ഐ.പി.എല്‍ മത്സരത്തില്‍ ആരാധകരുടെ പ്രീയതാരം സുരേഷ് റെയ്ന കളിക്കില്ല എന്ന വാര്‍ത്ത ഞെട്ടലോടെയാണ് ക്രിക്കറ്റ് ലോകം കേട്ടത്. ചെന്നൈ സൂപ്പര്‍ കിംഗ്സിന് ഒപ്പം കളിക്കാനായി യു.എ.ഇയിലെത്തിയ റെയ്ന വ്യക്തിപരമായ കാരണങ്ങളെ തുടര്‍ന്ന് പിന്മാറുകയായിരുന്നു. ചെന്നെെ ടീമിലെ രണ്ട് താരങ്ങള്‍ക്ക് കൊവിഡ് സ്ഥിരീകരിച്ചതാണ് റെയ്നയുടെ പിന്മാറ്റത്തിന് കാരണമെന്ന് വരെ ആരാധകര്‍ക്കിടയില്‍ അഭ്യൂഹം പരന്നിരുന്നു.

എന്നാല്‍ താരത്തിന്റെ പിന്മാറ്റത്തിന് കൊവിഡ് അല്ല കാരണമെന്നാണ് ഇപ്പോള്‍ പുറത്തു വരുന്ന വാര്‍ത്ത. സുരേഷ് റെയ്നയുടെ അമ്മാവന്റെ മരണത്തെ തുടര്‍ന്നാണ് താരം മത്സരത്തില്‍ നിന്നും പിന്മാറിയതെന്ന് ദേശീയ മാദ്ധ്യമങ്ങള്‍ റിപ്പോര്‍ട്ട് ചെയുന്നു. പഞ്ചാബിലെ പത്താന്‍കോട്ടിലെ തരിയല്‍ ഗ്രാമത്തിലാണ് റെയ്നയുടെ അച്ഛന്റെ സഹോദരി ആശാ ദേവിയും കുടുംബവും താമസിക്കുന്നത്. ഓഗസ്റ്റ് 19-ന് അര്‍ധരാത്രി ഇവരുടെ വീട് ഒരു സംഘം ആളുകള്‍ ആക്രമിച്ചിരുന്നു. അക്രമണത്തെ തുടര്‍ന്ന് ഗുരുതരമായ പരിക്കുകളോടെ റെയ്നയുടെ അമ്മായി ആശാ ദേവിയേയും ഭര്‍ത്താവ് അശോക് കുമാറിനേയും ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസാണ് 58-കാരനായ അശോക് കുമാര്‍ മരണപ്പെടുന്നത്.

റയ്നയുടെ അമ്മായി ആശാ ദേവി ഇപ്പോഴും ഗുരുതരാവസ്ഥയില്‍ തുടരുകയാണ്. ഇവരുടെ മക്കളായ കൗശല്‍ കുമാറിനും അപിന്‍ കുമാറിനും ആക്രമണത്തില്‍ പരിക്കേറ്റിട്ടുണ്ട്. അശോക് കുമാറിന്റെ 80-കാരിയായ അമ്മയും ഗുരുതര പരിക്കുകളോടെ ആശുപത്രിയില്‍ ചികിത്സയിലാണ്.ഈ സാഹചര്യത്തിലാണ് റെയ്ന ഐ.പി.എല്‍ നിന്നും പിന്മമാറി നാട്ടിലേക്ക് മടങ്ങിയതെന്നും പറയുന്നു.