാല്‍ വിശ്രമം നിര്‍ദേശിച്ച് ഡിസ്ചാര്‍ജ് ചെയ്‌തേക്കും. അങ്ങനെയെങ്കില്‍ അറസ്റ്റാണ് കസ്റ്റംസിന്റെ ലക്ഷ്യമെങ്കില്‍ അതിന് തടസമുണ്ടാകില്ല. അതുകൊണ്ടു തന്നെ അറസ്റ്റ് തടയാനായി മെഡിക്കല്‍ ബോര്‍ഡിന് മുന്‍പ് തന്നെ ശിവശങ്കര്‍ മുന്‍കൂര്‍ ജാമ്യാപേക്ഷ സമര്‍പ്പിച്ചേക്കും.

ജാമ്യാപേക്ഷ കോടതി ഫയലില്‍ സ്വീകരിച്ചാല്‍ കടുത്ത നടപടികള്‍ ഒഴിവാക്കുന്നതാണ് അന്വേഷണ സംഘങ്ങളുടെ കീഴ്‌വഴക്കം. ശിവശങ്കറിന്റെ ഈ നീക്കങ്ങള്‍ക്ക് തടയിടാന്‍ കസ്റ്റംസ് എന്തു ചെയ്യുമെന്നതാണ് മറ്റൊരു ചോദ്യം. ജാമ്യാപേക്ഷ സമര്‍പ്പിക്കും മുന്‍പ് തന്നെ ശിവശങ്കറിനെ പ്രതി ചേര്‍ത്തോ, പങ്ക് വ്യക്തമാണെന്ന് കാണിച്ചോ കോടതിയില്‍ റിപ്പോര്‍ട്ട് നല്‍കുകയാണ് സാധ്യമായ മാര്‍ഗങ്ങളിലൊന്ന്.


എന്നാല്‍ അതിന് മാത്രം ശക്തമായ എന്ത് തെളിവാണ് ലഭിച്ചിരിക്കുന്നതെന്ന് വ്യക്തമാക്കേണ്ടിവരും. റിപ്പോര്‍ട്ട് നല്‍കാതെയും അറസ്റ്റ് ചെയ്യാതെയും ഇരുന്നാല്‍ എന്തിനാണ് മൂന്ന് ദിവസമായി ആശുപത്രിയിലടക്കം നാടകീയ നീക്കങ്ങള്‍ നടത്തിയത് എന്ന ചോദ്യത്തിന് കസ്റ്റംസ് ഉത്തരം പറയേണ്ടിവരും. അതിനിടവരുത്താതിരിക്കാന്‍ ശക്തമായ ഓപ്പറേഷനൊരുങ്ങുകയാണ് കസ്റ്റംസ്.