ചെന്നൈയില്‍ നിന്നാണ് സ്വന്തം ഭാര്യയ്ക്കും കുഞ്ഞുങ്ങള്‍ക്കും നേരെ ആക്രമണമുണ്ടായ വാര്‍ത്ത. കുടുംബ വഴക്കിനെ തുടര്‍ന്നാണ് കാറില്‍ വെച്ച് ഭര്‍ത്താവ് തീകൊളുത്തി ഭാര്യയേയും മക്കളേയും കൊല്ലാന്‍ ശ്രമിച്ചത്. എന്‍ പ്രേമ എന്ന 28 കാരിയാണ് കൊല്ലപ്പെട്ടത്. 

സംഭവത്തില്‍ 30 കാരനായ ഇവരുടെ ഭര്‍ത്താവ് നാഗരാജിനെ പോലീസ് അറസ്റ്റ് ചെയ്തു. ഭാര്യ പ്രേമയോടൊപ്പം മക്കളെയും കൊല്ലാന്‍ ഇയാള്‍ ശ്രമിച്ചെങ്കിലും തീആളി പിടിക്കും മുന്‍പേ കുട്ടികളെ പ്രേമ കാറിന്റെ ജനലിലൂടെ പുറത്തേയ്ക്ക് എറിഞ്ഞ് രക്ഷപ്പെടുത്തി. 

ചെങ്കല്‍പ്പേട്ട് സ്വദേശികളായ ദമ്പതികള്‍ മക്കളുമായ് സെയ്താപേട്ടിലേയ്ക്ക് യാത്ര ചെയ്യുകയായിരുന്നു. പിന്‍സീറ്റില്‍ നാലും രണ്ടും വയസ്സുള്ള മക്കള്‍ തിസാന്ത് രാജിനും യശ്വന്ത് രാജിനും ഒപ്പമായിരുന്നു പ്രേമ ഇരുന്നിരുന്നത്. കാറില്‍ വെച്ച് ഇരുവരും തമ്മില്‍ വഴക്കുണ്ടാക്കി. അടുത്തിരുന്ന പെട്രോള്‍ എടുത്ത് ഭയപ്പെടുത്താനായ് ദേഹത്ത് ഒഴിക്കുകയായിരുന്നു. എന്നാല്‍ കാര്‍ വഴിയില്‍ പാര്‍ക്ക് ചെയ്യ്തശേഷം പുറത്തിറങ്ങിയ നാഗരാജ് മക്കളുടേയും ഭാര്യയുടേയും ദേഹത്തേയ്ക്ക് തീകൊളുത്തി. കാറിന് തീ പിടിക്കുമ്പോള്‍ പ്രേമ മക്കളെ രണ്ടിനെയും എടുത്ത് ജനലിലൂടെ പുറത്തേക്ക് എറിഞ്ഞു. 

റോഡില്‍ പരിക്കേറ്റു കിടന്ന കുട്ടികളെ പിന്നീട് പോലീസാണ് ആശുപത്രിയിലെത്തിച്ചത്. ശരീരം മുഴുവന്‍ പൊള്ളിയ നിലയില്‍ രണ്ടു ദിവസം ചികിത്സയില്‍ കഴിഞ്ഞെങ്കിലും മരിക്കുകയായിരുന്നു. മുന്‍ ഭര്‍ത്താവില്‍ നിന്ന് വിവാഹമോചനം നേടിയ പ്രേമ അഞ്ചു വര്‍ഷം മുന്‍പാണ് നാഗരാജിനെ വിവാഹം ചെയ്യ്തത്. ടാക്‌സി െ്രെഡവറായ നാഗരാജ് ഭാര്യാ സഹോദരിയുടെ ഭര്‍ത്താവിന്റെ ഉടമസ്ഥതയിലുള്ള കാറായിരുന്നു ഓടിച്ചിരുന്നത്. 
പ്രേമയുടെ മാതാവ് അമരാവതിയുടെ പരാതിയില്‍ സെയ്ദാപ്പേട്ട് പോലീസാണ് കേസെടുത്തത്. മക്കളെയും തന്നെയും കാറില്‍ പൂട്ടിയിട്ട് പെട്രോള്‍ ഒഴിച്ച ശേഷം തീപ്പെട്ടി ഉരച്ച് നാഗരാജ് കാറില്‍ ഇടുകയായിരുന്നെന്ന പ്രേമയുടെ മരണമൊഴി പോലീസ് രേഖപ്പെടുത്തിയിരുന്നു.