അച്ഛന് കാര് വാങ്ങി നല്കാമെന്ന വാഗ്ദാനം നിറവേറ്റാന് കഴിയാതെ വന്നപ്പോള് മരണ ശേഷം ശവപ്പെട്ടിക്ക് പകരം മകന് കൊണ്ടു വന്നത് പുത്തന് ബിഎംഡബ്ല്യു കാര്
മകന്റെ ഏറ്റവും വലിയ ആഗ്രഹമായിരുന്നു അച്ഛന് വിലകൂടി കാര് വാങ്ങി നല്കുക എന്നത്. എന്നാല് അച്ഛന് മരിച്ചതോടെ മകന് വലിയ വിഷമായി. അച്ഛന്റെ ആഗ്രഹം നടത്താന് കഴിയാത്തതില് ഏറെ വിഷമിച്ചു. അച്ഛന്റെ ആഗ്രഹം നിറവേറ്റാന് സാധിക്കാതിരുന്നതിന്റെ നിരാശ പരിഹരിച്ചത് മറ്റൊരു രീതിയിലാണ്. 60 ലക്ഷം രൂപയുടെ പുത്തന് പുതിയ ബിഎംഡബ്ല്യു കാര് വാങ്ങി അച്ഛന്റെ മൃതദേഹം അതിലിരുത്തി അടക്കം ചെയ്തു! പട്ടിണിപ്പാവങ്ങളുടെ നാടായ നൈജീരിയയില്നിന്നാണ് ഈ വേദനിക്കുന്ന കോടീശ്വരന്റെ പിതൃസ്നേഹ വാര്ത്ത പുറത്തുവന്നത്.
നൈജീരിയയില് ഇഹിയാല ഗ്രാമത്തിലാണ് ഈ ആഡംബര ശവസംസ്കാരം നടന്നത്. സെമിത്തേരിയില് വലിയ കുഴിയുണ്ടാക്കി അതിലേക്ക് പുതിയ കാര് ഇറക്കി നടത്തിയ ശവസംസ്കാരത്തിന്റെ ചിത്രം സോഷ്യല് മീഡിയയില് ഇപ്പോള് വൈറലായിക്കൊണ്ടിരിക്കുകയാണ്. അച്ഛനെ സ്വര്ഗത്തിലേക്ക് ബിഎംഡബ്ല്യു കാറിലയച്ച മകന് എന്ന പേരിലാണ് ചിത്രം പ്രചരിക്കുന്നത്. സാറ്റലൈറ്റ് നാവിഗേഷനുള്പ്പെടെയുള്ള സംവിധാനങ്ങള് വഴിതെറ്റാതിരിക്കാന് കാറില് ഏര്പ്പെടുത്തിയിട്ടുണ്ടെന്നും ചിലര് പരിഹസിക്കുന്നു.
ഒട്ടേറെ പട്ടിണിപ്പാവങ്ങളുള്ള ഒരു നാട്ടില് ഇങ്ങനെ പണം നശിപ്പിച്ചതിനെയും പലരും ചോദ്യം ചെയ്യുന്നുണ്ട്. ജീവിച്ചിരിക്കുമ്പോള് അവര്ക്ക് കാര് വാങ്ങി നല്കുന്നത് മനസ്സിലാക്കാനാവും. എന്നാല്, അവരെ ഇത്രയും വിലകൂടിയ കാറിലിരുത്തി അടക്കം ചെയ്യുന്നത് വിഡ്ഢിത്തമല്ലാതെ മറ്റൊന്നുമല്ലെന്ന് സിഫിസോ ഇന്നോ മഖാഷില എന്നയാള് ഫേസ്ബുക്കില് ഈ ചിത്രം പങ്കുവെച്ചുകൊണ്ട് അഭിപ്രായപ്പെട്ടു.
പാവപ്പെട്ട കറുത്ത വര്ഗക്കാരോടുള്ള അവഹേളനമാണിതെന്നാണ് ഒബിനീസ് മൊഹാലെയെന്നയാളുടെ പ്രതികരണം. പണം നിങ്ങളുടേതാണെങ്കിലും അത് ചെലവഴിച്ച രീതി മറ്റുള്ളവരെ അപമാനിക്കുന്ന തരത്തിലായിപ്പോയെന്നും ചിലര് വിമര്ശിച്ചു. 2015ലും ആഫ്രിക്കയില് സമാനമായ രീതിയില് ശവസംസ്കാരമുണ്ടായിട്ടുണ്ട്. നൈജീരിയയില്ത്തന്നെയുള്ള എനുഗുവിലെ ഒരു ധനാഢ്യന് തന്റെ അമ്മയുടെ മൃതദേഹം അടക്കം ചെയ്തത് കോടികള് വിലമതിക്കുന്ന ഹമ്മറിലായിരുന്നു.
https://www.facebook.com/Malayalivartha
