രക്തദാനം മഹാദാനമെന്നാണ് വിശ്വാസമെങ്കിലും രക്തം കൊടുക്കുന്നത് ഇപ്പോള്‍ അത്ര പുതുമയുള്ള കാര്യമൊന്നുമല്ല. എന്നാല്‍ കര്‍ണാടകക്കാരന്‍ ആദിത്യ ഹെഗ്‌ഡേ എന്ന ബംഗലുരുകാരന്റെ കാര്യം അങ്ങിനെയല്ലാ. ആദിത്യ ഇക്കാര്യം ഓരോ തവണ ചെയ്യുമ്പോഴും അതില്‍ പുതുമയും പ്രാധാന്യവും കൂടും. രക്തം കൊടുക്കാമോ എന്ന് ചോദിച്ച് ലോകത്തിന്റെ തന്നെ വിവിധ ഭാഗങ്ങളില്‍ നിന്നും ഫോണ്‍കോളുകള്‍ കിട്ടുന്നത് ആദിത്യയുടെ കാര്യത്തില്‍ പതിവാണ്. ഡിസംബര്‍ 18-നും എത്തി ചെന്നൈയില്‍ നിന്നും 21-കാരിയായ ഒരു ഗര്‍ഭിണിക്ക് രക്തം കൊടുക്കാനുള്ള വിളി.

അപൂര്‍വ്വങ്ങളില്‍ അപൂര്‍വ്വമായ എച്ച്.എച്ച് നെഗറ്റീവ് ഗ്രൂപ്പാണ് ആദിത്യനെ തേടി ലോകത്തുടനീളമുള്ള ഇടങ്ങളില്‍ നിന്നും പ്രത്യേകിച്ച് ഇന്ത്യയില്‍ നിന്നും അനേകം വിളികള്‍ ഉണ്ടാകാന്‍ കാരണം. ഇന്ത്യയില്‍ തന്നെ പതിനായിരം പേരില്‍ ഒരാള്‍ക്കോ മറ്റോ ആണ് ഈ ഗ്രൂപ്പുള്ളത്. യൂറോപ്പില്‍ പത്തുലക്ഷത്തിന് ഒന്നെന്നുമാണ് കണക്ക്. അതുകൊണ്ടു തമിഴ്‌നാട്ടില്‍ നിന്നുള്ള വിളി വന്നപ്പോള്‍ തന്നെ ആലോചിക്കാന്‍ നിന്നില്ല.

സ്വന്തമായി ടിക്കറ്റെടുത്താണ്്് ചെന്നൈയില്‍ എത്തിയത്. ആദിത്യ നേരെ എഗ്‌മോറിലെ സര്‍ക്കാര്‍ ആശുപത്രിയിലേക്ക് പോകുകയും ഒരു യൂണിറ്റ് രക്തം നല്‍കിയ ശേഷം ബാംഗഌരിലേക്ക് ജോലിക്കായി തിരിച്ചു പോകുകയും ചെയ്തു. ബംഗലുരുവില്‍ പതിവായി രക്തം നല്‍കുന്നയാളാണ് ആദിത്യ. മറ്റ് നഗരങ്ങളിലേക്ക് കൊണ്ടുപോകുന്നതിനാല്‍ താന്‍ ആര്‍ക്കാണ് രക്തം കൊടുക്കുന്നത് പോലും ഇയാള്‍ അറിയാറില്ല.

അര്‍ബുദം ബാധിച്ചവര്‍, ഗര്‍ഭിണികള്‍ തുടങ്ങി അനേകര്‍ക്ക് ഇദ്ദേഹം രക്തം നല്‍കുന്നു. ഈ ഗ്രൂപ്പില്‍ രക്തം ആവശ്യമുള്ളവര്‍ക്ക് സഹായം എത്തിക്കാന്‍ ആദിത്യ സങ്കല്‍പ്പ് ഇന്ത്യാ ഫൗണ്ടേഷന്‍ എന്ന സംഘടനയുമായി പതിവായി ഇയാള്‍ ബന്ധപ്പെടുന്നു.

ബോംബെ ബ്ലഡ്ഗ്രൂപ്പ് എന്ന പേരിലാണ് എച്ച് എച്ച് നെഗറ്റീവ് രക്തഗ്രൂപ്പ് അറിയപ്പെടുന്നത്. അസാധാരണമായ ഈ രക്തഗ്രൂപ്പ് ആദ്യമായി കണ്ടെത്തിയത് 1952-ല്‍ ബോംബെയിലാണ്. അതുകൊണ്ടാണ്ടാണ് ഈ പേര്. രക്തദാനം 17 വര്‍ഷം മുമ്പ് മുതല്‍ തുടങ്ങിയ ആദിത്യ താന്‍ ഈ രക്തഗ്രൂപ്പ് കാരനാണെന്ന് ആദ്യം തിരിച്ചറിഞ്ഞത് 2004-ലായിരുന്നു. 2000 മുതല്‍ രക്തദാനം ചെയ്യുന്ന ഈ ബംഗലുരു കാരന്‍ ഇതിനകം 55 തവണ രക്തദാനം നടത്തി. ഡല്‍ഹി, ഹൂബഌ, ഷിമോഗ, പാകിസ്താന്‍, മലേഷ്യ, ശ്രീലങ്ക എന്നിവിങ്ങളിലുള്ളവര്‍ക്കെല്ലാം രക്തം നല്‍കി.

ചെന്നെയില്‍ രണ്ടാമത്തെ പ്രസവത്തിന് കയറിയ യുവതിക്കായിരുന്നു രക്തം ആവശ്യമായി വന്നത്. ആവശ്യമാകുന്ന പക്ഷം രക്തം ശേഖരിച്ചു വെയ്ക്കുന്നതിനും മറ്റുമായി പ്രസവദിനത്തിന് മുമ്പായി നേരത്തേ തന്നെ ആശുപത്രിയില്‍ എത്തണമെന്ന് ആശുപത്രി യുവതിക്ക് നിര്‍ദേശം നല്‍കിയെങ്കിലും അവര്‍ അങ്ങിനെ ചെയ്തില്ല. ഇതാണ് രക്തം ഉടന്‍ തന്നെ കണ്ടെത്തേണ്ട സ്ഥിതിയിലേക്ക് നയിച്ചത്. ഈ സ്ത്രീ പിന്നീട് ആരോഗ്യവതിയായ ഒരു പെണ്‍കുഞ്ഞിന് ജന്മം നല്‍കി.