കടല്‍ക്കൊള്ളക്കാര്‍ തട്ടിക്കൊണ്ടുപോയ ലൈബീരിയന്‍ പതാകയുള്ള കപ്പല്‍ ഇന്ത്യന്‍ നാവിക സേന രക്ഷപെടുത്തി. സൊമാലിയന്‍ തീരത്ത് തകര്‍ന്ന ചരക്ക് കപ്പലിലെ 15 ഇന്ത്യക്കാര്‍ ഉള്‍പ്പെടെ 21 ജീവനക്കാരെയും ഇന്ത്യന്‍ നാവികസേന രക്ഷപ്പെടുത്തി. എംവി ലീല നോര്‍ഫോക്ക് എന്ന ചരക്ക് കപ്പല്‍ അപകട സൂചന നല്‍കിയതിനെത്തുടര്‍ന്നാണ് നാവികസേനയുടെ യുദ്ധക്കപ്പലായ ഐഎന്‍എസ് ചെന്നൈ രക്ഷാ പ്രവര്‍ത്തനത്തിന് പുറപ്പെട്ടത്. നാവികസേനയുടെ എലൈറ്റ് മറൈന്‍ കമാന്‍ഡോകള്‍ അല്ലെങ്കില്‍ മാര്‍ക്കോസ് കപ്പലില്‍ തിരച്ചില്‍ നടത്തിയെങ്കിലും കടല്‍ക്കൊള്ളക്കാരെ കണ്ടെത്താനായില്ല. എംവി ലീല നോര്‍ഫോക്ക് എന്ന കപ്പല്‍ ബ്രസീലിലെ പോര്‍ട്ട് ഡു അക്കോയില്‍ നിന്ന് ബഹ്റൈനിലെ ഖലീഫ ബിന്‍ സല്‍മാനിലേക്ക് പോകുകയായിരുന്നു. ജനുവരി നാലിന് വൈകുന്നേരം അഞ്ചോ ആറോ അജ്ഞാതരായ സായുധ ഉദ്യോഗസ്ഥര്‍ കപ്പലില്‍ കയറിയെന്ന് വ്യാപാര കപ്പല്‍ യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷന്‍സ് (യുകെഎംടിഒ) പോര്‍ട്ടലിന് സന്ദേശം അയച്ചെന്ന് ഇന്ത്യന്‍ നാവികസേനയുടെ പ്രസ്താവനയില്‍ പറയുന്നു.

ഇന്ത്യന്‍ നാവികസേനയുടെ യുദ്ധക്കപ്പലായ ഐഎന്‍എസ് ചെന്നൈ, മാരിടൈം പട്രോള്‍ എയര്‍ക്രാഫ്റ്റ് പി-8ഐ, ലോംഗ് റേഞ്ച് പ്രിഡേറ്റര്‍ എംക്യു9ബി ഡ്രോണ്‍ എന്നിവ കപ്പലിനെ സഹായിക്കാന്‍ വിന്യസിച്ചിരുന്നു. ഐഎന്‍എസ് ചെന്നൈ അവരുടെ ആന്റി പൈറസി പട്രോളിംഗില്‍ നിന്ന് വഴിതിരിച്ചുവിടുകയും ഉച്ചകഴിഞ്ഞ് 3.15 ന് വടക്കന്‍ അറബിക്കടലില്‍ വച്ച് കപ്പലിനെ തടയുകയും ചെയ്യുകയായിരുന്നു.
വെള്ളിയാഴ്ച രാവിലെ നാവികസേനയുടെ വിമാനം കപ്പലുമായി ബന്ധം സ്ഥാപിച്ചു. തുടര്‍ന്ന് നാവികസേന ചരക്ക് കപ്പലില്‍ രക്ഷാ പ്രവര്‍ത്തനങ്ങള്‍ നടത്തുകയും ജീവനക്കാരെ രക്ഷപ്പെടുത്തുകയും ചെയ്തു.

ഇന്ത്യന്‍ നാവികസേനയുടെ മാരിടൈം പട്രോള്‍ എയര്‍ക്രാഫ്റ്റ് യുദ്ധക്കപ്പല്‍ പിടികൂടുമെന്ന ശക്തമായ മുന്നറിയിപ്പ് നല്‍കിയിരുന്നു. ഇതോടെയാണ് കടല്‍ക്കൊള്ളക്കാര്‍ ഹൈജാക്ക് ചെയ്യാനുള്ള ശ്രമം ഉപേക്ഷിച്ചതെന്ന് നാവികസേന പ്രസ്താവനയില്‍ പറഞ്ഞു.'ഐഎന്‍എസ് ചെന്നൈ എംവിയുടെ സമീപത്താണ്, വൈദ്യുതി ഉല്‍പാദനവും പ്രൊപ്പല്‍ഷനും പുനഃസ്ഥാപിക്കുന്നതിനും അടുത്ത തുറമുഖത്തേക്ക് യാത്ര ആരംഭിക്കുന്നതിനും പിന്തുണ നല്‍കുന്നു.' - പ്രസ്താവന കൂട്ടിച്ചേര്‍ത്തു.

കഴിഞ്ഞ വര്‍ഷം ഡിസംബര്‍ 23 ന് 21 ഇന്ത്യന്‍ ജീവനക്കാരുമായി ലൈബീരിയന്‍ പതാക ഘടിപ്പിച്ച എംവി ചെം പ്ലൂട്ടോ എന്ന കപ്പല്‍ ഇന്ത്യയുടെ പടിഞ്ഞാറന്‍ തീരത്ത് വച്ച് ഡ്രോണ്‍ ആക്രമണത്തിന് ഇരയായിരുന്നു.
എംവി ചെം പ്ലൂട്ടോയെ കൂടാതെ, ഇന്ത്യയിലേക്കുള്ള യാത്രയിലായിരുന്ന മറ്റൊരു വാണിജ്യ എണ്ണ ടാങ്കറും അതേ ദിവസം തെക്കന്‍ ചെങ്കടലില്‍ ഡ്രോണ്‍ ആക്രമണത്തിന് ഇരയായി. 25 ഇന്ത്യന്‍ ജീവനക്കാരുടെ സംഘമാണ് കപ്പലിലുണ്ടായിരുന്നത്.മറ്റൊരു സംഭവത്തില്‍, മാള്‍ട്ടയുടെ പതാക ഘടിപ്പിച്ച കപ്പല്‍ എംവി റുയ്ന്‍ ഡിസംബര്‍ 14 ന് കടല്‍ക്കൊള്ളക്കാര്‍ തട്ടിക്കൊണ്ടുപോയി. അതേസമയം വടക്കന്‍, മധ്യ അറബിക്കടലിലെയും ഏദന്‍ ഉള്‍ക്കടലിലെയും സമുദ്ര സുരക്ഷാ സ്ഥിതിഗതികള്‍ നിരീക്ഷിക്കുന്നത് തുടരുകയാണെന്ന് ഇന്ത്യന്‍ നാവികസേന അറിയിച്ചു.