മേയറുടെ ആരോപണങ്ങള്‍ തള്ളി ഡ്രൈവര്‍ യദു രംഗത്തെത്തി. ഞാനൊരു സാധാരണക്കാരനും കെഎസ്ആര്‍ടിസിയിലെ താല്‍ക്കാലിക ജീവനക്കാരനുമാണ്. അധികാര ദുര്‍വിനിയോഗമാണ് എന്റെയടുത്ത് കാണിക്കുന്നത്. പ്രതികാരം തീര്‍ക്കുകയാണവര്‍. എനിക്കെതിരെ പഴയ കേസ് നിലവിലുണ്ട് എന്നൊക്കെ പറയുന്നത് വെറുതേയാണ്. അങ്ങിനെ ഒരു കേസുമില്ല. ഈ കേസില്‍ ഞാന്‍ കോടതിയില്‍ പോവുകയും, എന്റെ ഭാഗത്ത് തെറ്റില്ലെന്ന് തെളിയിക്കുകയും ചെയ്യും. എന്റെ ആകെയുള്ള വരുമാനമാര്‍ഗമായിരുന്നു ഇത്. 715 രൂപയാണ് ഒരുദിവസത്തെ ശമ്പളം. സാധാ കൂലിപ്പണിക്കാരന് 1000 രൂപ കിട്ടും. ഇതുപോലുള്ള ചീത്ത വിളികള്‍ കേട്ട് ഓടിയാല്‍ കിട്ടുന്ന ശമ്പളമാണ് 715 രൂപ. നിന്റെ അപ്പന്റെ വകയാണോ റോഡ് എന്നാണ് എന്നോട് ചോദിച്ചത്. എനിക്ക് മനപൂര്‍വം മേയറെ നാണം കെടുത്തേണ്ട കാര്യമില്ല. പക്ഷേ മേയര്‍ എല്ലാവരുടെ മുന്നിലും എന്നെ നാണംകെടുത്തി കൊണ്ടിരിക്കുകയാണ്. മനുഷ്യാവകാശ കമ്മിഷനിലും ഞാന്‍ കേസ് കൊടുക്കുമെന്നും യദു പറഞ്ഞു.

അതേസമയം കെ.എസ്.ആര്‍.ടി.സി ഡ്രെവര്‍ അശ്ലീല ആംഗ്യം കാണിച്ചെന്ന ആരോപണത്തില്‍ മേയര്‍ ആര്യാ രാജേന്ദ്രന്റെ വാദം പൊളിക്കുന്ന ദൃശ്യങ്ങള്‍ പുറത്തുവന്നു. ബസ് തടഞ്ഞിട്ടില്ലെന്നും വാഹനം കുറുകെ ഇട്ടിട്ടില്ല എന്നുമാണ് മേയര്‍ പറഞ്ഞിരുന്നത്. എന്നാല്‍ ബസ് തടഞ്ഞ് വാഹനം കുറുകെ ഇട്ടിരിക്കുന്ന ദൃശ്യമാണ് പുറത്തുവന്നത്. പാളയം സാഫല്യം കോംപ്ലക്‌സിന് മുന്നില്‍വച്ചാണ് ബസ് തടഞ്ഞത്. സീബ്ര ലൈനിലാണ് കാര്‍ നിറുത്തിയിരിക്കുന്നതെന്ന് ദൃശ്യങ്ങളില്‍ കാണാം.

സിഗ്‌നലില്‍ ബസ് നിറുത്തിയപ്പോഴാണ് സംസാരിച്ചതെന്നാണ് മേയര്‍ ആദ്യം പറഞ്ഞിരുന്നത്. ബസിന് മുന്നില്‍ കാര്‍ കൊണ്ടിട്ടു. സിഗ്‌നലില്‍ നിറുത്തിയപ്പോഴാണ് കാറിട്ടത്. അപ്പോഴാണ് ഡ്രൈവറോട് സംസാരിച്ചത്. കുറുകെയാണോ എന്നറിയില്ലെന്നാണ് മേയര്‍ രാവിലെ മാദ്ധ്യമങ്ങളെ കണ്ടപ്പോള്‍ പറഞ്ഞത്. ഡ്രൈവര്‍ അസഭ്യമായി ലൈംഗികച്ചുവയോട് കൂടി ആംഗ്യം കാണിച്ചെന്ന് മേയര്‍ പറഞ്ഞു. ഡ്രൈവര്‍ ലഹരി ഉപയോഗിച്ചിരുന്നു. ഒരു കാര്യവും സംസാരിക്കാന്‍ അയാള്‍ തയ്യാറായില്ല. പൊലീസ് എത്തിയപ്പോള്‍ മാത്രമാണ് ഡ്രൈവര്‍ മാന്യമായി സംസാരിച്ചത്. വാഹനത്തിന് സൈഡ് തരാത്തതുമായി ബന്ധപ്പെട്ട പ്രശ്‌നമായി മാത്രം ഇതിനെ കാണരുതെന്നും മേയര്‍ പറഞ്ഞിരുന്നു.