റായ്ഗഡ് ജില്ലയിലെ മഹാഡിനടുത്ത് മുംബൈഗോവ ദേശീയപാതയില്‍ സാവിത്രി നദിക്കു കുറുകെയുള്ള പാലം തകര്‍ന്ന് കാണാതായ ബസുകളുടെ ഭാഗങ്ങള്‍ കണ്ടെടുത്തു. എട്ട് ദിവസങ്ങള്‍ നീണ്ടു നിന്ന തെരച്ചിലുകള്‍ക്കൊടുവിലാണ് പാലത്തിന് 170200 മീറ്ററുകള്‍ക്കകലെ നിന്ന് ബസിന്റെ ഭാഗങ്ങള്‍ കണ്ടെടുത്തത്. ചെളിയില്‍ പൂണ്ട നിലയിലായിരുന്നു അവശിഷ്ടങ്ങള്‍.
എട്ട് ദിവസങ്ങളായി മഹാഡ് മേഖലയില്‍ നേവി രക്ഷാ പ്രവര്‍ത്തനങ്ങളില്‍ ഏര്‍പ്പെട്ടിരിക്കുകയാണ്. ക്രെയിന്‍ ഉപയോഗിച്ച് ബസിന്റെ ഭാഗങ്ങള്‍ പൊക്കിയെടുക്കുന്നതിനുള്ള ദുരന്ത നിവാരണസേനയുടെ പ്രവര്‍ത്തനങ്ങള്‍ പുരോഗമിച്ച് വരികയാണ്. മുതലകളുടെ സാന്നിധ്യവും നദിയിലെ ശക്തമായ കുത്തിയൊഴുക്കും രക്ഷാപ്രവര്‍ത്തനങ്ങള്‍ ദുഷ്‌കരമാക്കിയിട്ടുണ്ട്. ശക്തമായ ഒഴുക്കിലും രക്ഷാപ്രവര്‍ത്തനം നടത്താന്‍ കഴിയുന്ന ഡൈവിങ് വിദഗ്ധരെ അടക്കം നിയോഗിച്ചാണ് ഇവിടെ പ്രവര്‍ത്തനം നടന്നുകൊണ്ടിരിക്കുന്നത്.
കനത്ത മഴയെ തുടര്‍ന്നുണ്ടായ പ്രളയത്തില്‍ ആഗസ്റ്റ് രണ്ടിന് രാത്രി 11.30നാണ് 88 വര്‍ഷം പഴക്കമുള്ള പാലം തകര്‍ന്നത്. പാലത്തിന്റെ തൂണുകളില്‍ ഒന്ന് ഇടിഞ്ഞുവീഴുകയായിരുന്നു. 18 യാത്രക്കാരും നാല് ജീവനക്കാരും ഉണ്ടായിരുന്ന രണ്ട് മഹാരാഷ്ട്ര ട്രാന്‍സ്‌പോര്‍ട്ട് ബസുകളും 10 യാത്രക്കാരുള്ള ടവേരയുമാണ് കാണാതായത്. ഇവയെ കൂടാതെ മൂന്നോളം മറ്റ് വാഹനങ്ങളും അപകടത്തില്‍പ്പെട്ടതായി സംശയിക്കുന്നു. നിരവധി മൃതദേഹങ്ങള്‍ രക്ഷാപ്രവര്‍ത്തകര്‍ നദിയില്‍ നിന്ന് കണ്ടെടുത്തിരുന്നു.