കാണാതായ പ്രമുഖ പ്രവാസി ബിസിനസുകാരനെ ഭാര്യയും മകനും ചേര്ന്ന് കൊലപ്പെടുത്തി: മനസാക്ഷിയെ ഞെട്ടിച്ച് അരുംകൊല
കൊടുംക്രൂരതകള് അവസാനിക്കുന്നില്ല. അതും സ്വന്തം കുടുംബത്തില് നിന്നു തന്നെ. ദുരൂഹ സാഹചര്യത്തില് കാണാതായ സൗദി അറേബ്യയിലെ പ്രമുഖ പ്രവാസി ബിസിനസുകാരനെ കൊലപ്പെടുത്തിയതാണെന്ന് അന്വേഷണ സംഘം വ്യക്തമാക്കി. സൗദിയില് ബിസിനസുകളുള്ള ഭാസ്ക്കര് ഷെട്ടിയെന്ന 53കാരനാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഷെട്ടിയുടെ ഭാര്യയും മകനും അറസ്റ്റിലായി. ഷെട്ടിയെ കൊലപ്പെടുത്തി മൃതദേഹം കത്തിച്ച് ചാമ്പലാക്കി ചാക്കില് കെട്ടി പുഴയില് ഒഴുക്കിയെന്നാണ് പൊലീസ് വ്യക്തമാക്കിയത്.
പ്രമുഖ പ്രവാസി ബിസിനസുകാരനും ഉഡുപ്പിയിലെ ഹോട്ടല് ദുര്ഗ ഇന്റര്നാഷണലിന്റെ ഉടമയുമാണ് ഭാസ്കര് ഷെട്ടി. കഴിഞ്ഞ ആഴ്ച്ചയാണ് ഭാസ്ക്കര് ഷെട്ടിയെ കാണാനില്ലെന്ന പരാതി ലഭിച്ചത്. ഇതിന്റെ അടിസ്ഥാനത്തില് പൊലീസ് നടത്തിയ അന്വേഷണത്തിലാണ് കൊലപാതകത്തിന് പിന്നില് ഇവര് തന്നെയാണെന്ന് ബോധ്യമായത്. സംഭവവുമായി ബന്ധപ്പെട്ട് ഭാസ്കറിന്റെ ഭാര്യ രാജേശ്വരി, മകനും ബോഡി ബില്ഡറുമായ നവനീത് ഷെട്ടി എന്നിവര് പൊലീസ് കസ്റ്റഡിയിലുണ്ട്. ചോദ്യം ചെയ്യലില് ഇരുവരും കുറ്റം സമ്മതിച്ചു.
ഭാസ്കര് ഷെട്ടി സൗദിയിലേക്ക് പോകാനിരിക്കെയാണ് കൊലപാതകം നടന്നത്. ഹോട്ടല് നടത്തിപ്പിന്റെ ചുമതല രാജേശ്വരിക്കായിരുന്നു. ഹോട്ടലിലെ ചില സാമ്പത്തിക തിരിമറികളെ ചൊല്ലി ദമ്പതികള്ക്കിടയില് അഭിപ്രായ വ്യത്യാസം നിലനിന്നിരുന്നു. ഹോട്ടലുമായി ബന്ധപ്പെട്ട സാമ്പത്തിക ഇടപാടിനെ ചൊല്ലിയായിരുന്നു വഴക്ക്. ഭര്ത്താവിനെ ഹോട്ടല് നടത്തിപ്പില് നിന്ന് അകറ്റി നിര്ത്താനും രാജേശ്വരി നീക്കം തുടങ്ങിയിരുന്നു. ഇതിന്റെ പേരില് ഇവര്ക്കിടയില് അഭിപ്രായ വ്യത്യാസം ശക്തമായി നിലനിന്നിരുന്നു. ഈ തര്ക്ക മൂര്ദ്ധന്യാലവസ്ഥയിലെത്തിയപ്പോഴാണ് ഭര്ത്താവിനെ കൊലപ്പെടുത്താന് രാജേശ്വരി തീരുമാനിച്ചത്.
ജൂലൈ 28 മുതലാണ് ഭാസ്ക്കറിനെ കാണാതായത്. മകനെ കാണാതായത് സംബന്ധിച്ച് ഭാസ്ക്കറിന്റെ മാതാവ് ഗുലാബി ഷെട്ടി മണിപ്പാല് പൊലീസ് സ്റ്റേഷനില് പരാതി നല്കിയിരുന്നു. തുടര്ന്ന് നടത്തിയ അന്വേഷണത്തിലാണ് കൊലപാതകത്തിന്റെ ചുരുളഴിയുന്നത്. നിരഞ്ജന ഭട്ട് എന്ന ക്ഷേത്ര പുരോഹിതന്റെ സഹായത്തോടെയാണ് രാജേശ്വരി കൊല നടത്തിയത്. വീട്ടില് കൊല നടത്തിയ ശേഷം മൃതദേഹം കാര്ക്കാളയിലെ കുഗ്രാമത്തിലെത്തിച്ച് കത്തിച്ച് ചാമ്പലാക്കി ചാക്കില് കെട്ടി പുഴയില് ഒഴുക്കുകയായിരുന്നു. ഇതിനുപയോഗിച്ച ചാക്കുകളും പൊലീസ് കണ്ടെടുത്തിട്ടുണ്ട്.
മലയാളികള് അടക്കമുള്ളവര് ഭാസ്ക്കര് ഷെട്ടിക്ക് കീഴില് ജോലി ചെയ്യുന്നുണ്ട്. കേസുമായി ബന്ധപ്പെട്ട് പൊലീസ് നിരവധി പേരെ കസ്റ്റഡിയിലെടുത്ത് ചോദ്യം ചെയ്തിരുന്നു.
https://www.facebook.com/Malayalivartha
