തുടര്‍ച്ചയായ ഏഴു മണിക്കൂര്‍ നീണ്ട പരിശ്രമത്തിന്റെ ഒടുക്കം കുഴല്‍കിണറില്‍ വീണ മൂന്ന് വയസ്സുകാരിക്ക് പുനര്‍ജന്മം. ഒഡീഷ്യയിലെ അങ്കൂല്‍ ജില്ലയിലാണ് സംഭവമുണ്ടായത്. ഗുല്‍സാര്‍ ഗ്രാമത്തിലെ മൈതാനത്ത് കളിക്കുന്നതിനിടെ രാധാ സാഹു എന്ന പെണ്‍കുട്ടി കാല്‍വഴുതി അടുത്തുള്ള കിണറ്റില്‍ വീണത്. പിന്നീട് അഗ്‌നിശമനസേനയുടെയും പോലീസിന്റെയും രക്ഷാപ്രവര്‍ത്തനത്തിനൊടുവില്‍ രാവിലെ 9 മണിക്ക് കിണറ്റില്‍ വീണ പെണ്‍കുട്ടിയെ വൈകിട്ട് 4.45 ഓടെ രക്ഷിക്കുവാനായത്.

അവശയായ കുട്ടിയെ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചു. അപകടനില തരണം ചെയ്തതായി ആശുപത്രി അധികൃതര്‍ അറിയിച്ചു. 15 അടി ആഴമുള്ള കിണറില്‍ വീണ കുട്ടി ആറടി താഴ്ചയില്‍ കുടുങ്ങുകയായിരുന്നു. തുടര്‍ന്ന് സമാന്തരമായി മറ്റൊരു കുഴിയുണ്ടാക്കിയാണ് കുട്ടിയെ രക്ഷപ്പെടുത്തിയത്. അഗ്‌നിശമന സേന ഡയറക്ടറേറ്റ് ജനറല്‍ ബി.കെ. ശര്‍മ്മ ട്വിറ്ററിലൂടെ അറിയിച്ചു.

കുഴല്‍കിണറില്‍ അകപ്പെട്ട കുഞ്ഞിന്റെ ജീവന്‍ നിലനിര്‍ത്തുന്നതിനായുള്ള സംവിധാനങ്ങളും ഏര്‍പ്പെടുത്തി. കുഞ്ഞിന് ആരോഗ്യപ്രശ്‌നങ്ങള്‍ ഒന്നുമില്ലെന്ന് കണ്ടെത്തിയതോടെ രക്ഷാദൗത്യം ശക്തമാക്കി. കേന്ദ്ര പെട്രോളിയം മന്ത്രി ധര്‍മേന്ദ്രപ്രധാനും ഒഡീഷ്യ മുഖ്യമന്ത്രി നവീന്‍ പട്‌നായിക്കും രക്ഷാപ്രവര്‍ത്തനത്തിന് നേതൃത്വം നല്‍കിയ പ്രവര്‍ത്തകരെ അഭിനന്ദിച്ച് ട്വിറ്റിട്ടു.