ആശുപത്രിയില് കൈക്കൂലി നല്കിയില്ല: 10 മാസം പ്രായമുള്ള കുഞ്ഞ് മരിച്ചു
അസുഖം മൂര്ച്ഛിച്ച് കുഞ്ഞുമായി ആശുപത്രിയില് എത്തിയ മാതാപിതാക്കളോട് കുഞ്ഞിനെ കിടത്താന് 30 രൂപ തൂപ്പുകാരി കൈക്കൂലി ചോദിച്ചു. ആശുപത്രി ജീവനക്കാര് ആവശ്യപ്പെട്ട കൈക്കൂലി നല്കാഞ്ഞതിനെ തുടര്ന്ന് ചികിത്സ കിട്ടാതെ 10 മാസം പ്രായമുള്ള കുഞ്ഞ് മരിച്ചു. ഉത്തര്പ്രദേശിലാണ് സംഭവം. മാതാപിതാക്കളുടെ പരാതിയെ തുടര്ന്ന് ജീവനക്കാരിയെ പിരിച്ചുവിട്ടു.
മാതാപിതാക്കള് നല്കാതിരുന്നതിനെ തുടര്ന്ന് ഡ്യൂട്ടിയില് ഉണ്ടായിരുന്ന നഴ്സിംഗ് സ്റ്റാഫുകള് കുഞ്ഞിനെ ചില്ഡ്രന്സ് വാര്ഡില് നിന്നും മാറ്റുകയായിരുന്നു.
അത്യാഹിത കുത്തിവെയ്പ്പ് നടത്തേണ്ടയാള് ഉള്പ്പെടെ എല്ലാവരും തങ്ങളോട് കൈക്കൂലി ആവശ്യപ്പെട്ടതായും കുത്തിവെയ്പ്പ് താമസിച്ചതിനെ തുടര്ന്നാണ് കുഞ്ഞ് മരിച്ചതെന്നും കുഞ്ഞിന്റെ മൃതദേഹവുമായി കുത്തിയിരിപ്പ് സമരം നടത്തിയ മാതാവ് സുമിതാ ദത്ത് ആരോപിക്കുന്നു. അതേസമയം ആരോപണങ്ങളെല്ലാം നിഷേധിച്ച ആശുപത്രി അധികൃതര് അന്വേഷണത്തിന് ഉത്തരവിട്ടിട്ടുണ്ട്.
പനി കൂടിയതിനെ തുടര്ന്നാണ് ബഹ്റൈക്കിലെ ഏറ്റവും വലിയ സര്ക്കാര് ആശുപത്രികളില് ഒന്നിലേക്ക് മകന് കൃഷ്ണയുമായി സുമിതയും ശിവ് ദത്തും എത്തിയത്. കുഞ്ഞിനെ അഡ്മിറ്റ് ചെയ്യാന് ഡോക്ടര് നിര്ദേശിച്ചതിനെ തുടര്ന്ന് എത്തിയപ്പോള് നഴ്സുമാര് കൈക്കൂലി ആവശ്യപ്പെട്ടു. അത് നല്കി വാര്ഡിലേയ്ക്ക് ചെന്നപ്പോള് ബെഡ് അനുവദിക്കുന്നതിനായി തൂപ്പുകാരിയൂം പണം ആവശ്യപ്പെട്ടു.
ചൊവ്വാഴ്ച രാവിലെ നിര്ണ്ണായകമായ ഇഞ്ചക്ഷന് നല്കാന് വന്ന മെഡിക്കല് അസിസ്റ്റന്റിന്റെ വകയായിരുന്നു അടുത്ത കൈക്കൂലി ആവശ്യപ്പെടല്. സൗജന്യമായി മരുന്ന് നല്കുന്ന ആശുപത്രിയില് മരുന്നിന്റെ വില എന്ന രീതിയിലായിരുന്നു ചോദ്യം. അപ്പോള് കയ്യില് പണമില്ലായിരുന്നതിനാല് അല്പ്പം സമയം ആവശ്യപ്പെട്ടെന്ന് സുമിത പറഞ്ഞു. അല്പ്പ സമയത്തെ തര്ക്കത്തിന് ശേഷം അദ്ദേഹം ഇഞ്ചക്ഷന് നല്കിയെങ്കിലൂം ഏറെ വൈകിപ്പോയെന്ന് മാതാപിതാക്കള് ആരോപിക്കുന്നു.
ആശുപത്രിയില് എല്ലാവരും കൈക്കൂലി ചോദിച്ചെന്നും സ്വകാര്യ പ്രാക്ടീസ് ഉള്ളതിനാലാണ് ഡോക്ടര്മാര് ചോദിക്കാഞ്ഞതെന്നും അസുഖത്തിന് സ്വന്തം വസ്തു വിറ്റിട്ടാണെങ്കിലും എല്ലാവരും സ്വകാര്യ ആശുപത്രിയിലേക്കേ പോകാവൂ എന്നും കൂലിപ്പണിക്കാരനായ ശിവദത്ത് പറയുന്നു. സംഭവത്തില് അന്വേഷിച്ച് നടപടി എടുക്കാമെന്ന് ആശുപത്രി അധികൃതര് ഉറപ്പ് നല്കിയിരുന്നതിനാല് ഇവര് പോലീസില് പരാതി നല്കിയില്ല. പരാതിയില് പ്രധാനമായും ആരോപിക്കപ്പെട്ട നഴ്സിനെ അന്വേഷണാടിസ്ഥാനത്തില് സസ്പെന്റ് ചെയ്യുകയും തൂപ്പുകാരിയെ പിരിച്ചുവിടുകയും ചെയ്തു.
https://www.facebook.com/Malayalivartha