തൊഴില് വിവേചനങ്ങളില്നിന്ന് സംരക്ഷണം ഉറപ്പാക്കാന് നിയമനിര്മാണം നടത്തണമെന്ന് ഹൈക്കോടതി
കുടുംബപരമായ ഉത്തരവാദിത്തം നിര്വഹിക്കുന്ന ജീവനക്കാര്ക്കെതിരെയുണ്ടാകാവുന്ന തൊഴില് വിവേചനങ്ങളില്നിന്ന് സംരക്ഷണം ഉറപ്പാക്കാന് നിയമനിര്മാണം നടത്തണമെന്ന് ഹൈകോടതി. ഇത്തരം വിവേചനങ്ങള് ഭരണഘടനാവിരുദ്ധമാണെന്നും കുടുംബത്തിന്റെ ഉത്തരവാദിത്തം ആണ് പെണ് ജീവനക്കാര്ക്ക് തുല്യമാണെന്ന നിലയില് കണ്ടുവേണം നിയമനിര്മാണം നടത്താനെന്നും കോടതി വ്യക്തമാക്കി.
ഓട്ടിസം ബാധിച്ച കുട്ടിയെ സംരക്ഷിക്കാന് അവധിയെടുത്തതിന്റെ പേരില് പിരിച്ചുവിട്ട എല്.ഐ.സി ജീവനക്കാരി നല്കിയ ഹരജി തീര്പ്പാക്കിയ ഉത്തരവിലാണ് ഈ നിര്ദേശമുള്ളത്. ഇവര് അവധി നീട്ടിചോദിച്ചിട്ടും നല്കാതെ അനധികൃതമായി ജോലിക്ക് ഹാജരായില്ലെന്ന് ചൂണ്ടിക്കാട്ടി പിരിച്ചുവിടുകയായിരുന്നു.
ചികിത്സാ സൗകര്യാര്ഥം ചെന്നൈയിലേക്ക് സ്ഥലംമാറ്റം ചോദിച്ചിട്ട് നല്കിയില്ല. പിന്നീട് ഭര്ത്താവിനൊപ്പം ബഹ്റൈനില് അവധിയില് കഴിയവേയാണ് അവധി നീട്ടി ചോദിച്ചത്. മാതാപിതാക്കളുടെയും കുട്ടികളുടെയും സംരക്ഷണം, അപകടങ്ങളെത്തുടര്ന്നുള്ള ചികിത്സ, കുട്ടികളുടെ ചികിത്സ തുടങ്ങിയ കുടുംബപരമായ ബാധ്യതകളുടെ പേരില് ജീവനക്കാരിക്ക് തൊഴില് നിഷേധിക്കാനോ വിവേചനം കാണിക്കാനോ പാടില്ല.
സ്ത്രീ പുരുഷ ഭേദമില്ലാതെ ജീവനക്കാര്ക്ക് സംരക്ഷണം ലഭിക്കണം. കുടുംബപരമായ ബാധ്യതയുടെ പേരില് ജീവനക്കാര്ക്ക് തൊഴില് ക്രമീകരണം വേണ്ടിവന്നാല് പരിഗണിക്കണം. ഇതിന് സര്ക്കാര് നിയമനിര്മാണം നടത്തണം. വിധിയുടെ പകര്പ്പ് കേന്ദ്ര നിയമ മന്ത്രാലയത്തിനും സംസ്ഥാന തൊഴില്, സാമൂഹികക്ഷേമ, നിയമ വകുപ്പുകള്ക്കും ഇന്ത്യന് ലോ കമീഷനും നല്കാന് നിര്ദേശിച്ചിട്ടുണ്ട്.
സ്ത്രീകളെ കുടുംബങ്ങളില് തളച്ചിട്ടാല് ഭരണഘടന ഉറപ്പ് നല്കുന്ന തൊഴില് രംഗത്തെ തുല്യാവകാശം അവര്ക്ക് ലഭിക്കില്ലെന്ന് കോടതി ചൂണ്ടിക്കാട്ടി. ഹരജിക്കാരിക്കെതിരെ ചുമത്തിയ ജോലിക്ക് ഹാജരായില്ല, അനുമതിയില്ലാതെ വിദേശത്ത് പോയി എന്നീ കുറ്റങ്ങള് നിലനില്ക്കുന്നതല്ല. സ്ഥലംമാറ്റത്തിന് അപേക്ഷിച്ചതിലൂടെ ഹരജിക്കാരിക്ക് ജോലി ഉപേക്ഷിക്കാന് ആഗ്രഹമുണ്ടായിരുന്നില്ലെന്ന് വ്യക്തമാണ്.
വിദേശത്ത് പോകാന് അനുമതി നല്കിയിരുന്നു. പോകുന്നത് എതിര്ക്കാതെ അനുമതിയില്ലാതെ വിദേശത്ത് പോയി എന്ന് തൊഴിലുടമ വാദമുന്നയിക്കുന്നത് നിലനില്ക്കില്ല. ഈ സാഹചര്യത്തില് ഹരജിക്കാരിയെ പിരിച്ചുവിട്ടതിന് ന്യായമില്ലെന്ന് വ്യക്തമാക്കിയ കോടതി ആനുകൂല്യങ്ങളോടെ തിരിച്ചെടുക്കാനും ഉത്തരവിട്ടു
https://www.facebook.com/Malayalivartha