വിവാദമായ ആന്‍ട്രിക്‌സ്‌ദേവാസ് കരാറുമായി ബന്ധപ്പെട്ട കേസില്‍ ഐ.എസ്.ആര്‍.ഒ മുന്‍ ചെയര്‍മാന്‍ ജി.മാധവന്‍ നായരെ പ്രതിയാക്കി സിബിഐ കുറ്റപത്രം സമര്‍പ്പിച്ചു. ഐ.എസ്.ആര്‍.ഒ.യുടെ വാണിജ്യ വിഭാഗമായ 'ആന്‍ട്രിക്‌സ് കോര്‍പ്പറേഷന്‍' ബാംഗ്ലൂര്‍ ആസ്ഥാനമായുള്ള ദേവാസ് മള്‍ട്ടിമീഡിയയുമായി 2005ല്‍ ഒപ്പിട്ട കരാറാണ് വിവാദമായത്. കരാര്‍ ഒപ്പിടുമ്പോള്‍ ആന്‍ട്രിക്‌സ് ഗവേണിങ് കൗണ്‍സില്‍ അംഗമായിരുന്നു ജി മാധവന്‍ നായര്‍.
ഐ.എസ്.ആര്‍.ഒയുടെ രണ്ടു ഉപഗ്രഹങ്ങളിലെ 90 ശതമാനം ട്രാന്‍സ്‌പോന്‍ഡറുകളും നല്‍കാനായിരുന്നു ഇരുസ്ഥാപനങ്ങളും തമ്മിലുള്ള കരാര്‍. ഐ.എസ്.ആര്‍.ഒ.യുടെ ഉടമസ്ഥതയിലുള്ള 150 മെഗാ ഹെര്‍ട്‌സ് എസ്. ബാന്‍ഡ് സ്‌പെക്ട്രത്തില്‍ 70 മെഗാഹെര്‍ട്‌സും ദേവാസിന് നല്‍കാനുള്ള കരാര്‍ മന്ത്രിസഭയെ അറിയിക്കാതെയായിരുന്നു ആന്‍ട്രിക്‌സ് ഒപ്പിട്ടത്. 350 കോടി രൂപ മുടക്കിയാണ് സര്‍ക്കാര്‍ രണ്ടു ജി. സാറ്റ് ഉപഗ്രഹങ്ങള്‍ നിര്‍മ്മിച്ചത്.
2005 ജനുവരി 28നാണ് ആന്‍ട്രിക്‌സും ദേവാസ് കമ്പനിയും കരാറില്‍ ഒപ്പിടുന്നത്. എന്നാല്‍, ജി സാറ്റ് 6ന്റെ വിക്ഷേപണത്തിന് അനുമതി തേടി കേന്ദ്രമന്ത്രിസഭയ്ക്കും ബഹിരാകാശ കമ്മീഷനും 2005 നവംബര്‍ 27ന് ഐ.എസ്.ആര്‍.ഒ. നല്‍കിയ കുറിപ്പില്‍ കരാര്‍ സംബന്ധിച്ച വിവരങ്ങള്‍ മറച്ചു വച്ചു. ദേവാസുമായി കരാറില്‍ ഏര്‍പ്പെട്ടതിനു ശേഷം ഇവരുടെ ഉപകരണങ്ങളുടെ സഹായത്തോടെയാണ് ജി. സാറ്റ് വിക്ഷേപണത്തിന് സജ്ജമാക്കിയതെന്നും മറച്ചുവച്ചു.
കരാറിനു മുമ്പ് ദേവാസ് ഉടമസ്ഥരായ ഫോര്‍ഗ് അഡൈ്വസേഴ്‌സിന്റെ ഓഹരി മൂലധനം ഒരു ലക്ഷം രൂപ മാത്രമായിരുന്നു. ഐ.എസ്.ആര്‍.ഒ.യില്‍ മുന്‍ ശാസ്ത്രജ്ഞനായ ഡി. വേണുഗോപാലും എം. ഉമേഷ് എന്ന ആളുമായിരുന്നു ഓഹരി ഉടമകള്‍. പത്തു രൂപ മുഖവിലയുള്ള 9,000 ഓഹരികള്‍ വേണുഗോപാലിന്റെയും ആയിരം ഓഹരികള്‍ ഉമേഷിന്റെയും പേരിലായിരുന്നു. എന്നാല്‍, ആന്‍ട്രിക്‌സുമായി കരാര്‍ ഒപ്പിട്ടതിനു ശേഷം 2005 ഡിസംബറില്‍ കമ്പനിയുടെ ഓഹരി മൂലധനം അഞ്ചു ലക്ഷവും ഓഹരി ഉടമകളുടെ എണ്ണം 12 ആയും വര്‍ധിച്ചു. ഇതില്‍ 60 ശതമാനം മൗറീഷ്യസ് ആസ്ഥാനമായ കമ്പനികളുടെ പേരിലായിരുന്നു. 19 ശതമാനം ഓഹരികള്‍ ഐ. എസ്. ആര്‍. ഒ.യിലെ മറ്റൊരു മുന്‍ ശാസ്ത്രജ്ഞന്‍ ഡോ. എം. ജി ചന്ദ്രശേഖറിനായിരുന്നു. 2010 മാര്‍ച്ചില്‍ ഓഹരി മൂലധനം 18 ലക്ഷമായി.
അഴിമതി ആരോപണത്തെത്തുടര്‍ന്ന് മാധവന്‍നായരെയും മറ്റ് മൂന്ന് ശാസ്ത്രജ്ഞരേയും നിലവിലുള്ളതും ഭാവിയില്‍ ഉണ്ടാകാവുന്നതുമായ എല്ലാ സര്‍ക്കാര്‍ നിയമനങ്ങളില്‍ നിന്നും വിലക്കിക്കൊണ്ട് സര്‍ക്കാര്‍ ഉത്തരവിട്ടിരുന്നു. ഐ.എസ്.ആര്‍.ഒ.യിലെ മുന്‍ സെക്രട്ടറി എ. ഭാസ്‌കരനാരായണ, ഐ.എസ്.ആര്‍.ഒ.യുടെ വാണിജ്യ വിഭാഗമായ ആന്‍ട്രിക്‌സിന്റെ മാനേജിങ് ഡയറക്ടര്‍ കെ.ആര്‍. സിദ്ധമൂര്‍ത്തി, ഐ.എസ്.ആര്‍.ഒ. സാറ്റലൈറ്റ് സെന്റര്‍ മുന്‍ ഡയറക്ടര്‍ കെ.എന്‍. ശങ്കര എന്നിവരെയായിരുന്നു വിലക്കിയത്.