നെല്ലിയമ്പം ഇരട്ടക്കൊലപാതക കേസ്... പ്രതിക്ക് കല്പ്പറ്റ അഡീഷണല് ഡിസ്ട്രിക്റ്റ് കോടതി വധശിക്ഷക്ക് വിധിച്ചു
നെല്ലിയമ്പം ഇരട്ടക്കൊലപാതക കേസില് പ്രതിക്ക് വധശിക്ഷ. കായക്കുന്ന് കുറുമക്കോളനിയിയിലെ അര്ജ്ജുനെയാണ് കല്പ്പറ്റ അഡീഷണല് ഡിസ്ട്രിക്റ്റ് കോടതി വധശിക്ഷക്ക് വിധിച്ചത്. 2021 ജൂണ് പത്തിന് രാത്രി നെല്ലിയമ്പം പത്മാലയത്തില് കേശവന് ഭാര്യ പത്മാവതി എന്നിവരാണ് കൊല്ലപ്പെട്ടത്. ദമ്പതികളെ അര്ജുന് വീട്ടില്ക്കയറി കൊലപ്പെടുത്തുകയായിരുന്നു. സംഭവത്തില് അര്ജ്ജുന് കുറ്റക്കാരനാണെന്ന് കോടതി കണ്ടെത്തിയിരുന്നു.
കൊലപാതകം, ഭവനഭേദനം, തെളിവ് നശിപ്പിക്കല് എന്നീ കുറ്റങ്ങള് പ്രതി ചെയ്തതായി കോടതി കണ്ടെത്തി. അഡീഷണല് ഡിസ്ട്രിക്ട് ആന്ഡ് സെഷന്സ് കോടതി രണ്ട് ജഡ്ജി എസ് കെ അനില് കുമാറാണ് കേസില് വിധി പ്രസ്താവിച്ചത്.ദമ്പതികളായ കേശവനും ഭാര്യ പത്മാവതിയും താമസിക്കുന്ന വീട്ടില് അതിക്രമിച്ചെത്തി പ്രതി അതി ക്രൂരമായി ഇവരെ കൊലപ്പെടുത്തുകയായിരുന്നു. കേശവന് സംഭവസ്ഥലത്തുവച്ചും ഭാര്യ പത്മാവതി മണിക്കൂറുകള് കഴിഞ്ഞ് വയനാട് ഗവ. മെഡിക്കല് കോളേജ് ആശുപത്രിയിലും മരിച്ചു.മൂന്നുമാസത്തിനുശേഷം സെപ്തംബര് 17-നാണ് പ്രതി അയല്വാസിയായ നെല്ലിയമ്പം കായക്കുന്ന് കുറുമക്കോളനിയിലെ അര്ജുന് അറസ്റ്റിലാവുന്നത്. മോഷണശ്രമമാണ് കൊലപാതകത്തില് കലാശിച്ചത്. ഒപ്പം നിന്നവര്ക്ക് നന്ദിയെന്നും സമൂഹത്തിന് നല്ല സന്ദേശം നല്കുന്ന വിധിയാണിതെന്നും മകന് മുരളി വിധിക്ക് ശേഷം പ്രതികരിച്ചു.
അന്നത്തെ മാനന്തവാടി ഡിവൈഎസ്പി എ പി ചന്ദ്രന്റെ നേതൃത്വത്തില് 41 അംഗ സംഘമാണ് കേസ് അന്വേഷിച്ചത്. കേസില് അന്വേഷണ ഉദ്യോഗസ്ഥനുള്പ്പെടെ 75 സാക്ഷികളെ വിസ്തരിച്ചു. 179 രേഖകളും 39 തൊണ്ടിമുതലുകളും പ്രോസിക്യൂഷന് കോടതിയില് ഹാജരാക്കി. 2023 ഫെബ്രുവരിയിലാണ് കേസില് വാദം തുടങ്ങിയത്. ഡിസംബര് 20-നാണ് കേസിന്റെ വിചാരണ പൂര്ത്തിയായത്.
https://www.facebook.com/Malayalivartha