കേണല് നിരഞ്ജന്റെ ബംഗളൂരുവിലെ വീട് പൊളിക്കാന് നീക്കം
പത്താന്കോട്ട് ഭീകരാക്രമണത്തിനിടെ കൊല്ലപ്പെട്ട മലയാളി കേണല് വി.കെ. നിരഞ്ജന്റെ വീടിന്റെ ഒരുഭാഗം കനാല് കൈയേറ്റം ഒഴിപ്പിക്കുന്നതിന്റെ ഭാഗമായി പൊളിച്ചുമാറ്റാന് നീക്കം. നിരഞ്ജന് താമസിച്ചിരുന്ന ദൊഡ്ഡബൊമ്മസാന്ദ്രയിലുള്ള വീടിന്റെ ഒരു വശമാണ് പൊളിച്ചുനീക്കാന് കോര്പ്പറേഷന് അധികൃതര് ആവശ്യപ്പെട്ടിരിക്കുന്നത്. ഈ ഭാഗം ബി.ബി.എം.പി. ഉദ്യോഗസ്ഥര് അടയാളപ്പെടുത്തിയിട്ടുണ്ട്. വീടിന്റെ പ്രധാനതൂണും നിരഞ്ജന് താമസിക്കുന്നതിനായി മുകളിലേക്ക് നിര്മിച്ചഭാഗവും ഇതില് ഉള്പ്പെടും. കോര്പറേഷന് തയാറാക്കിയിരിക്കുന്ന 1,100 വീടുകളുടെ പട്ടികയിലാണു നിരഞ്ജന്റെ വീടും ഉള്പ്പെട്ടിരിക്കുന്നത്.
ബൃഹത്ത് ബംഗളൂരു മഹാനഗരപാലികയുടെ കയ്യേറ്റമൊഴിപ്പിക്കലിന്റെ ഭാഗമായാണ് എലഹളളി, ബൊമ്മനഹള്ളി എന്നിവിടങ്ങളിലെ അനധികൃത നിര്മാണങ്ങള് പൊളിച്ചുനീക്കുന്നത്. മഴച്ചാലുകള് കയ്യേറി നിര്മിച്ച കെട്ടിടങ്ങളാണു പൊളിച്ചുനീക്കുന്നത്. വിദ്യാരണ്യപുര ദൊഡ്ഡബൊമ്മസന്ദ്രയിലുള്ള നിരഞ്ജന്റെ വീടിന്റെ മുന്ഭാഗം ഭൂമികയ്യേറി നിര്മിച്ചതാണെന്നു കാണിച്ചു നഗരപാലിക നോട്ടിസ് നല്കി. ഇന്നലെ രാവിലെ ഇടിച്ചുനിരത്തലിനുള്ള ഒരുക്കവുമായി ഉദ്യോഗസ്ഥര് എത്തി.
എന്നാല് ഈ തൂണ് ജെ.സി.ബി. ഉപയോഗിച്ച് പൊളിച്ചാല് വീടിനു മുഴുവനായി നാശം സംഭവിക്കും. അതിനാല് ബദല്നടപടികള് സ്വീകരിച്ച ശേഷം സ്വന്തമായി പൊളിക്കാമെന്ന് നിരഞ്ജന്റെ കുടുംബാംഗങ്ങള് അധികൃതരെ അറിയിച്ചിട്ടുണ്ട്. ഇതിനു കുറച്ചുദിവസംകൂടി സമയം നല്കണമെന്നും ഇവര് ആവശ്യപ്പെട്ടിട്ടുണ്ട്. കഴിഞ്ഞ ദിവസം കനത്ത മഴയെത്തുടര്ന്നുണ്ടായ വെള്ളപ്പൊക്കത്തില് നിരവധി പ്രദേശങ്ങള് വെള്ളത്തിനടിയിലായതോടെയാണ് മുഖ്യമന്ത്രി അടിയന്തര കയ്യേറ്റമൊഴിപ്പിക്കലിനു നിര്ദേശം നല്കിയത്.
പാലക്കാട് സ്വദേശികളായ നിരഞ്ജന്റെ കുടുംബം വര്ഷങ്ങളായി ബംഗളൂരുവിലാണ് താമസം. ഭാരത് ഇലക്ട്രോണിക്സ് ലിമിറ്റഡിലെ മുന് ജീവനക്കാരനായിരുന്ന നിരഞ്ജന്റെ പിതാവ് ശിവരാജനാണ് ഈ സ്ഥലം വീടുവെക്കുന്നതിനായി വാങ്ങിയത്. കുട്ടിക്കാലം മുതല് നിരഞ്ജന് താമസിച്ചതും ഇവിടെയാണ്. എന്നാല്, സ്ഥലം വാങ്ങുമ്പോള് കനാല് കൈയേറി നികത്തിയ സ്ഥലമാണെന്ന് അറിയില്ലായിരുന്നെന്ന് കുടുംബാംഗങ്ങള് പറഞ്ഞു. ഇതോടൊപ്പം ദൊഡ്ഡ ബൊമ്മസാന്ദ്രയിലെ മറ്റ് നിരവധി വീടുകളും കോര്പ്പറേഷന് പൊളിച്ചുനീക്കുന്നുണ്ട്.
രാജ്യത്തിനായി ജീവന്കൊടുത്ത ഈ പട്ടാളക്കാരന്റെ കുടുംബം വഴിയാധാരമാകാന് പാടില്ല. സര്ക്കാര് അടിയന്തരമായി ഈ പ്രശ്നത്തില് ഇടപെടേണ്ടതാണ്.
https://www.facebook.com/Malayalivartha