ഇന്ത്യൻ പ്രീമിയർ ലീഗിന്റെ 13–ാം പതിപ്പിനായി യുഎഇയിലെത്തിയിരിക്കുകയാണ് താരങ്ങൾ. എന്നാലിതാ അർധകരെ ആശങ്കയിലാഴ്ത്തുന്ന വാർത്തകളാണ് പുറത്തേക്ക് വരുന്നത്. ചെന്നൈ സൂപ്പർ കിങ്സ് താരങ്ങളിൽ ഇന്ത്യൻ ബോളർ ദീപക് ചാഹറിന് കോവിഡ് 19 സ്ഥിരീകരിച്ചു. ചാഹറിനു പുറമെ ചെന്നൈ സംഘത്തിലെ മറ്റ് 12 പേർക്കു കൂടി രോഗം സ്ഥിരീകരിച്ചിട്ടുണ്ട്. എന്നാൽ ചെന്നൈ സൂപ്പർ കിങ്സ് ഇക്കാര്യം ഔദ്യോഗികമായി സ്ഥിരീകരിച്ചിട്ടില്ലെങ്കിലും ടീമുമായി ബന്ധപ്പെട്ട കേന്ദ്രങ്ങളെ ഉദ്ധരിച്ച് വിവിധ മാധ്യമങ്ങളാണ് കോവിഡ് സ്ഥിരീകരിച്ചത് ചാഹറിനാണെന്ന് റിപ്പോർട്ട് ചെയ്തിരിക്കുന്നത്. അതേസമയം ഐപിഎല്ലിനു മുന്നോടിയായി ചെന്നൈ എം.എ. ചിദംബരം സ്റ്റേഡിയത്തിൽ സംഘടിപ്പിച്ച അഞ്ചു ദിവസത്തെ ക്യാംപിൽ പങ്കെടുത്ത താരമാണ് ചാഹർ. ക്യാംപിനുശേഷം ചാർട്ടേഡ് വിമാനത്തിൽ യുഎഇയിലേക്ക് പറന്ന ചെന്നൈ സൂപ്പർ കിങ്സ് സംഘത്തിലും ചാഹർ അംഗമായിരുന്നതായും റിപ്പോർട്ടുകളുണ്ട്.

അതോടൊപ്പം തന്നെ ചാഹറിന് കോവിഡ് സ്ഥിരീകരിച്ചതായുള്ള റിപ്പോർട്ട് വന്നതിനു പിന്നാലെ മാസ്ക് ധരിക്കാതെയും സാമൂഹിക അകലം പാലിക്കാതെയും അദ്ദേഹം സഹതാരങ്ങൾക്കൊപ്പം സമ്പർക്കം പുലർത്തുന്നതിന്റെ ചിത്രങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. തുടർന്ന് യുഎഇയിലേക്ക് തിരിക്കും മുൻപ് വിമാനത്താവളത്തിൽ സുരേഷ് റെയ്നയ്ക്കൊപ്പം ഇരിക്കുന്ന ചിത്രത്തിൽ ചാഹർ മാസ്ക് ധരിച്ചിട്ടില്ല എന്നതും കാണുവാൻ സാധിക്കും. റെയ്ന മാസ്ക് ധരിച്ചിട്ടുണ്ടെങ്കിലും അത് താഴ്ത്തി താടിക്കു കീഴെയാണ് വച്ചിരിക്കുന്നത്. ഇതേ ചിത്രത്തിൽ മഹേന്ദ്രസിങ് ധോണിയെയും കാണാണ് സാധിക്കും.

ഒപ്പം വിമാനത്തിൽനിന്ന് പകർത്തിയ ചിത്രങ്ങളിലും മാസ്ക് ധരിക്കാതെയും അകലം പാലിക്കാതെയും ചാഹർ സഹതാരങ്ങളുമായി ഇടപഴകുന്നത് വ്യക്തമാണ്. ക്യാപ്റ്റൻ‌ മഹേന്ദ്രസിങ് ധോണി ഉൾപ്പെടെയുള്ളവരുമായി ചാഹറിന് സമ്പർക്കമുണ്ടെന്ന് വ്യക്തമായതോടെ ആശങ്ക പങ്കുവച്ച് ആരാധകർ സമൂഹമാധ്യമങ്ങളിലൂടെ രംഗത്തെത്തിയിരിക്കുകയാണ്. ഒരു താരത്തിന് ഉൾപ്പെടെ സംഘത്തിലെ 13 പേർക്ക് കോവിഡ് സ്ഥിരീകരിച്ചത് ടീമിന്റെ ഐപിഎൽ ഒരുക്കത്തെ ബാധിക്കുമോ എന്ന ആശങ്കയിലാണ് ആരാധകർ ഒന്നടങ്കം. ടീം യുഎഇയിലെത്തിയ ശേഷമുള്ള ക്വാറന്റീൽ കാലാവധി അവസാനിക്കുന്നതിനു തൊട്ടുമുൻപാണ് 13 പേർക്ക് കോവിഡ് സ്ഥിരീകരിച്ചത് തന്നെ.

ഇതേതുടർന്ന് ഈ സാഹചര്യത്തിൽ ടീമംഗങ്ങളുടെ മൊത്തം ക്വാറന്റീൻ കാലാവധി സെപ്റ്റംബർ ഒന്നുവരെ നീട്ടിയിരിക്കുകയാണ്. സെപ്റ്റംബർ 19 മുതൽ നവംബർ 10 വരെയാണ് ഈ വർഷം ഐപിഎൽ തീയതി പ്രഖ്യാപിച്ചിരിക്കുന്നത്. കോവിഡ് സ്ഥിരീകരിച്ച സാഹചര്യത്തിൽ ചാഹറിനെ ഐസലേഷനിലേക്ക് ഇതിനോടകം തന്നെ മാറ്റുകയുണ്ടായി. ഇനി 14 ദിവസം അദ്ദേഹം നിർബന്ധമായും ഐസലേഷനിൽ കഴിയണം എന്നാണ് വ്യക്തമാക്കുന്നത്. അതിനുശേഷം 14 മണിക്കൂറിന്റെ ഇടവേളയിൽ രണ്ടുതവണ കോവിഡ് പരിശോധനാ ഫലം നെഗറ്റീവ് ആയെങ്കിൽ മാത്രമേ ടീമിനൊപ്പം ചേരാനാകൂ എന്നാണ് പറയപ്പെടുന്നത് .