എല്ലാം ഒരു വിശ്വാസവും ഭാഗ്യവും അത്ര തന്നെ. വിമാനത്തില്‍ യാത്ര ചെയ്യുന്നവര്‍ എന്തു വിശ്വസിച്ച് ഉള്ളിലിരിക്കും. അധികൃതരുടെ കൃത്യമായ പരിശോധന നടക്കാത്തതിനാല്‍ ഷാര്‍ജയില്‍ നിന്നു കോഴിക്കോട്ടേക്കു പൈലറ്റ് വിമാനം പറത്തിയതു മദ്യപിച്ചു ലക്കുകെട്ട്.
എയര്‍ ഇന്ത്യയുടെ ഷാര്‍ജകോഴിക്കോട് വിമാനമാണ് പൈലറ്റ് അടിച്ചുഫിറ്റായി പറത്തിയത്. ഇന്നലെ രാവിലെ കോഴിക്കോട് വിമാനത്താവളത്തിലെത്തിയ എയര്‍ ഇന്ത്യ പൈലറ്റ് ബ്രീത്ത് അനലൈസര്‍ ടെസ്റ്റില്‍ പരാജപ്പെടുകയായിരുന്നു.
സാധാരണ ബ്രീത്ത് അനലൈസര്‍ കഴിഞ്ഞാണ് വിമാനം എടുക്കാനായി പൈലറ്റ് എത്തുന്നത്. എന്നാല്‍ ഇക്കുറി വിമാനം പറത്തി എത്തിയശേഷമാണ് പരിശോധന നടത്തിയത്. നേരത്തേയും മദ്യപിച്ച് വിമാനം പറത്തിയതിന് പിടിക്കപ്പെട്ടിട്ടുള്ളതിനാലാണ് പൈലറ്റിനെ വീണ്ടും എയര്‍ ഇന്ത്യ പരിശോധനക്ക് വിധേയനാക്കിയത്.
ഷാര്‍ജയില്‍ നിന്ന് കോഴിക്കോടെത്തിയ വിമാനം വീണ്ടും അടുത്ത സ്ഥലത്തേക്ക് ഷെഡ്യൂള്‍ ഉണ്ടായിരുന്നു. എന്നാല്‍ പൈലറ്റ് മദ്യപിച്ചതിനാല്‍ തന്നെ അതിന് സാധിച്ചില്ല. പകരക്കാരനാവാന്‍ മറ്റൊരു പൈലറ്റിനെ ലഭിച്ചതുമില്ല. സംഗതി വിവാദമായതോടെ കോഴിക്കോടേക്ക് പൈലറ്റുമായി മറ്റൊരു വിമാനം വഴിതിരിച്ച് വിട്ടാണ് എയര്‍ ഇന്ത്യ പ്രശ്‌നം പരിഹരിച്ചത്.
മദ്യപിച്ച് വിമാനം പറത്തിയ പൈലറ്റിനെതിരെ കടുത്ത നടപടി ഉണ്ടാവുമെന്ന് എയര്‍ ഇന്ത്യ വക്താക്കള്‍ അറിയിച്ചു. ഇതിന് മുമ്പും പൈലറ്റ് ഇത് ആവര്‍ത്തിച്ചിച്ചുള്ളതിനാല്‍ മുന്നറിയിപ്പ് നല്‍കി വിടാനാവില്ലെന്നും ഉയര്‍ന്ന ഉദ്യോഗസ്ഥര്‍ പറയുന്നു. സാധാരണഗതിയില്‍ വിമാനം ലാന്‍ഡ് ചെയ്തതിന് ശേഷം പൈലറ്റ് മദ്യപിച്ചിട്ടുണ്ടോയെന്ന് പരിശോധിക്കുന്നത് അപൂര്‍വ്വമാണ്. ആദ്യമായി മദ്യപിച്ചെന്ന് കണ്ടെത്തിയാല്‍ മൂന്ന് മാസം ലൈസന്‍സ് സസ്‌പെന്‍ഷനും രണ്ടാമത്തെ തവണ ആവര്‍ത്തിച്ചാല്‍ അഞ്ച് വര്‍ഷം ലൈസന്‍സ് സസ്‌പെന്‍ഷനുമാണ് ശിക്ഷ നിശ്ചയിച്ചിരുന്നത്.
മൂന്ന് മാസം സസ്‌പെന്‍ഷന് ശേഷം തെറ്റ് തുടര്‍ച്ചയായി ആവര്‍ത്തിച്ചാല്‍ മൂന്ന് വര്‍ഷം വരെ ലൈസന്‍സ് റദ്ദാക്കുകയാണ് നിലവില്‍ ചെയ്യാറുള്ളത്.