വരുന്ന പാര്‍ലെമെന്റ് തെരഞ്ഞെടുപ്പില്‍ ഉമ്മന്‍ ചാണ്ടി കോട്ടയത്ത് നിന്ന് പാര്‍ലെമെന്റിലേക്ക് മത്സരിക്കുമെന്ന് സൂചന.

ജോസ് കെ മാണിയെ രാജ്യസഭയിലേക്കയച്ചത് കോട്ടയം പാര്‍ലെമെന്റ് സീറ്റ് പിടിച്ചെടുക്കാനാണെന്നും വിവരമുണ്ട്. കേരള കോണ്‍ഗ്രസ് മാണിക്ക് പത്തനംതിട്ടയോ ഇടുക്കിയോ നല്‍കും. ഇടുക്കിയിലും പത്തനംതിട്ടയിലും കേരള കോണ്‍ഗ്രസ് എമ്മിന് ജയസാധ്യതയുണ്ട്.

എല്ലാവരും കുറ്റം പറയുമ്പോള്‍ ഉമ്മന്‍ ചാണ്ടി മിണ്ടാതെ നില്‍ക്കുന്നതിന്റെ രഹസ്യവും മറ്റൊന്നല്ല. അതീവ തന്ത്രശാലിയായ ഉമ്മന്‍ ചാണ്ടിയെ സംബന്ധിച്ചടത്തോളം വീണിടം വിദ്യയാക്കാനുള്ള എല്ലാ കഴിവുമുണ്ട്. പി ജെ കുര്യനെന്നല്ല ആര് തന്നോട് ഇടഞ്ഞാലും തനിക്കൊന്നുമില്ലെന്നാണ് അദ്ദേഹം പറയുന്നത്. ബി ടീമിനെ കൊണ്ട് അഭിപ്രായം പറയിച്ച് മികവു തെളിയിക്കാനും അദ്ദേഹം ശ്രമിക്കുന്നു. 

എന്നാല്‍ കുറുക്കന്റെ കണ്ണ് കോഴിക്കൂട്ടിലെന്നവണ്ണം ഉമ്മന്‍ ചാണ്ടിയുടെ കണ്ണ് കോട്ടയത്തേക്കാണെന്ന വിവരം ഡല്‍ഹിയിലുമറിഞ്ഞു എന്നാണ് കേള്‍ക്കുന്നത്. അതിനെതിരെ ഡല്‍ഹിയില്‍ നിന്നും പ്രതികരണമൊന്നും ലഭിച്ചിട്ടില്ല. കെ എം മാണി ആവശ്യപ്പെടാത്ത സീറ്റ് അദ്ദേഹത്തിന് ലഭിച്ചതിനു പിന്നിലെ രഹസ്യമാണ് എല്ലാവരും അന്വേഷിക്കുന്നത്. പിജെ കുര്യന്റെ പ്രതികരണങ്ങളില്‍ നിന്നും അദ്ദേഹം ഇക്കാര്യം മനസിലാക്കിയിട്ടുണ്ടെന്നാണ് അറിയുന്നത്.

അടുത്ത തവണ കേന്ദ്രത്തില്‍ യുപിഎ അധികാരത്തിലെത്തിയാല്‍ ഉമ്മന്‍ ചാണ്ടി കേന്ദ്ര ക്യാബിനറ്റ് മന്ത്രിയാകും. കേരളത്തില്‍ നിന്നും അദ്ദേഹം പൂര്‍ണമായും മാറി കഴിഞ്ഞു. പ്രതിപക്ഷ നേതാവ് സ്ഥാനത്ത് നിന്ന് രമേശ് ചെന്നിത്തലയെ നീക്കണമെന്ന ആവശ്യത്തില്‍ നിന്ന് തത്കാലം കേരള കോണ്‍ഗ്രസ് പിന്‍വാങ്ങി കഴിഞ്ഞു. അതിനു പിന്നിലും ഉമ്മന്‍ ചാണ്ടിയുടെ തന്ത്രപരമായ സമീപനമുണ്ടെന്ന് പറയപ്പെടുന്നു.

ഉമ്മന്‍ ചാണ്ടി കോട്ടയത്തേക്ക് മാറിയാല്‍ പുതുപ്പള്ളിയില്‍ ആര് എന്ന ചോദ്യം ബാക്കിയാവുന്നു. ഉമ്മന്‍ ചാണ്ടിയുടെ കുടുംബത്തില്‍ നിന്നൊരാള്‍ എന്ന മറുപടിയാണ് ലഭിക്കുന്നത്. എങ്കില്‍ ഉമ്മന്‍ ചാണ്ടിയുടെ മകന്‍ പുതുപ്പള്ളിയില്‍ നിന്നും തെരഞ്ഞെടുപ്പില്‍ മത്സരിക്കും. അപ്പോള്‍ മകന്റെയും അപ്പന്റെയും ഭാവി സുരക്ഷിതമാവും. ഒരു സുപ്രഭാതത്തില്‍ കേരളത്തെ ഞ്ഞെട്ടിച്ച ഒരു തീരുമാനമെടുക്കാന്‍ ഉമ്മന്‍ ചാണ്ടി ഇല്ലെങ്കില്‍ തയ്യാറാകുമായിരുന്നില്ല. ഒരു വര്‍ഷത്തിനകം ഇക്കാര്യം മനസിലാക്കാം.

അതേ സമയം എല്ലാം ചെയ്തത് ഉമ്മന്‍ ചാണ്ടിയാണെന്ന കുറ്റസമ്മതം ചെന്നിത്തല നടത്തിയതോടെ അദ്ദേഹം ഒരു പരിധി വരെ സെയ്ഫായി. വരും ദിവസങ്ങളില്‍ ചെന്നിത്തല തന്റെ ചാണ്ടി വിരുദ്ധ നിലപാട് ശക്തമാക്കുമെന്നാണ് കേള്‍ക്കുന്നത്. കോണ്‍ഗ്രസില്‍ അണികള്‍ ലഭിക്കണമെങ്കില്‍ ഉമ്മന്‍ ചാണ്ടിക്കെതിരെ പറയണം എന്നതാണ് അവസ്ഥ.