പട്ടത്തിന്റെ നൂല് കഴുത്തില് കുരുങ്ങി രണ്ട് കുട്ടികള് മരിച്ചു
പട്ടം പറത്തുന്നതിനായി ഉപയോഗിക്കുന്ന നൂല് കഴുത്തില് കുരുങ്ങി ഡല്ഹിയില് രണ്ട് കുട്ടികള് മരിച്ചു. സാഞ്ചി ഗോയല് (4),ഹാരി (3) എന്നി കുട്ടികള്ക്കാണ് സ്വാതന്ത്ര്യദിനത്തില് 10 കി.മീ ചുറ്റളവിലുണ്ടായ രണ്ട് സമാനരീതിയില് നൂല് കഴുത്തില് കുരുങ്ങി ജീവന് നഷ്ടപ്പെട്ടത്. ചൈനീസ് മാഞ്ച എന്ന പ്ലാസ്റ്റിക് നൂലാണ് മരണത്തിന് കാരണമായത്.
തിങ്കളാഴ്ച വൈകിട്ട് ആറ് മണിയോടെയാണ് മാതാപിതാക്കള്ക്കൊപ്പം സിനിമ കണ്ട് വീട്ടിലേക്ക് മടങ്ങുകയായിരുന്ന സാഞ്ചി ഗോയല് എന്ന നാലു വയസുകാരിയുടെ കഴുത്തില് ചൈനീസ് നൂല് കുടുങ്ങിയത്. കാറിന്റെ സണ്റൂഫിലൂടെ തല പുറത്തിട്ട് യാത്ര ചെയ്യുകയായിരുന്ന സാഞ്ചിയുടെ കഴുത്തില് അപ്രതീക്ഷിതമായി നൂല് കുരുങ്ങുകയായിരുന്നു. ഉടന് തന്നെ മാതാപിതാക്കള് സാഞ്ചിയെ ആശുപത്രിയിലെത്തിക്കാന് ശ്രമിച്ചെങ്കിലും യാത്രമേദ്ധ്യ തന്നെ അമ്മയുടെ മടിയില് കിടന്ന് സാഞ്ചി മരിച്ചു.
ഈ അപകടം കഴിഞ്ഞ് രണ്ട് മണിക്കൂറിന് ശേഷം രാത്രി എട്ട് മണിയോടെയാണ് അച്ഛനമ്മമാര്ക്കും മൂത്തസഹോദരിക്കുമൊപ്പം കാറില് സഞ്ചരിക്കുകയായിരുന്ന മൂന്ന് വയസുകാരന് ഹാരിയുടെ കഴുത്തിലും സമാനമായ രീതിയില് ചൈനീസ് നൂല് മരണകുരുക്കിട്ടത്. സാഞ്ചിയെ പോലെ കാറിന്റെ സണ്റൂഫിലൂടെ പുറം കാഴ്ചകള് കാണുകയായിരുന്ന ഹാരിയുടെ കഴുത്തില് പൊട്ടിപോയ പട്ടത്തിന്റെ നൂല് കുടുങ്ങുകയായിരുന്നു. കഴുത്തിനേറ്റ മുറിവില് നിന്ന് ചോരവാര്ന്നുകൊണ്ടിരുന്ന ഹാരിയുമായി കുടുംബം ആശുപത്രിയിലേക്ക് പുറപ്പെട്ടെങ്കിലും യാത്രയ്ക്കിടെ തന്നെ ഹാരിയുടെ ജീവന് നഷ്ടമായി.
പശ്ചിമഡല്ഹിയില് ബൈക്ക് യാത്രികനായ യുവാവ് ചൈനീസ് നൂല് കഴുത്തില് കുരുങ്ങി മരിച്ച സംഭവത്തിന് പിന്നാലെയാണ് രണ്ട് കുട്ടികള്ക്ക് കൂടി ദുരന്തം സംഭവിച്ചത്. ചൈനീസ് നൂലിന്റെ അപകടം തിരിച്ചറിഞ്ഞ ഡല്ഹി സര്ക്കാര് ഗ്ലാസ്സ്, മെറ്റല് ആവരണത്തോടു കൂടിയ ചൈനീസ് നൂലുകള് ഉപയോഗിക്കുന്നത് നിരോധിച്ചു കൊണ്ട് ചൊവ്വാഴ്ച ഉത്തരവിറക്കിയിട്ടുണ്ട്.
ചൈനീസ് നൂലുകളുടെ വില്പനയും ഉത്പാദനവും സംഭരണവുമടക്കം നിരോധിച്ചു കൊണ്ടാണ് സര്ക്കാരിന്റെ ഉത്തരവ്. പട്ടം പറത്തുവാന് സാധാരണ കോട്ടണ് നൂലുകളോ മറ്റോ ഉപയോഗിക്കുവാനും ഉത്തരവില് നിര്ദേശമുണ്ട്. ഇതിന് വിരുദ്ധമായി ചൈനീസ് നൂലുകള് ഉപയോഗിക്കുന്നവര്ക്ക് ഒരു ലക്ഷം രൂപ വരെ പിഴയോ അഞ്ച് വര്ഷം വരെ തടവോ ശിക്ഷ ലഭിക്കുമെന്നും ഉത്തരവില് പറയുന്നു.
ഡല്ഹിയിലെ കെട്ടിട്ടങ്ങളുടെ മേല്ക്കൂരയിലും പാര്ക്കുകളിലുമായി ആയിരകണക്കിന് ആളുകളാണ് സ്വാതന്ത്ര്യദിനമായ തിങ്കളാഴ്ച പട്ടം പറത്തിയത്. ഇതിനിടയില് പൊട്ടിപോയതും നിയന്ത്രണം നഷ്ടപ്പെട്ടതുമായ പട്ടങ്ങളുടെ നൂലുകളാണ് മനുഷ്യജീവന് തന്നെ ഭീഷണിയാവുന്ന രീതിയില് പറന്നു നടക്കുന്നത്.
നൂറു കണക്കിന് പക്ഷികളുടെ ജീവനെടുത്ത ഇത്തരം നൂലുകള് ഡല്ഹിയിലെ വൈദ്യുത ലൈനുകളിലും മരങ്ങളിലും കുടുങ്ങികിടക്കുന്നത് സ്ഥിരം കാഴ്ചയാണ്. ചൈനീസ് നൂലൊരുക്കുന്ന കുരുക്കില്പ്പെട്ട് കഴിഞ്ഞ ഒരാഴ്ചയ്ക്കിടെ മാത്രം നാല് പേരാണ് ഡല്ഹി നഗരത്തില് മരിച്ചത്. ഒരു പോലീസുകാരനടക്കം മൂന്ന് പേര്ക്ക് നൂല് കുരുങ്ങി ഗുരുതരമായി പരിക്കേല്ക്കുകയും ചെയ്തു.
https://www.facebook.com/Malayalivartha