മന്‍മോഹന്‍സിംഗിനും ഹാമിദ് അന്‍സാരിക്കും എതിരെ പ്രധാനമന്ത്രി നരേന്ദ്രമോദി ഗുജറാത്ത് തെരഞ്ഞെടുപ്പ് വേളയില്‍ നടത്തിയ പാക് പരാമര്‍ശത്തില്‍ കേന്ദ്രസര്‍ക്കാര്‍ അയഞ്ഞു. രണ്ട് പേരെയും മോശക്കാരാക്കാന്‍ മോദി ഉദ്ദേശിച്ചിട്ടില്ലെന്ന് ധനമന്ത്രി അരുണ്‍ജയ്റ്റ്‌ലി രാജ്യസഭയില്‍ വിശദീകരിച്ചു. പ്രധാനമന്ത്രിയായിരുന്ന മന്‍മോഹന്‍സിംഗും വൈസ്പ്രസിഡന്റായിരുന്ന ഹാമിദ് അന്‍സാരിയും നടത്തിയ സേവനങ്ങളെ വിലകുറച്ച് കാണുന്നില്ലെന്നും ജയ്റ്റ്‌ലി വിശദീകരിച്ചു. ഇതോടെ ദിവസങ്ങളായി പാര്‍ലമെന്റില്‍ നടത്തിവന്ന പ്രതിഷേധപരിപാടികള്‍ കോണ്‍ഗ്രസ് അവസാനിപ്പിച്ചു. പാര്‍ലമെന്റിന്റെ ഇരുസഭകളും കോണ്‍ഗ്രസ് സ്തംഭിപ്പിച്ചുവരുകയായിരുന്നു. 

ഗുജറാത്ത് തെരഞ്ഞെടുപ്പ് വേഷയിലാണ് പ്രധാനമന്ത്രി നരേന്ദ്രമോദി വിവാദപ്രസ്താവന നടത്തിയത്. മന്‍മോഹന്‍സിംഗും ഹമിദ് അന്‍സാരിയും തന്നെ കുടുക്കാന്‍ പാക്ക് ഹൈക്കമിഷണറുമായി കൂടിക്കാഴ്ച നടത്തിയെന്നാണ് മോദി ആരോപിച്ചത്. മുമ്പ് പാക്കിസ്ഥാനെ കുട്ട്പിടിച്ച് തന്നെ തകര്‍ക്കാന്‍ കോണ്‍ഗ്രസ് നേതാവ് മണിശങ്കര്‍ അയ്യര്‍ ശ്രമിച്ചിട്ടുണ്ടെന്നും മോദി വെളിപ്പെടുത്തിയിരുന്നു. ഇതിനെതിരെ കോണ്‍ഗ്രസ് വ്യാപകമായ പ്രതിഷേധപരിപാടികളാണ് നടത്തിവന്നത്. ഇന്ത്യന്‍ ഭരണഘടന പൊളിച്ചെഴുതണമെന്ന കേന്ദ്രമന്ത്രി അനന്ത്കുമാര്‍ ഹെഗ്‌ഡെയുടെ പ്രസ്താവനയെ തുടര്‍ന്ന് രാവിലെ കോണ്‍ഗ്രസ് പാര്‍ലമെന്റില്‍ പ്രതിഷേധമുണ്ടാക്കിയിരുന്നു. ക്രിസ്മസ് അവധിക്ക് ശേഷം ഇന്നാണ് ശൈത്യകാല സമ്മേളനം പുനരാരംഭിച്ചത്. മന്ത്രിയുടെ പ്രസ്താവനയെ തുടര്‍ന്ന് രണ്ട് സഭകളും പിരിച്ച് വിടണമെന്ന് കാട്ടി കോണ്‍ഗ്രസ് അഡ്‌ജേണ്‍മെന്റ് നോട്ടീസ് നല്‍കിയിരുന്നു.

കോണ്‍ഗ്രസ് ഉള്‍പ്പെടെയുള്ള പ്രതിപക്ഷ കക്ഷികള്‍ ബഹളം ശക്തമാക്കിയതോടെ ലോക്‌സഭയും രാജ്യസഭയും തല്‍ക്കാലത്തേക്ക് നിര്‍ത്തിവച്ചിരുന്നു. ഭരണഘടനയെ അപമാനിച്ച മന്ത്രി മാപ്പ് പറയണം. ഭരണഘടനയില്‍ വിശ്വാസമില്ലാത്തവര്‍ എങ്ങനെയാണ് ലോക്‌സഭയും രാജ്യസഭയും നയിക്കുന്നത്. ഭരണഘനയുടെ ആത്മാവിനെയാണ് മന്ത്രി അപമാനിച്ചതെന്നും കോണ്‍ഗ്രസ് ആരോപിച്ചു.