മൂന്ന് വര്ഷത്തിനിടയില് സാക്കിര് നായിക്കിന് വിദേശത്ത് നിന്ന് കിട്ടിയത് 60 കോടി'; അക്കൗണ്ടുകള് കുടുംബാഗങ്ങളുടെ പേരില്: മുംബൈ പൊലീസ്
വിദേശത്തുനിന്നും ഒഴുകുന്ന കോടികള് കണ്ട് ഞെട്ടി മുബൈ പോലീസ്. ഇസ്ലാമിക് മതപ്രഭാഷകന് സാക്കിര് നായിക്കിന് കഴിഞ്ഞ മൂന്ന് വര്ഷത്തിനിടയില് വിദേശത്ത് നിന്ന് ലഭിച്ചത് 60 കോടി രൂപയെന്ന് മൂംബൈ പൊലീസ്. മൂന്ന് രാജ്യങ്ങളില് നിന്നാണ് സാക്കിര് നായിക്കിന്റെ അക്കൗണ്ടുകളിലേക്ക് പണം ട്രാന്സ്ഫര് ചെയ്തിട്ടുള്ളത്. സാക്കിര് നായിക്കിന്റേയും അടുത്ത ബന്ധുക്കളുടേയും അഞ്ച് ബാങ്ക് അക്കൗണ്ടുകളിലേക്കാണ് പണം നിക്ഷേപിച്ചിരിക്കുന്നതെന്നും മുംബൈ പൊലീസ് അന്വേഷണത്തില് കണ്ടെത്തി. എന്ത് ആവശ്യത്തിനാണ് ഇത്രയധികം പണ ഇടപാടുകള് നടന്നതെന്ന് കണ്ടെത്തേണ്ടിയിരിക്കുന്നുവെന്നും പൊലീസ് വ്യക്തമാക്കുന്നു. സാക്കിര് നായിക്കിന്റെ സന്നദ്ധ സംഘടന അക്കൗണ്ടിലേക്കല്ല പണം കൈമാറ്റം ചെയ്തിരിക്കുന്നത്. ഇതും സംശയത്തിന് ഇടനല്കുന്നു.
അന്വേഷണ ഉദ്യോഗസ്ഥരുടെ സംഭവത്തെ കുറിച്ച് പറയുന്നതിങ്ങനെ.
എല്ലാ ബാങ്ക് ഇടപാടുകളെ കുറിച്ചും വ്യക്തമായ വിവരം ലഭിച്ചിട്ടുണ്ട്. എന്തിന്റെ പേരിലാണ് 60 കോടി രൂപയുടെ കൈമാറ്റം നടന്നതെന്ന് വ്യക്തമല്ല. അന്വേഷണത്തില് സാക്കിര് നായിക്കിന്റെ അഞ്ച് ബന്ധുക്കളുടെ അക്കൗണ്ടുകളിലേക്കാണ് പണമെത്തിയതെന്ന് കണ്ടെത്തി. ഇസ്ലാമിക് റസര്ച്ച് ഫൗണ്ടേഷനെന്ന നായിക്കിന്റെ എന്ജിഒ അക്കൗണ്ടിലേക്കല്ല പണം വന്നു ചേര്ന്നിരിക്കുന്നത്. സ്വകാര്യ ബാങ്ക് അക്കൗണ്ടിലേക്കാണ്.
മുംബൈ പൊലീസ്
നായിക്കിന്റേയും ഇസ്ലാമിക് റസര്ച്ച് ഫൗണ്ടേഷന്റേയും അക്കൗണ്ടിലെ പണമിടപാടുകളെ കുറിച്ച് മുബൈ പൊലീസ് വിശദമായ അന്വേഷണം തുടരുകയാണ്. ഇതിന്റെ ഭാഗമായി ഐആര്എഫിന്റെ ജീവനക്കാരേയും ചോദ്യം ചെയ്യാനാണ് തീരുമാനിച്ചിരിക്കുന്നത്. വിദേശ ഫണ്ട് സ്വീകരണ നിയന്ത്രണ ആക്ട് പ്രകാരം സാക്കിര് നായിക്കിന്റെ രണ്ട് സംഘടനകളായ ഐആര്എഫ്, ഇസ്ലാമിക് റിസര്ച്ച് ഫൗണ്ടേഷന് എജ്യുക്കേഷണല് ട്രസ്റ്റ് എന്നിവയ്ക്കെതിരെ നടപടിയെടുക്കുന്നതിനെ കുറിച്ചും ആലോചനയുണ്ട്.
നായിക്കിന്റെ രണ്ട് ട്രസ്റ്റുകളുംരജിസ്റ്റര് ചെയ്തിരിക്കുന്നത് വിദ്യാഭ്യാസ എന്ജിഒ ഗണത്തിലാണ്. എഫ്സിആര്എ ആക്ട് ലംഘിച്ചിട്ടുണ്ടോയെന്ന് കേന്ദ്ര ആഭ്യന്തര മന്ത്രാലയം പരിശോധിക്കുന്നുണ്ട്. വിദ്യാഭ്യാസ മേഖലയിലാണ് ഇവ രജിസ്റ്റര് ചെയ്തിട്ടുള്ളതെങ്കിലും വിദേശ ഫണ്ടുകള് മതവുമായി ബന്ധപ്പെട്ട പ്രവര്ത്തനങ്ങള്ക്ക് ഉപയോഗിച്ചതായും കണ്ടെത്തിയിട്ടുണ്ട്.
ഇസ്ലാമിക് റിസര്ച്ച് ഫൗണ്ടേഷനിലേക്കെത്തിയ വിദേശ ഫണ്ടിന്റെ ഇടപാടുകള് കൃത്യമായി രകേഖപ്പെടുത്തിയിട്ടുണ്ടെന്നും 2015 വരെയുള്ള ഇങ്കം ടാക്സ് പരിശോധനയില് തെറ്റുകളെന്നും കണ്ടെത്തിയിട്ടില്ലെന്നും സാക്കിര് നായിക്കിന്റെ അടുത്ത വൃത്തങ്ങള് പറയുന്നു. ഐആര്എഫ് ഫണ്ടുകളെല്ലാം കൃത്യമായി രേഖപ്പെടുത്തിയിട്ടുണ്ടെന്നും ഇവര് പറയുന്നു.
നായിക്കിന്റെ നേതൃത്വത്തിലുള്ള അന്താരാഷ്ട്ര സ്കൂളിന്റെ അക്കൗണ്ടുകളും പരിശോധനക്ക് വിധേയമാക്കിയിട്ടുണ്ട്. മുംബൈ പൊലീസ് അന്വേഷണ റിപ്പോര്ട്ട് കമ്മീഷര് ഡി.ഡി പഡ്സാല്ഗികറിന് സമര്പ്പിച്ചിട്ടുണ്ട്. മതവിദ്വേഷം വളര്ത്തുന്നുവെന്ന ആരോപണത്തില് നായിക്കിനെതിരെ നടപടിയെടുക്കാനും മഹാരാഷ്ട്ര സര്ക്കാര് ആലോചിക്കുന്നുണ്ട്.
കഴിഞ്ഞ മാസം കേരള പൊലീസ് നിര്ബന്ധിത മതം മാറ്റത്തിന്റെ പേരില് കേസ് രജിസ്റ്റര് ചെയ്ത് അറസ്റ്റ് ചെയ്ത അര്ഷി ഖുറേഷിക്ക് നായിക്കുമായി ബന്ധമുള്ളതായി തെളിഞ്ഞിരുന്നു. ഐആര്എഫിന്റെ മുന് പ്രവര്ത്തകനായിരുന്നു ഇയാള്. അഷ്ഫക് അബ്ദുള് മജീദെന്ന 22 വയസുകാരനായ മലയാളിയെ ഐഎസില് ചേരാന് പ്രേരിപ്പിച്ചുവെന്ന കുറ്റത്തിന് മുംബൈ പൊലീസും അര്ഷി ഖുറേഷിക്കതിരെ കേസ് ഫയല് ചെയ്തിരുന്നു.
https://www.facebook.com/Malayalivartha