എന്‍ജിനീയറിങ് കോളേജിലെ മലയാളി വിദ്യാര്‍ത്ഥികളുടെ വിളയാട്ടം, വീട്ടില്‍ അതിക്രമിച്ചു കയറി സഹപാഠികളെ കുത്തിപ്പരിക്കേല്‍പ്പിച്ചു
കേരളത്തിനു പുറത്തു കടന്നാല്‍ മലയാളി വിദ്യാര്‍ത്ഥികളുടെ ക്രൂരത സ്വന്തം നാട്ടുകാരോട് തന്നെ. നേരത്തെ മലയാളികളായ വിദ്യാര്‍ത്ഥിനികള്‍ ചേര്‍ന്ന് പെണ്‍കുട്ടിയെ ബാത്ത്‌റൂം ക്‌ളീനിംഗിനുപയോഗിക്കുന്ന ലോഷന്‍ കുടിപ്പിച്ച കേസ് റിപ്പോര്‍ട്ട് ചെയ്തതിനു പിന്നാലെയാണ് പുതിയ വാര്‍ത്ത വന്നിരിക്കുന്നത്.
കോയമ്പത്തൂരിലെ സൂലൂരിലെ സ്വകാര്യ എന്‍ജിനീയറിംഗ് കോളജിലെ മലയാളി വിദ്യാര്‍ഥികള്‍ തമ്മില്‍ ഏറ്റുമുട്ടി മലയാളികളായ മൂന്ന് വിദ്യാര്‍ത്ഥികള്‍ക്ക് കുത്തേറ്റു. നാലാം വര്‍ഷ മെക്കാനിക്കല്‍ എന്‍ജിനീയറിംഗ് വിദ്യാര്‍ഥികളായ കൊല്ലം സ്വദേശി സുജിത് (25), തൃശൂര്‍ സ്വദേശി കിഷാന്‍ (24), മലപ്പുറം സ്വദേശി വിവേക് (24) എന്നിവര്‍ക്കാണ് കുത്തേറ്റത്. കുത്തേറ്റവരുടെ പരാതിയില്‍ മുഹമ്മദ് നാസിക്കുള്‍പ്പെടെ നാലുപേരെ സൂലൂര്‍ പൊലീസ് അറസ്റ്റ് ചെയ്തു.
നാലാം വര്‍ഷ മെക്കാനിക്കല്‍ എന്‍ജിനീയറിംഗ് വിദ്യാര്‍ഥിയായ തൃശൂര്‍ സ്വദേശി മുഹമ്മദ് നാസിക്കിനെ (24) ഈയിടെ കോളജില്‍നിന്ന് സസ്പെന്‍ഡ് ചെയ്തിരുന്നു. അതിന് പിന്നില്‍ സുജിത്തും കൂട്ടുകാരുമാണെന്ന് ആരോപിച്ച് നാസിക് ഇവരുമായി വഴക്കിട്ടിരുന്നു. തിങ്കളാഴ്ച രാത്രി നാസിക്ക്, സുഹൃത്തുക്കളായ രാഹുല്‍, അരുണ്‍, ദഹല്‍രാജ് എന്നിവര്‍ക്കൊപ്പം രംഗനാഥപുരത്തെ വീട്ടില്‍ അതിക്രമിച്ചുകയറി സുജിത്തിനെയും കൂട്ടുകാരെയും ആക്രമിക്കുകയും കുത്തിപ്പരിക്കേല്‍പ്പിക്കുകയും ചെയ്യുകയായിരുന്നു.
https://www.facebook.com/Malayalivartha
