കമലാഹാസന്‍ ഉലഹനായകനാണെങ്കിലും രജനീകാന്താണ് തമിഴ്‌നാട്ടില്‍ പോപ്പുലര്‍, രജനീകാന്തിന് ബി.ജെ.പിയുമായും അടുത്തബന്ധം
എഴുപതുകളുടെ പകുതിയില്‍ കമലാഹാസന്റെ വില്ലനായി സിനിമയില്‍ വന്ന രജനീകാന്ത് ഏറെ കഷ്ടപ്പെട്ടാണ് നായകനായതും തെന്നിന്ത്യന്‍ സിനിമാ ലോകം കീഴടക്കിയതും. ഇന്ന് ലോകം അറിയപ്പെടുന്ന താരമാണ് രജനീകാന്ത്. കമലാഹാസന്‍ ഉലഹനായകന്‍ എന്നാണ് അറിയപ്പെടുന്നതെങ്കിലും രജനീകാന്തിന്റെ അത്ര പോപ്പുലറല്ല. കമലാഹാസന്‍ ഒരു ക്ലാസ്, വേര്‍സറ്റയില്‍ ആക്ടറാണ്. പരീക്ഷണങ്ങള്‍ക്കും പുതുമകള്‍ക്കും അദ്ദേഹം പ്രാധാന്യം നല്‍കും. സിനിമകള്‍ക്കായി എന്ത് റിസ്‌ക്കും എടുക്കാന്‍ തയ്യാറാണ്. രജനീകാന്ത് നേരെ തിരിച്ചാണ്. ഹീറോയിസം മാത്രമുള്ള കഥാപാത്രങ്ങളാണ് സൂപ്പര്‍താര പദവിയില്‍ എത്തിയ ശേഷം ചെയ്യുന്നത്. പൂര്‍ണമായും ആരാധകരെ തൃപ്തിപ്പെടുത്തുന്ന സിനിമകള്‍.
രാഷ്ട്രീയ പ്രവേശനം ആദ്യം പ്രഖ്യാപിച്ചത് രജനീകാന്താണ്. അതിനുള്ള മുന്നൊരുക്കങ്ങള്‍ ഒരുപതിറ്റാണ്ട് മുമ്പ് താരം തുടങ്ങിയിരുന്നു. 2006ലെ നിയമസഭാ തെരഞ്ഞെടുപ്പ് കാലത്ത് എ.ഐ.ഡി.എം.കെയുടെ രണ്ടില ചിഹ്നത്തിന് വോട്ട് ചെയ്യാന്‍ ആഗ്യം കാണിച്ചിരുന്നു. അത്തവണ ജയലളിത അധികാരത്തില്‍ വന്നു. തമിഴ്‌നാട്ടിലൂടനീളം രസികര്‍മണ്‍ട്രം (ഫാന്‍സ്) ശക്തമായി പ്രവര്‍ത്തിക്കുന്നുണ്ട്. ഇടയ്ക്കിടെ പ്രവര്‍ത്തകരെ ചെന്നൈയിലെ തന്റെ കല്യാണമണ്ഡപത്തില്‍ വിളിച്ച് കൂടിക്കാഴ്ച നടത്താറുണ്ട്. ഡി.എം.കെയുമായും എ.ഐ.ഡി.എം.കെയുമായും ബി.ജെ.പിയുമായും അടുക്കബന്ധമാണ് താരത്തിന്. അടുത്തകാലത്തായി പ്രധാനമന്ത്രി നരേന്ദ്രമോദിയുമായി നല്ല അടുപ്പമാണ്. തമിഴ്‌നാട്ടില്‍ വേരുറപ്പിക്കാന്‍ ബി.ജെ.പിക്ക് രജനീകാന്തിന്റെ സഹായം അത്യാവശ്യമാണ്.
പന്നീര്‍ ശെല്‍വത്തെ ശശികലയും കൂട്ടരും ചേര്‍ന്ന് മുഖ്യമന്ത്രി കസേരയില്‍ നിന്ന് തെറിപ്പിച്ചതോടെയാണ് കമലാഹാസന്‍ രാഷട്രീയത്തില്‍ പരസ്യമായി ഇടപെടാന്‍ തുടങ്ങിയത്. തമിഴ്‌നാട്ടില്‍ ജനാധിപത്യത്തെ കശാപ്പ് ചെയ്‌തെന്നാണ് അന്ന് ഉലകഹാനയകന്‍ തുറന്നടിച്ചത്. മുമ്പ് ജെല്ലിക്കെട്ട് നിരോധിച്ചപ്പോള്‍ ബിരിയാണിയും നിരോധിക്കണമെന്ന് ആവശ്യപ്പെട്ടു. രാജ്യത്ത് ഹിന്ദുതീവ്രവാദം നിലവിലുണ്ടെന്നും ഭൂരിക്ഷംവരുന്ന ഹിന്ദുക്കള്‍ മറ്റുള്ളവരോട് ക്ഷമയും സഹിഷ്ണുതയും കാണിക്കണമെന്ന് ആനന്ദവികിടന്‍ മാസികയിലെഴുതിയ കോളത്തില്‍ വ്യക്തമാക്കി. ഇതിനെതിരെ ഹിന്ദുസംഘടനകള്‍ പ്രതിഷേധവുമായി രംഗത്തെത്തി. കമലാഹാസനെ വെടിവെച്ച് കൊല്ലണമെന്ന് തീവ്രഹിന്ദുത്വനിലപാടുള്ള സംഘടനകളുടെ നേതാക്കള്‍ ആഹ്വാനം ചെയ്തു.
ജനങ്ങളുടെ പ്രശ്‌നങ്ങള്‍ മനസിലാക്കാന്‍ തമിഴ്‌നാട്ടിലുടനീളം സഞ്ചരിച്ച് ജനസമ്പര്‍ക്കപരിപാടികള്‍ നടത്താന്‍ കമലാഹാസന്‍ തീരുമാനിച്ചിട്ടുണ്ട്. ഇതിന്റെ ഭാഗമായി കഴിഞ്ഞ പിറന്നാള്‍ ദിനത്തില്‍ മയ്യം വിസില്‍ എന്ന ആപ്പ് പുറത്തിറക്കി. ചെന്നൈയില്‍ ഉള്‍പ്പെടെയുള്ള ജനകീയപ്രശ്‌നങ്ങളുള്ള ഇടങ്ങള്‍ അദ്ദേഹം സന്ദര്‍ശിക്കുന്നുണ്ട്. തമിഴ്‌നാട്ടിലെ ബി.ജെ.പി നേതാക്കള്‍ കമലാഹാസനെതിരെ പരസ്യപ്രസ്താവനകള്‍ നടത്തിയിട്ടുണ്ട്. രജനീകാന്ത് ആരെയും പിണക്കിയിട്ടില്ല. സിനിമാ താരങ്ങളെ അധികാരത്തിലേറ്റുന്നതാണ് തമിഴ്‌നാടിന്റെ രാഷ്ട്രീയ ചരിത്രം. എം.ജി.ആറും ജയലളിതയും കരുണാനിധിയും എല്ലാം ഉദാഹരണങ്ങള്‍. അവര്‍ക്ക് ശേഷം ഇനി രജനീകാന്ത്, കമലാഹാസന്‍ യുഗമാണെന്ന് കരുതാം.
https://www.facebook.com/Malayalivartha
