പാകിസ്ഥാനിലെ സര്ക്കാര് ആശുപത്രിയില് ചാവേറാക്രമണം 70 മരണം, 112 പേര്ക്ക് പരിക്ക്; കൊല്ലപ്പെട്ടവരില് ഭൂരിഭാഗവും അഭിഭാഷകര്
പാകിസ്ഥാനിലെ തെക്കുപടിഞ്ഞാറന് നഗരമായ ക്വെറ്റയില് സര്ക്കാര് ആശുപത്രിയില് താലിബാന് ചാവേറാക്രമണത്തില് 70 പേര് കൊല്ലപ്പെട്ടു. 112 പേര്ക്ക് പരിക്കേറ്റു. കൊല്ലപ്പെട്ടവരില് ഭൂരിപക്ഷവും അഭിഭാഷകരാണ്. രണ്ട് മാധ്യമപ്രവര്ത്തകരും കൊല്ലപ്പെട്ടു. പരിക്കേറ്റ പലരുടെയും നില ഗുരുതരമാണെന്നും മരണസംഖ്യ ഉയര്ന്നേക്കുമെന്നും ആരോഗ്യവകുപ്പ് ഉദ്യോഗസ്ഥര് പറഞ്ഞു. പാക് താലിബാന്റെ ശാഖയായ ജമാഅത്തുല് അഹാര ആക്രമണത്തിന്റെ ഉത്തരവാദിത്തമേറ്റു.
വെടിയേറ്റ് മരിച്ച പ്രമുഖ അഭിഭാഷകന് ബിലാല് അന്വര് കാസിയുടെ മൃതദേഹം ഏറ്റുവാങ്ങാനായി എത്തിയവരാണ് ആക്രമിക്കപ്പെട്ടത്. ഇരുനൂറോളം അഭിഭാഷകര് എത്തിയിരുന്നു. ബലൂചിസ്ഥാന് ബാര് അസോസിയേഷന് പ്രസിഡന്റായ കാസിയുടെ മൃതദേഹം പോസ്റ്റ്മോര്ട്ടം ചെയ്യാനായി എത്തിച്ച എമര്ജന്സി ഡിപ്പാര്ട്മെന്റിലാണ് വന് സ്ഫോടനമുണ്ടായത്. വാഹനങ്ങള് മുഴുവന് നശിച്ചു. പ്രവിശ്യാ സര്ക്കാര് മൂന്നുദിവസത്തെ ദുഃഖാചരണം പ്രഖ്യാപിച്ചു.
കാസിയുടെ അനുയായികളെ ലക്ഷ്യമിട്ടായിരുന്നു ആക്രമണമെന്ന് ബലൂചിസ്ഥാന് പ്രവിശ്യാ സര്ക്കാര് വക്താവ് അന്വര് ഉള് ഹഖ് പറഞ്ഞു. രാവിലെ ജോലിസ്ഥലത്തേക്ക് വരവെയാണ് കാസി ആക്രമിക്കപ്പെട്ടത്. അജ്ഞാതരായ രണ്ടുപേര് ക്വെറ്റയിലെ മെംഗള് ചൂക്കില്വച്ച് അദ്ദേഹത്തിനുനേരെ വെടിയുതിര്ക്കുകയായിരുന്നു. ആക്രമണത്തിന്റെ ഉത്തരവാദിത്തം ആരും ഏറ്റിട്ടില്ല.
കുറ്റവാളികളെ അറസ്റ്റ്ചെയ്യാന് പ്രവിശ്യാ സര്ക്കാരിനോട് പ്രധാനമന്ത്രി നവാസ് ഷെരീഫ് നിര്ദേശിച്ചു. ക്വെറ്റയുടെ സമാധാനാന്തരീക്ഷം തകര്ക്കാന് ആരെയും അനുവദിക്കില്ലെന്ന് സംഭവസ്ഥലം സന്ദര്ശിച്ച ഷെരീഫ് പറഞ്ഞു. പാക് സൈനികമേധാവി റഹീല് ഷെരീഫിന്റെ അധ്യക്ഷതയില് ക്വെറ്റയില് സുരക്ഷായോഗം ചേര്ന്നു. ഭീകരരെ അമര്ച്ചചെയ്യാന് എല്ലാ നടപടിയും സ്വീകരിക്കുമെന്ന് സൈനികമേധാവി പറഞ്ഞു.
കഴിഞ്ഞ ഈസ്റ്റര് ദിനത്തില് ലാഹോറിലെ പാര്ക്കില് നടന്ന ആക്രമണത്തില് 75 പേര് കൊല്ലപ്പെട്ടിരുന്നു. ഇറാന്-അഫ്ഗാന് അതിര്ത്തിയോട് ചേര്ന്ന ക്വെറ്റ അഫ്ഗാന് താലിബാന്റെയും താവളമാണ്. കഴിഞ്ഞ മെയില് പാക്-ഇറാന് അതിര്ത്തിയില്നിന്ന് ക്വെറ്റയിലേക്ക് വരുമ്പോഴാണ് അഫ്ഗാന് താലിബാന് തലവന് മുല്ല അക്തര് മന്സൂര് അമേരിക്കന് വ്യോമാക്രമണത്തില് കൊല്ലപ്പെട്ടത്.
https://www.facebook.com/Malayalivartha