കശ്മീരില്‍ ഇന്ത്യന്‍ സൈന്യത്തിന്റെ ഉറക്കം കളഞ്ഞ കുള്ളന്‍!
പുല്‍വാമയില്‍ ഇന്നു നടന്ന പോരാട്ടത്തില്‍ ഇന്ത്യന്‍ സൈന്യം തകര്‍ത്ത ഭീകരരില്‍ ഒരാള്‍ ആറു മാസമായി ഇന്ത്യന്‍ സുരക്ഷാ ഉദ്യോഗസ്ഥര്‍ക്ക് കശ്മീരില്‍ ഉറക്കമില്ലാത്ത രാവുകള്‍ സമ്മാനിച്ച 'ഛോട്ടാ നൂര്‍'. വെറും മൂന്നടി മാത്രം ഉയരമുള്ള ഈ കുള്ളന്‍ ഭീകരന്‍ ഇന്ന് രാവിലെയാണ് സൈന്യത്തിന്റെ വെടിയേറ്റ് മരിച്ചത്.ഇയാള്‍ക്കായി കഴിഞ്ഞ ആറു മാസമായി സൈന്യം തെരച്ചിലിലായിരുന്നു.
ഉയരം തീരെ കുറവാണെങ്കിലും കശ്മീരിലെ ഏറ്റവും ഭീകരന്‍ ഇയാളായിരുന്നെന്നാണ് വിലയിരുത്തല്‍. ശ്രീനഗര്‍ അന്താരാഷ്ട്ര വിമാനത്താവളത്തിന് സമീപമുള്ള ബിഎസ്എഫ് ക്യാമ്പായ ഉറിയില്‍ കഴിഞ്ഞ വര്‍ഷം ഒക്‌ടോബറില്‍ ആക്രമണം നടത്തിയതിന്റെ സൂത്രധാരന്‍ ഈ 47-കാരനായിരുന്നു. രണ്ടുദശകങ്ങള്‍ക്ക് ഇടയില്‍ കശ്മീരില്‍ ഇന്ത്യന്‍ സൈന്യത്തിന് നേരിടേണ്ടി വന്ന കനത്ത ആഘാതമായിരുന്നു ഇത്. സെപ്തംബറില്‍ ട്രാലില്‍ മന്ത്രിമാരുടെ കാവല്‍ സേനയ്ക്ക് എതിരേ നടന്ന ഗ്രനേഡ് ആക്രമണത്തിന്റെയും സൂത്രധാരന്‍ ഇയാളായിരുന്നു. 2015-ല്‍ ചുമതലയേറ്റ ശേഷം നൂര്‍ മൊഹമ്മദ് തെന്ത്രെ ആയിരുന്നു കശ്മീരില്‍ നടന്ന ഒട്ടുമിക്ക ആക്രമണങ്ങള്‍ക്കു പിന്നിലും.
വളരെ അപകടകാരിയായ ഇയാള്‍ 'ഛോട്ടാനൂര്‍' എന്ന പേരിലായിരുന്നു അറിയപ്പെട്ടിരുന്നത്. ദക്ഷിണ മദ്ധ്യ കശ്മീരില്‍ ജെയ്ഷ് ഇ മൊഹമ്മദിന്റെ പ്രവര്‍ത്തനങ്ങള്‍ക്ക് നേതൃത്വം നല്‍കിയിരുന്ന ഇയാളെ കൊലപ്പെടുത്തിയത് തീവ്രവാദി സംഘത്തിന് വന്‍ തിരിച്ചടിയായിട്ടുണ്ട്. ശ്രീനഗര്‍ ജമ്മു ഹൈവേയില്‍ ആക്രമണം നടത്താന്‍ പദ്ധതിയിട്ടു നില്‍േക്കയായിരുന്നു നൂറും സഹായികളും. എന്നാല്‍ സമയത്ത് തന്നെ പോലീസിന് ഇത് പൊളിക്കാന്‍ കഴിഞ്ഞു. പോട്ടാ നിയമപ്രകാരം 2001-ല്‍ ഡല്‍ഹിയില്‍ വെച്ച് ആദ്യം അറസ്റ്റിലായ നൂറയെ 2003-ല്‍ ജീവപര്യന്തത്തിന് ശിക്ഷിച്ചിരുന്നു. എന്നാല്‍ രണ്ടു വര്‍ഷം മുമ്പ് പരോളില്‍ ഇറങ്ങുകയും ജെയ്ഷ ഇ മൊഹമ്മദില്‍ ചേരുകയുമായിരുന്നു.
ആദ്യം വധശിക്ഷയ്ക്ക് വിധിക്കപ്പെട്ടെങ്കിലും പിന്നീട് ജീവപര്യന്തമാക്കുകയായിരുന്നു. 2015-ല്‍ 15 ദിവസത്തെ പരോളിനാണ് പുറത്തുവിട്ടത്. ശാരീരിക സവിശേഷതകള്‍ കൊണ്ടു തന്നെ എളുപ്പം തിരിച്ചറിയപ്പെടുന്നതിനാല്‍ താഴ്‌വരയില്‍ കരുതലോടെയായിരുന്നു ഇയാള്‍ നീങ്ങിയിരുന്നത്. ഭീകരനാണെന്ന് ആരാലും സംശയിക്കപ്പെടാന്‍ സാഹചര്യമില്ലാത്ത ഇയാളെ തീവ്രവാദി സംഘടന പല വിധത്തിലുമായി പ്രയോജനപ്പെടുത്തിയിരുന്നു.
ഡല്‍ഹിയില്‍ നിന്നും കഴിഞ്ഞ വര്‍ഷം ഇയാള്‍ അറസ്റ്റിലാകുമ്പോള്‍ ഒരു ചാക്കുനിറയെ പണവും ഇയാളുടെ കയ്യില്‍ ഉണ്ടായിരുന്നു. തീവ്രവാദി സംഘടനയുടെ സാമ്പത്തിക വിഭാഗം കൈകാര്യം ചെയ്തിരുന്ന ഇയാളായിരുന്നു ലോകത്തുടനീളം വരുന്ന സ്ഥലങ്ങളില്‍ നിന്നും ഫണ്ടുകള്‍ കൈകാര്യം ചെയ്തിരുന്നതും. കഴിഞ്ഞ കുറേ മാസങ്ങളായി ഇയാള്‍ തീവ്രവാദപ്രവര്‍ത്തനങ്ങളില്‍ സജീവമായിരുന്നു. ജെയ്ഷ് ല്‍ മുഹമ്മദത് ആളെ കൂട്ടി കരുത്തു കൂട്ടാനുള്ള നീക്കത്തിലായിരുന്നു.എന്നാല്‍ 15 സംഘാംഗങ്ങളെ കശ്മീരില്‍ വെച്ച് തകര്‍ത്തത് തിരിച്ചടിയായി. ആളെണ്ണം കുറഞ്ഞതിനെ തുടര്‍ന്ന് തീവ്രവാദികളുടെ നീക്കം എളുപ്പം മണത്തറിയാനും പ്രതികരിക്കാനും ഇന്ത്യയ്ക്ക് അവസരം കിട്ടി.
https://www.facebook.com/Malayalivartha
