സ്ത്രീയും ഭര്‍ത്താവും ചേര്‍ന്ന് പോലീസ് സ്‌റ്റേഷന്‍ ആക്രമിച്ചെന്ന വാദം ശരിയല്ലെന്ന സിസിടിവി ദൃശ്യങ്ങള്‍ പുറത്തുവന്നിരിക്കുകയാണ്. യുവതി ഹൈക്കോടതിയെ സമീപിച്ചത് പ്രകാരമാണ് ഇപ്പോള്‍ ദൃശ്യം പുറത്തുവിട്ടത്. ഗര്‍ഭിണിയായ യുവതിയുടെ മുഖത്തടിച്ചെന്ന പരാതി ഇതോടെ തെളിഞ്ഞിരിക്കുകയാണ്. കൊച്ചി സ്വദേശി ഷൈമോള്‍ക്കാണ് പൊലീസിന്റെ അടിയേറ്റത്.

എറണാകുളം നോര്‍ത്ത് സ്‌റ്റേഷനിലെ എസ്എച്ച്ഒ ആയിരുന്ന പ്രതാപ ചന്ദ്രനാണ് യുവതിയുടെ മുഖത്തടിച്ചത്. 2024ല്‍ നടന്ന മര്‍ദ്ദനത്തിന്റെ സിസിടിവി ദൃശ്യങ്ങള്‍ ആണ് പുറത്തുവന്നിരിക്കുന്നത്. എസ്‌ഐ യുവതിയുടെ നെഞ്ചില്‍ പിടിച്ച് തളളുകയും മുഖത്തടിക്കുന്നതും ദൃശ്യങ്ങളില്‍ കാണാം. 'മിന്നല്‍ പ്രതാപന്‍ ' എന്ന പേരിലാണ് പൊലീസുകാര്‍ക്കിടയില്‍ ഇയാള്‍ അറിയപ്പെട്ടിരുന്നത്.

യുവതി ഹൈക്കോടതിയെ സമീപിച്ചത് പ്രകാരമാണ് ഇപ്പോള്‍ ദൃശ്യം പുറത്തുവിട്ടത്. സ്ത്രീയും ഭര്‍ത്താവും ആക്രമിച്ചു എന്നായിരുന്നു പൊലീസ് വാദം. യുവതിയുടെ ഭര്‍ത്താവ് ബെന്‍ ജോ നടത്തുന്ന ഹോട്ടലില്‍ നടന്ന അടിപിടിയെ തുടര്‍ന്നാണ് കസ്റ്റഡിയില്‍ എടുക്കുന്നത്. ഇതിന് പിന്നാലെയാണ് യുവതി സ്‌റ്റേഷനിലെത്തിയത്. സംഭവത്തില്‍ അടിയന്തര നടപടിയെടുക്കാന്‍ ഡിജിപിക്ക് മുഖ്യമന്ത്രി നിര്‍ദേശം നല്‍കി.

സ്‌റ്റേഷന്‍ ആക്രമിച്ചു, ക്രമസമാധാന പാലനം തടസ്സപ്പെടുത്തി തുടങ്ങിയ വകുപ്പുകള്‍ ചൂണ്ടിക്കാട്ടി ഇരുവര്‍ക്കും എതിരെ കേസ് എടുത്തിരുന്നു. ബെന്‍ ജോയെ അറസ്റ്റ് ചെയ്തു റിമാന്‍ഡ് ചെയ്യുകയും ചെയ്തിരുന്നു. ഒരു വര്‍ഷം നീണ്ട നിയമ യുദ്ധങ്ങള്‍ക്ക് ശേഷമാണ് സിസിടിവി ദൃശ്യങ്ങള്‍ ലഭ്യമായത്. ഡിജിപിക്കും മനുഷ്യാവകാശ കമ്മീഷനും നല്‍കിയ പരാതിയെ തുടര്‍ന്ന് ഹൈക്കോടതി ഉത്തരവിലാണ് സിസിടിവി ദൃശ്യങ്ങള്‍ വിവരാവകാശ നിയമപ്രകാരം പുറത്തുവിട്ടത്. പ്രതാപചന്ദ്രനെതിരെ മുന്‍പും സമാന ആരോപണങ്ങള്‍ നിലനിന്നിരുന്നു. സ്‌റ്റേഷനില്‍ പ്രതികളെ ക്രൂരമായി മര്‍ദിച്ചു എന്നായിരുന്നു പരാതി.