കാശ്മീരില് തീവ്രവാദികളുമായുള്ള ഏറ്റുമുട്ടലില് മൂന്നു ബിഎസ്എഫുകാര് കൊല്ലപ്പെട്ടു
വടക്കന് കാശ്മീരിലെ അതിര്ത്തിപ്രദേശമായ മച്ചിലില് തീവ്രവാദികളുമായുണ്ടായ ഏറ്റുമുട്ടലില് ഒരു ഓഫീസര് ഉള്പ്പെടെ മൂന്നു ബിഎസ്എഫുകാര് കൊല്ലപ്പെട്ടു. നിയന്ത്രണരേഖയുടെ സമീപപ്രദേശമായ മച്ചിലില് തീവ്രവാദികള് നുഴഞ്ഞുകയറിയതായി വിവരം ലഭിച്ചതിനെത്തുടര്ന്ന് ബിഎസ്എഫും സൈനികരും സംയുക്തമായി നടത്തിയ തെരച്ചിലിനിടെയാണ് ഏറ്റുമുട്ടലുണ്ടായത്. ഒളിഞ്ഞിരുന്ന ഭീകരര് വെടിയുതിര്ക്കുകയായിരുന്നു. ശക്തമായി തിരിച്ചടിച്ച സേന ഒരു തീവ്രവാദിയെ വെടിവച്ചു കൊന്നു.
ഏറ്റുമുട്ടലില് മൂന്നു ബിഎസ്എഫ് ജവാന്മാര്ക്കും രണ്ടു സൈനികര്ക്കും പരിക്കേറ്റു. ഇതില് ഒരാളുടെ നില ഗുരുതരമാണെന്നു സൈനിക വൃത്തങ്ങള് അറിയിച്ചു.
ജമ്മു കാശ്മീരില് തുടര്ച്ചയായ 31-ാം ദിവസവും കര്ഫ്യൂ തുടരുന്നു. കര്ഫ്യൂ തുടരുന്നതിനിടെയും പ്രക്ഷോഭകരും സുരക്ഷാ സേനയും തമ്മില് ഏറ്റുമുട്ടല് നടക്കുന്ന പശ്ചാത്തലത്തില് മുഖ്യമന്ത്രി മെഹബൂബ മുഫ്തി പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയേക്കും. ഇന്നലെ ഡല്ഹിയിലെത്തിയ മെഹബൂബ കേന്ദ്ര ആഭ്യന്തരമന്ത്രി രാജ്നാഥ് സിംഗുമായി ചര്ച്ച നടത്തി. രാജ്നാഥ് സിംഗ്, ദേശീയ സുരക്ഷാ ഉപദേഷ്ടാവ് അജിത് ഡോവല് തുടങ്ങിയവരുമായി ഇന്നലെ മോദി കാശ്മീര് വിഷയം ചര്ച്ച ചെയ്തിരുന്നു.
കര്ഫ്യൂവിനു പിന്നാലെ വിഘടനവാദികള് ആഹ്വാനം ചെയ്ത സമരംകൂടി ആയതോടെ കാശ്മീരില് സാധാരണജീവിതം താറുമാറായി. സുരക്ഷാ സേനയുടെ വെടിയേറ്റ് ചികിത്സയിലായിരുന്ന പ്രതിഷേധക്കാരില് ഒരാള് ഇന്നലെ മരിച്ചതിനെത്തുടര്ന്നാണു വിഘടനവാദികള് സമരത്തിന് ആഹ്വാനം ചെയ്തത്. ഷോപ്പിയനില് വെള്ളിയാഴ്ച നടന്ന വെടിവയ്പില് പരിക്കേറ്റ അമിര് ബഫിര് എന്ന യുവാവാണ് ഇന്നലെ മരണത്തിനു കീഴടങ്ങിയത്.
ഹിസ്ബുള് മുജാഹിന് കമാന്ഡര് ബുര്ഹാന് വാനി ജൂലൈ എട്ടിനു വധിക്കപ്പെട്ടതിനുപിന്നാലെ കാശ്മീരില് പൊട്ടിപ്പുറപ്പെട്ട പ്രക്ഷോഭത്തിലും ഏറ്റുമുട്ടലുകളിലും കൊല്ലപ്പെട്ടവരുടെ എണ്ണം ഇതോടെ 57 ആയി. 4,000ത്തില് അധികം ആളുകള്ക്ക് പരിക്കേറ്റതായാണ് വിവരം. അക്രമങ്ങള് അരങ്ങേറുന്ന പശ്ചാത്തലത്തില് കൂടതല് പ്രദേശങ്ങളിലേക്ക് കര്ഫ്യൂ വ്യാപിപ്പിച്ചു. വിവിധ പ്രദേശങ്ങളില് സുരക്ഷാസേന റോഡുകള് അടച്ചിട്ടിരിക്കുകയാണ്.
https://www.facebook.com/Malayalivartha