ശബരിമല വിഷയത്തില് അറസ്റ്റിലായ മുന് അഡ്മിനിസ്ട്രേറ്റര് എസ് ശ്രീകുമാര് റിമാന്ഡില്
ശബരിമല സ്വര്ണപ്പാളിക്കേസില് ഇന്ന് അറസ്റ്റിലായ മുന് അഡ്മിനിസ്ട്രേറ്റീവ് ഓഫീസര് എസ് ശ്രീകുമാറിനെ 14 ദിവസത്തേക്ക് റിമാന്ഡ് ചെയ്തു. കൊല്ലം വിജിലന്സ് കോടതിയുടേതാണ് നടപടി. 2019ല് ദ്വാരപാലക ശില്പങ്ങളിലെ സ്വര്ണപ്പാളികള് ഉണ്ണികൃഷ്ണന് പോറ്റിയുടെ പക്കല് കൊടുത്തുവിട്ടതുമായി ബന്ധപ്പെട്ട മഹസറില് ഒപ്പുവച്ച ഉദ്യോഗസ്ഥരില് ഒരാളാണ് ശ്രീകുമാര്. ഹൈക്കോടതി മുന്കൂര് ജാമ്യാപേക്ഷ തള്ളിയതിന് പിന്നാലെയാണ് അറസ്റ്റ് ചെയ്തത്. എന്നാല് ഉദ്യോഗസ്ഥനെന്ന നിലയില് മേല്ത്തട്ടില് നിന്നുള്ള നിര്ദേശം അനുസരിച്ച് ഫയല് നീക്കുകമാത്രമാണ് ചെയ്തതെന്നായിരുന്നു ശ്രീകുമാറിന്റെ വാദം.
അതേസമയം, ശബരിമല ക്ഷേത്രത്തിലെ ദ്വാരപാലക ശില്പങ്ങളിലെ സ്വര്ണപ്പാളിയിലെ സ്വര്ണം അപഹരിച്ച കേസില് ദേവസ്വം ബോര്ഡ് മുന് പ്രസിഡന്റും എംഎല്എയുമായിരുന്ന എ പത്മകുമാറിന്റെ ജുഡീഷ്യല് റിമാന്ഡ് കാലാവധി 14 ദിവസത്തേക്ക് കൊല്ലം വിജിലന്സ് കോടതി നീട്ടി. കട്ടിളപ്പാളിയിലെ സ്വര്ണം അപഹരിച്ച കേസില് വ്യാഴാഴ്ചയാണ് റിമാന്ഡ് കാലാവധി അവസാനിക്കുന്നത്.
ദ്വാരപാലക ശില്പങ്ങളിലെ സ്വര്ണപ്പാളി അപഹരിച്ച കേസില് പത്മകുമാര് സമര്പ്പിച്ച ജാമ്യഹര്ജി 22ന് പരിഗണിക്കും. ഈ കേസില് എസ്ഐടിയുടെ റിപ്പോര്ട്ട് തേടിയിട്ടുണ്ട്. കഴിഞ്ഞ ദിവസം എസ്ഐടി കസ്റ്റഡിയില് വിട്ട ഉണ്ണിക്കൃഷ്ണന് പോറ്റി, മുരാരി ബാബു എന്നിവരെ ഇന്നലെ വൈകിട്ട് തിരികെ കോടതിയില് ഹാജരാക്കി റിമാന്ഡ് ചെയ്ത് ജയിലിലേക്ക് അയച്ചു. ദ്വാരപാലക ശില്പത്തിലെ സ്വര്ണപ്പാളി അപഹരിച്ച കേസില് മുരാരി ബാബുവിനെയും കട്ടിളയിലെ സ്വര്ണപ്പാളി അപഹരിച്ച കേസില് ഉണ്ണിക്കൃഷ്ണന് പോറ്റിയെയും രണ്ട് ദിവസത്തേക്കാണ് എസ്ഐടിയുടെ കസ്റ്റഡിയില് വിട്ടിരുന്നത്.
https://www.facebook.com/Malayalivartha
