സ്വര്‍ണക്കടത്ത് കേസിലെ പ്രതി സ്വപ്ന സുരേഷിന് ബാങ്ക് ലോക്കര്‍ തുറക്കാന്‍ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍ ആവശ്യപ്പെട്ടെന്ന് ചാര്‍ട്ടേഡ് അക്കൗണ്ടന്റ് പി. വേണുഗോപാല്‍. എന്നാല്‍, സാമ്പത്തിക ഉപദേശം നല്‍കാനാണ് താന്‍ പറഞ്ഞതെന്നും ലോക്കര്‍ തുറക്കാന്‍ ആവശ്യപ്പെട്ടിട്ടില്ലെന്നും എം. ശിവശങ്കര്‍. എന്‍ഫോഴ്‌സ്‌മെന്റ് ഡയറക്ടറേറ്റിന് വ്യത്യസ്ത ദിവസങ്ങളില്‍ ഇവര്‍ നല്‍കിയ മൊഴിയിലാണ് വൈരുധ്യം. 25 വര്‍ഷമായി ശിവശങ്കറിനെ അറിയാമെന്ന് വേണുഗോപാല്‍ മൊഴി നല്‍കി. അദ്ദേഹമാണ് സ്വപ്നയെ പരിചയപ്പെടുത്തിയത്.

തനിക്ക് 30 ലക്ഷം രൂപ കിട്ടുന്നുണ്ടെന്നും അത് ഫിക്‌സഡ് ഡെപ്പോസിറ്റ് ഇടാന്‍ സഹായിക്കണമെന്നും സ്വപ്ന ആവശ്യപ്പെട്ടു. ഇതിനെ താന്‍ പിന്തുണച്ചില്ല. എങ്കില്‍ പണം ലോക്കറില്‍ സൂക്ഷിക്കാമെന്ന് സ്വപ്ന പറഞ്ഞു. ഈ അവസരത്തില്‍ സ്വപ്നയുടെയും വേണുഗോപാലിന്റെയും പേരില്‍ ജോയന്റ് ലോക്കര്‍ തുറക്കാന്‍ ശിവശങ്കര്‍ ആവശ്യപ്പെട്ടു.

ഇതുപ്രകാരം തിരുവനന്തപുരം എസ്.ബി.ഐ സിറ്റി മെയിന്‍ ബ്രാഞ്ചില്‍ ജോയന്റ് ലോക്കര്‍ തുറന്നു. അതില്‍ നടത്തിയ ഇടപാടുകളെക്കുറിച്ചെല്ലാം ശിവശങ്കറിനെ അറിയിച്ചിരുന്നു. ലോക്കറിന്റെ താക്കോല്‍ തന്റെ കൈവശമാണ് വെച്ചത്. പിന്നീട് മൂന്നുനാലുവട്ടം പണം എടുത്ത് സ്വപ്നക്ക് നല്‍കി. ലോക്കര്‍ കാലിയായപ്പോള്‍ പാസ്ബുക്കും താക്കോലും സ്വപ്നക്ക് കൊടുത്തു. പിന്നീട് ലോക്കര്‍ ക്ലോസ് ചെയ്യാന്‍ ആവശ്യപ്പെട്ടപ്പോള്‍ അതില്‍ കുറച്ച് സ്വര്‍ണം സൂക്ഷിക്കാമെന്ന് സ്വപ്ന പറഞ്ഞു. എന്നാല്‍, സ്വപ്നക്കുവേണ്ടി ലോക്കര്‍ തുറക്കാന്‍ വേണുഗോപാലിനോട് ആവശ്യപ്പെട്ടിരുന്നില്ലെന്നും ജോയന്റ് അക്കൗണ്ടിലെ ഇടപാടുകള്‍ സംബന്ധിച്ച് തന്നെ അറിയിച്ചിരുന്നില്ലെന്നും ശിവശങ്കര്‍ വിശദീകരിച്ചു.

പലവട്ടം സ്വപ്നക്ക് പണം നല്‍കിയിട്ടുണ്ട്. അത് തിരികെ തരാത്തതിനെത്തുടര്‍ന്നാണ് 2018 അവസാനം സ്വപ്നയെ ചാര്‍ട്ടേഡ് അക്കൗണ്ടന്റിന്റെ അടുക്കല്‍ എത്തിച്ചത്. സ്വപ്നയുടെ 20 ലക്ഷം രൂപ ഫിക്‌സഡ് അക്കൗണ്ടായി നിക്ഷേപിക്കുന്നതിന് സഹായം ആവശ്യപ്പെട്ടു. രണ്ടുമൂന്നു ദിവസം കഴിഞ്ഞ് വേണുഗോപാലിന്റെ വീട്ടില്‍ പണമടങ്ങിയ ബാഗ് കൈമാറി. അതില്‍ എത്ര രൂപയുണ്ടെന്ന് അറിഞ്ഞിരുന്നില്ല. പിന്നീട് വേണുഗോപാല്‍ ജോയന്റ് ലോക്കര്‍ തുറന്ന കാര്യം അറിയിച്ചു. ലോക്കര്‍ ചാര്‍ജ് നല്‍കാന്‍ സ്വപ്നയുടെ കൈവശം പണമില്ലാതിരുന്നതിനാല്‍ അത് തന്റെ അക്കൗണ്ടില്‍നിന്ന് ഡെബിറ്റ് ചെയ്യാന്‍ അനുമതി നല്‍കിയിരുന്നു.

അതേസമയം, മറ്റൊരു ചോദ്യംചെയ്യലിനിടെ സ്വപ്നക്ക് ബാങ്ക് ലോക്കര്‍ തുറക്കാന്‍ തന്റെ ചാര്‍ട്ടേഡ് അക്കൗണ്ടന്റിനെ ചുമതലപ്പെടുത്തിയ കാര്യം ശിവശങ്കര്‍ സമ്മതിച്ചെന്നും ഇ.ഡി കോടതിയില്‍ സമര്‍പ്പിച്ച കുറ്റപത്രത്തിലുണ്ട്. മൊഴികളിലെ വൈരുധ്യത്തെത്തുടര്‍ന്നാണ് മൊത്തം കാര്യങ്ങളിലും ശിവശങ്കറിന്റെ പങ്ക് സൂക്ഷ്മമായി അന്വേഷിക്കണമെന്ന് കുറ്റപത്രത്തില്‍ ഇ.ഡി ആവശ്യം ഉന്നയിച്ചത്. കേസില്‍ സാക്ഷിയാണ് വേണുഗോപാല്‍.