മദ്യപിച്ച് ജോലിക്കെത്തിയ ജെറ്റ് എയര്‍വേയ്‌സിന്റെയും എയര്‍ ഇന്ത്യയുടേയും പൈലറ്റുമാരെനാല് വര്‍ഷത്തേക്ക് ഡി.ജി.സി.എ സസ്‌പെന്റ് ചെയ്തു. എയര്‍ ഇന്ത്യ വിമാനത്തിലെ ഒരു കാബിന്‍ ക്രൂ അംഗത്തേയും ഒരു വര്‍ഷത്തേയ്ക്ക് സസ്‌പെന്റ് ചെയ്തിട്ടുണ്ട്. സംഭവത്തിന്റെ ഗൗരവം കണക്കിലെടുത്ത് ഇരുവര്‍ക്കുമെതിരെ കേസെടുക്കാനായി പരാതി നല്‍കാന്‍ ജെറ്റ് എയര്‍വേയ്‌സിനോടും എയര്‍ ഇന്ത്യയോടും ഡി.ജി.സി.എ ആവശ്യപ്പെട്ടു.

മദ്യപിച്ച് വിമാനം പറത്തിയ പൈലറ്റിനെ ജോലിയില്‍ നിന്ന് തന്നെ പിരിച്ചുവിട്ടതായി ജെറ്റ് എയര്‍വേയ്‌സ് വക്താവ് അറിയിച്ചു. എന്നാല്‍ വിഷയത്തില്‍ പ്രതികരിക്കാന്‍ എയര്‍ ഇന്ത്യ തയ്യാറായിട്ടില്ല. വ്യോമയാന ചട്ടങ്ങള്‍ ലംഘിക്കുന്നവരോടും യാത്രക്കാരുടെ സുരക്ഷയെ അപായപ്പെടുത്തും വിധം ഇത്തരത്തില്‍ നിരുത്തരവാദപരമായി പെരുമാറുന്നവരോടും യാതൊരു വിട്ടുവീഴ്ചയുമില്ലെന്ന് ജെറ്റ് എയര്‍വേയ്‌സ് വ്യക്തമാക്കി.

വിമാനം പുറപ്പെടുന്നതിന് മുമ്ബും എത്തിയതിന് ശേഷവും മദ്യപിച്ചിട്ടുണ്ടോ എന്നറിയാനുള്ള പരിശോധന നടത്തുന്നത് സാധാരണയാണ്. എന്നാല്‍ വളരെ അപൂര്‍വമായേ ഇത്തരത്തില്‍ മദ്യപിച്ചതായി കണ്ടെത്തിയ സംഭവങ്ങളുണ്ടായിട്ടുള്ളൂ. ഈ രണ്ട് പൈലറ്റുമാരും നേരത്തേയും ആല്‍ക്കഹോള്‍ പരിശോധനയില്‍ പിടിക്കപ്പെട്ടിട്ടുണ്ട്.

എന്നാല്‍ അത് വിമാനം പുറപ്പെടുന്നതിന് മുമ്ബുള്ള പരിശോധനക്കിടെയായിരുന്നു എന്ന് മാത്രം. ഈ മാസം മൂന്നിനും 10നുമാണ് ഇരു പൈലറ്റുമാരും പിടിക്കപ്പെട്ടത്. ആഗസ്റ്റ് മൂന്നിന് അബു ദാബി ചെന്നൈ വിമാനത്തിന്റെ പൈലറ്റും 10ന് ഷാര്‍ജ കോഴിക്കോട് വിമാനത്തിന്റെ പൈലറ്റുമാണ് മദ്യപിച്ചതായി തെളിഞ്ഞത്.