കൂടംകുളം ആണവനിലയത്തിന്റെ ആദ്യ ഊര്‍ജോല്‍പ്പാദന യൂണിറ്റ് പ്രധാനമന്ത്രി നരേന്ദ്രമോദിയും റഷ്യന്‍ പ്രസിഡന്റ് വ്‌ലാദിമിര്‍ പുടിനും ചേര്‍ന്ന് രാജ്യത്തിന് സമര്‍പ്പിച്ചു. ഹരിതോര്‍ജം ഉത്പാദിപ്പിക്കാന്‍ ഇന്ത്യ പ്രതിജ്ഞാബദ്ധമാണെന്നും ആണവനിലയം സുരക്ഷിതമാണെന്നും പ്രധാനമന്ത്രി നരേന്ദ്രമോദി വ്യക്തമാക്കി. 1000 മെഗാവാട്ട് വൈദ്യുതി ഉല്‍പാദിപ്പിക്കാന്‍ ശേഷിയുള്ള യൂണിറ്റില്‍ നിന്ന് തമിഴ്‌നാടിന് പുറമേ കേരളത്തിനും കര്‍ണാടകത്തിനും പുതുച്ചേരിയ്ക്കും വൈദ്യുതി ലഭിയ്ക്കും.
2012 ഒക്ടോബറില്‍ റഷ്യന്‍ സഹായത്തോടെ പണി പൂര്‍ത്തിയായ കൂടംകുളത്തെ ആദ്യ ഊര്‍ജോത്പാദനയൂണിറ്റ് യൂണിറ്റ് പൂര്‍ണ പ്രവര്‍ത്തനസജ്ജമാക്കിയത് 2013ല്‍. 2014 ഏപ്രിലോടെ ആദ്യയൂണിറ്റില്‍ നിന്ന് വാണിജ്യാടിസ്ഥാനത്തില്‍ വൈദ്യുതി ഉത്പാദിപ്പിച്ച് തുടങ്ങി.
ഒരു മാസത്തിനുള്ളില്‍ പൈപ്പ് പൊട്ടിത്തെറിച്ച് ആറ് തൊഴിലാളികള്‍ക്ക് പൊള്ളലേറ്റതിനെത്തുടര്‍ന്ന് പ്രവര്‍ത്തനം നിര്‍ത്തി. പിന്നീട് തുടര്‍ച്ചയായി സാങ്കേതികത്തകരാറുകളുണ്ടായതിനെത്തുടര്‍ന്ന് അറ്റകുറ്റപ്പണികള്‍ക്കായി ഏഴ്മാസം അടച്ചിട്ട യൂണിറ്റ് ഈ വര്‍ഷം ജനുവരിയിലാണ് വീണ്ടും പ്രവര്‍ത്തനം തുടങ്ങിയത്.
സുരക്ഷയെക്കുറിച്ച് ആശങ്കകളുയരുന്നതിനിടെയാണ് കൂടംകുളത്തെ ആദ്യയൂണിറ്റ് രാജ്യത്തിന് സമര്‍പ്പിയ്ക്കുന്നത്. ആണവനിലയം ഇന്ത്യയുടെയും റഷ്യയുടെയും സൗഹൃദത്തിന്റെ പ്രതീകമാണെന്ന് റഷ്യന്‍ പ്രസിഡന്റ് വ്‌ലാദിമിര്‍ പുചിന്‍ പറഞ്ഞു. കൂടംകുളത്തെ ജനങ്ങളുടെ സുരക്ഷ കൂടി കണക്കിലെടുത്ത് പ്രവര്‍ത്തിയ്ക്കണമെന്ന് വീഡിയോ കോണ്‍ഫറന്‍സിംഗ് വഴി നടന്ന ചടങ്ങില്‍ മുഖ്യമന്ത്രി ജയലളിത ആവശ്യപ്പെട്ടു.
ആണവനിലയം അടച്ചുപൂട്ടുന്നത് വരെ സമരം തുടരുമെന്ന് ആണവവിരുദ്ധസമരസമിതി നേതാവ് എസ് പി ഉദയകുമാര്‍ പറഞ്ഞു.