നിപ വൈറസ് പടര്‍ന്ന സാഹചര്യത്തില്‍ ആവശ്യമായ പ്രതിരോധ പ്രവര്‍ത്തനങ്ങള്‍ക്ക് നേതൃത്വം നല്‍കിയ ആരോഗ്യമന്ത്രി കെ കെ ശൈലജയെ പ്രകീര്‍ത്തിച്ച് ഒരുപാട് നേതാക്കളാണ് രംഗത്തുവരുന്നത്. കഴിഞ്ഞ ദിവസം സഭയിലും പ്രതിപക്ഷം മന്ത്രിയെ അഭിനന്ദിച്ചിരുന്നു. കോഴിക്കോട് സ്വകാര്യ ആശുപത്രിയിലെ ഡോക്ടറുടെ കുറിപ്പ്. ഡോക്ടര്‍ എ എസ് അനൂപ് കുമാറിന്റെ കുറിപ്പാണ് സമൂഹമാധ്യമങ്ങളില്‍ വൈറലാവുന്നത്. ഒരു രാഷ്ട്രീയക്കാരിയും, ഭരണ കര്‍ത്താവും എങ്ങനെ ആകണം എന്നതിന്റെ ഉത്തമ ഉദാഹരണമാണ് കെ കെ ശൈലജയുടേതെന്ന് തുടങ്ങുന്ന കുറിപ്പാണ് മന്ത്രിയുടെ പ്രവര്‍ത്തനങ്ങളെ പ്രകീര്‍ത്തിക്കുന്നത്. ഉരുക്കു വനിതയായും മന്ത്രിയെ വിശേഷിപ്പിക്കുന്നുണ്ട്.

ഏതൊരു ചെറിയ കാര്യങ്ങളിലുള്ള ശ്രദ്ധയും യുക്തമായ തീരുമാനങ്ങളും, സ്‌നേഹം നിറഞ്ഞ പെരുമാറ്റവും കൊണ്ട് ഒരു ജാന്‍സി റാണിയെ പോലെ നിപാ പ്രതിരോധ സംഘത്തെ നയിച്ചു. രോഗം വരുമെന്ന പേടിപോലും ഇല്ലാതെ ഒരു ശക്തയായ സേനാപതിയെ പോലെയാണ് മന്ത്രി പ്രവര്‍ത്തിച്ചതെന്നും കുറിപ്പില്‍ പറയുന്നു.

തൊഴില്‍ എക്‌സൈസ് മന്ത്രി ടി.പി. രാമകൃഷ്ണന്‍, ജില്ലാ കലക്ടര്‍ യു.വി. ജോസ്, ആരോഗ്യ വകുപ്പ് ഡയറക്ടര്‍ ഡോ. സരിത ശിവരാമന്‍, മെഡിക്കല്‍ കോളജ് പ്രിന്‍സിപ്പല്‍ ഡോ. രാജേന്ദ്രന്‍, മെഡിക്കല്‍ സൂപ്രണ്ട് ഡോ.സജിത്ത് തുടങ്ങി നിപാ വൈറസ് പ്രതിരോധിക്കാന്‍ പിന്തുണ നല്‍കിയ എല്ലാവര്‍ക്കും പ്രത്യേകം കുറിപ്പുകളിലൂടെ ഡോക്ടര്‍ നന്ദി അറിയിക്കുന്നുണ്ട്.