എല്ലാ പ്രശ്നങ്ങളും പരിഹരിച്ചതായി ഓള് ഇന്ത്യ മോട്ടര് ട്രാന്സ്പോര്ട്ട് അസോസിയേഷന്
കേന്ദ്ര സര്ക്കാര് കൊണ്ടുവന്ന പുതിയ 'ഹിറ്റ് ആന്ഡ് റണ്' നിയമത്തിനെതിരായ പ്രതിഷേധം ഉടന് പിന്വലിക്കുമെന്നും എല്ലാ പ്രശ്നങ്ങളും പരിഹരിച്ചതായും ഓള് ഇന്ത്യ മോട്ടര് ട്രാന്സ്പോര്ട്ട് അസോസിയേഷന് (എഐഎംടിസി) അറിയിച്ചു. എഐഎംടിസി അംഗങ്ങളും കേന്ദ്ര സര്ക്കാരും തമ്മില് നടന്ന ചര്ച്ചയ്ക്കൊടുവിലാണ് തീരുമാനം. എഐഎംടിസിയുമായി പുതിയ നിയമത്തെക്കുറിച്ചു ചര്ച്ച നടന്നതായി ആഭ്യന്തര സെക്രട്ടറി അജയ് ഭല്ല അറിയിച്ചു. ഈ നിയമം ഇതുവരെ നടപ്പാക്കിയിട്ടില്ലെന്നും എഐഎംടിസിയുമായി ചര്ച്ച ചെയ്തതിനുശേഷം മാത്രം നടപ്പാക്കുമെന്നും അജയ് ഭല്ല വ്യക്തമാക്കി.
''ഭാരതീയ ന്യായ സന്ഹിതയ്ക്കു കീഴിലുള്ള വ്യവസ്ഥകള് ചര്ച്ച ചെയ്തു. എല്ലാ പ്രശ്നങ്ങളും പരിഹരിച്ചു. പുതിയ നിയമങ്ങള് ഇതുവരെ നടപ്പിലാക്കിയിട്ടില്ല. എഐഎംടിസിയുമായി കൂടിയാലോചിച്ചതിനുശേഷം മാത്രമേ ഇത് നടപ്പിലാക്കൂ'' - എഐഎംടിസി കോര് കമ്മിറ്റി ചെയര്മാന് മല്കിത് സിങ് ബാല് പറഞ്ഞു. സമരം ഉടന് അവസാനിപ്പിക്കുമെന്നും ഡ്രൈവര്മാരോട് ജോലിയില് പ്രവേശിക്കാന് ആവശ്യപ്പെട്ടിട്ടുണ്ടെന്നും മല്കിത് സിങ് ബാല് അറിയിച്ചു.
ഇന്ത്യന് ശിക്ഷാ നിയമത്തിന് (ഐപിസി) പകരമായി കേന്ദ്രം പാസാക്കിയ ഭാരതീയ ന്യായ് സംഹിതയിലെ വാഹനാപകടത്തെ തുടര്ന്നുള്ള മരണങ്ങളുമായി ബന്ധപ്പെട്ട നിയമമാണ് ട്രക്ക് ഡ്രൈവര്മാരുടെ പ്രതിഷേധത്തിനു കാരണമായത്. ഭാരതീയ ന്യായ സംഹിതയിലെ 104-ാം വകുപ്പ് പ്രകാരം അപകടമരണം സംഭവിച്ചാല് ഡ്രൈവര്ക്ക് ഏഴുവര്ഷം വരെ തടവും പിഴയും ലഭിക്കും. അതുപോലെ, മരണത്തിന് ഇടയാക്കുന്ന അപകടമുണ്ടായാല് വിവരം ഉടന് പൊലീസിനെയോ മജിസ്ട്രേറ്റിനെയോ അറിയിക്കാതെ സ്ഥലത്തുനിന്നു രക്ഷപ്പെട്ടാല് ഡ്രൈവര്ക്ക് 10 വര്ഷം വരെ തടവും പിഴയും ലഭിക്കും. ഐപിസി 304 (എ) വകുപ്പ് പ്രകാരം മരണകാരണമാകുന്ന അപകടമുണ്ടാക്കുന്ന ഡ്രൈവര്ക്ക് രണ്ടു വര്ഷം വരെ തടവോ പിഴയോ രണ്ടും ഒന്നിച്ചോ ആണ് ശിക്ഷ ലഭിച്ചിരുന്നത്.
https://www.facebook.com/Malayalivartha
