കര്‍ഷകസമരം 100-ാം ദിവസത്തിലേക്ക് കടക്കുന്ന ശനിയാഴ്ച ഡല്‍ഹിക്കു ചുറ്റുമുള്ള കെഎംപി എക്സ്പ്രസ് പാത കര്‍ഷകര്‍ ഉപരോധിക്കും. വിവിധ കേന്ദ്രങ്ങളിലായാണ് ഉപരോധം. കുണ്ട്ലിയില്‍നിന്ന് ആരംഭിച്ച് മനേസര്‍ വഴി പല്‍വല്‍വരെയാണ് കെഎംപി എക്സ്പ്രസ് പാത.

ഹരിയാന, യുപി സംസ്ഥാനങ്ങളിലാണ് ഇത്. പ്രധാന കേന്ദ്രങ്ങളായ കുണ്ട്ലിയിലും മനേസറിലും പല്‍വലിലും ഉപരോധമുണ്ടാകും. സിന്‍ഘു അതിര്‍ത്തിയിലും തിക്രിയിലും സമരത്തിലുള്ള കര്‍ഷകരും ഉപരോധത്തില്‍ പങ്കാളികളാകും. ദേശീയ തലത്തില്‍ ശനിയാഴ്ച കരിദിനവും ആചരിക്കും

മഹാരാഷ്ട്രയിലേതിനു സമാനമായി കിസാന്‍സഭ ഹരിയാനയിലും കര്‍ഷകരുടെ ലോങ് മാര്‍ച്ച് സംഘടിപ്പിക്കുന്നു. ഹരിയാനയിലെ ഹിസാറില്‍നിന്ന് ഡല്‍ഹിയിലേക്കാണ് മാര്‍ച്ച്. അഞ്ചുദിവസംകൊണ്ട് 100 കിലോമീറ്റര്‍ താണ്ടാനാണ് പദ്ധതി. ഭഗത്സിങ് ദിനമായ 23നു മാര്‍ച്ച് ഡല്‍ഹിയില്‍ എത്തും.

വ്യാഴാഴ്ച ചേര്‍ന്ന കിസാന്‍സഭ സംസ്ഥാന കമ്മിറ്റിയുടേതാണ് തീരുമാനം. കര്‍ഷകപ്രക്ഷോഭത്തിന് നേതൃത്വം നല്‍കുന്ന സംയുക്ത കിസാന്‍മോര്‍ച്ച മുമ്പാകെ ലോങ്മാര്‍ച്ച് നിര്‍ദേശം കിസാന്‍സഭ വയ്ക്കും. കിസാന്‍മോര്‍ച്ചയുടെ ബാനറില്‍ നടക്കുന്ന ലോങ്മാര്‍ച്ചില്‍ ആയിരത്തോളം സ്ഥിരം ജാഥാംഗങ്ങളുണ്ടാകും. മാര്‍ച്ച് കടന്നുപോകുന്ന ഗ്രാമങ്ങളിലെ കിസാന്‍സഭാ പ്രവര്‍ത്തകരും പങ്കാളികളാകും.

അതേസമയം കര്‍ഷകദ്രോഹ പാര്‍ടിയായ ബിജെപിക്ക് വോട്ടുചെയ്യരുതെന്ന അഭ്യര്‍ഥനയാണ് കര്‍ഷക നേതാക്കള്‍ വോട്ടര്‍മാര്‍ക്ക് മുമ്പാകെ വയ്ക്കുക. ഡല്‍ഹി കേന്ദ്രീകരിച്ച് നൂറുദിവസത്തോളമായി സമരം നടത്തിയിട്ടും കാര്‍ഷിക നിയമങ്ങള്‍ പിന്‍വലിക്കാന്‍ മോഡി സര്‍ക്കാര്‍ വിസമ്മതിക്കുന്നതിന് പിന്നിലെ കോര്‍പറേറ്റ് പ്രീണനം വോട്ടര്‍മാരെ കര്‍ഷകനേതാക്കള്‍ ബോധ്യപ്പെടുത്തും.

പ്രക്ഷോഭത്തെ അടിച്ചമര്‍ത്താനുള്ള കേന്ദ്ര ശ്രമവും തുറന്നുകാട്ടും. തെരഞ്ഞെടുപ്പില്‍ ബിജെപിയെ തോല്‍പ്പിച്ച് കര്‍ഷകസമരത്തിന്റെ കരുത്ത് കേന്ദ്രത്തെ ബോധ്യപ്പെടുത്തും.ബംഗാളില്‍ കര്‍ഷകസംഘടനകളുടെ സമരപരിപാടികളെല്ലാം വിജയമായിരുന്നു. കിസാന്‍ പരേഡിലും റോഡ്- റെയില്‍ ഉപരോധങ്ങളിലും പതിനായിരങ്ങള്‍ പങ്കാളികളായി.

ഗ്രാമീണ മേഖലകളില്‍ ആയിരങ്ങളുടെ റാലികള്‍ സംഘടിപ്പിച്ചു. തെരഞ്ഞെടുപ്പില്‍ ബിജെപിക്കെതിരായി പരസ്യമായ പ്രചാരണത്തിലേക്ക് നീങ്ങാനും കര്‍ഷകസംഘടനകള്‍ അഭ്യര്‍ഥിക്കും. നിലവില്‍ ഭരണകക്ഷിയായ ബിജെപിക്കെതിരെ അസമിലും പ്രചാരണപ്രവര്‍ത്തനങ്ങള്‍ തീവ്രമാക്കും. നിയമസഭാ തെരഞ്ഞെടുപ്പില്‍ പണമൊഴുക്കിയും വര്‍ഗീയത പ്രചരിപ്പിച്ചും നേട്ടമുണ്ടാക്കാനുള്ള ശ്രമത്തിലാണ് ബിജെപി.

ഈ സാഹചര്യത്തിലാണ് അസമും ബംഗാളും കേന്ദ്രീകരിച്ച് പ്രവര്‍ത്തിക്കാന്‍ കര്‍ഷകസംഘടനകള്‍ തീരുമാനിച്ചത്. കേരളത്തിലും തമിഴ്‌നാട്ടിലും ബിജെപിക്ക് കൂടുതല്‍ വോട്ടുനേടാന്‍ സാധ്യതയുള്ള മണ്ഡലങ്ങളിലും കര്‍ഷക നേതാക്കള്‍ ശ്രദ്ധകേന്ദ്രീകരിക്കും.