സ്വാതന്ത്ര്യദിനത്തോടനുബന്ധിച്ച് രാജ്യത്ത് ദേശീയ സ്മാരകങ്ങള്‍ക്കു മുന്നില്‍ നാളെ മുതല്‍ 18 വരെ സെല്‍ഫി ചിത്രങ്ങളെടുക്കുന്നതിന് നിരോധനം ഏര്‍പ്പെടുത്തി. ദേശീയ ടൂറിസം മിനിസ്ട്രിയാണ് സെല്‍ഫി നിര്‍ദേശിച്ചുകൊണ്ടുള്ള ഉത്തരവ് സംസ്ഥാനങ്ങള്‍ക്ക് നല്‍കിയത്. സുരക്ഷാ സംവിധാനത്തിന്റെ ഭാഗമായാണ് സെല്‍ഫിക്ക് വിലക്ക്.
സ്വാതന്ത്ര്യദിനാഘോഷ പരിപാടികള്‍ വീക്ഷിക്കുന്നതിനും ഭാരതോല്‍സവത്തില്‍ പങ്കാളികളാകാനും ജനങ്ങള്‍ക്ക് സൗകര്യമൊരുക്കുന്നതിനും സുരക്ഷ ഏര്‍പ്പെടുത്തുന്നതിനും നിര്‍ദേശിച്ചിട്ടുണ്ട്. ഭീകരാക്രമണ സാധ്യതയുണ്ടാകുമെന്നുള്ള സുരക്ഷാ ഏജന്‍സിയുടെ മുന്നറിയിപ്പിനെ തുടര്‍ന്നാണ് സുരക്ഷ ശക്തമാക്കാന്‍ ആവശ്യപ്പെട്ടതെന്നാണ് റിപ്പോര്‍ട്ട്.
രാജ്യത്തെ വിനോദ സഞ്ചാര കേന്ദ്രങ്ങളില്‍ സെല്‍ഫി അപകടങ്ങള്‍ പെരുകുന്ന പശ്ചാത്തലത്തില്‍ അപകട സാധ്യതയുള്ള മേഖലകള്‍ അടയാളപ്പെടുത്തുന്നതിന് സംസ്ഥാനങ്ങളോട് കേന്ദ്രം ആവശ്യപ്പെട്ടിട്ടുണ്ട്. സെല്‍ഫി അപകട മേഖല എന്ന് കൃത്യമായി രേഖപ്പെടുത്താനും ആവശ്യപ്പെട്ടിട്ടുണ്ട്. കഴിഞ്ഞ സെപ്റ്റംബറില്‍ താജ്മഹലിലെ പടികളില്‍ നിന്ന് സെല്‍ഫി എടുക്കുന്നതിനിടെ വീണ് ജാപ്പനീസ് പൗരന്‍ മരിച്ചതായി റിപ്പോര്‍ട്ടുണ്ടായിരുന്നു. മാര്‍ച്ചില്‍ നാഗ്പൂരില്‍ ബോട്ട് യാത്രയ്ക്കിടെ വിദ്യാര്‍ഥികള്‍ സെല്‍ഫിയെടുക്കുന്നതിനായി ബോട്ടിന്റെ ഒരു വശത്തേയ്ക്ക് നിന്നതോടെ ബോട്ട് മറിഞ്ഞ് അപകടമുണ്ടായിരുന്നു.