ഐ പി എല്ലില്‍ ബാംഗ്ലൂര്‍ റോയല്‍ ചലഞ്ചേഴ്സിന് സണ്‍റൈസേഴ്സ് ഹൈദരാബാദിനെതിരായ മത്സരത്തില്‍ ത്രസിപ്പിക്കുന്ന ജയം. ബാംഗ്ലൂര്‍ ഉയര്‍ത്തിയ 164 റണ്‍സിന്റെ വിജയലക്ഷ്യം പിന്തുടന്ന ഹൈദരാബാദ് 19.4 ഓവറില്‍ 153 റണ്‍സിന് ഓള്‍ ഔട്ടായി. വിജയലക്ഷ്യത്തിന് 10 റണ്‍സ് അകലെയായിരുന്നു ഹൈദരാബാദിന്റെ പതനം.

അര്‍ധ സെഞ്ചുറി നേടിയ ഇംഗ്ലണ്ട് താരം ജോണി ബെയ്ര്‍സ്റ്റോവിന്റെ കളിമികവില്‍ വിജയത്തിലേക്കു കുതിച്ച ഹൈദരാബാദിനെ തടഞ്ഞുനിര്‍ത്തിയത് ചാഹലിന്റെ ബൗളിങ്ങാണ്. നാല് ഓവറില്‍ 18 റണ്‍സ് മാത്രം വഴങ്ങി മൂന്നു വിക്കറ്റ് എടുത്ത യൂസ്വേന്ദ്ര ചാഹല്‍ ബാംഗ്ലൂരിന്റെ വിജയത്തില്‍ നിര്‍ണായകമായി.

ഒരു ഘട്ടത്തില്‍ 15 ഓവറില്‍ രണ്ടു വിക്കറ്റിന് 121 എന്ന റണ്‍സ് എന്ന മികച്ച നിലയിലായിരുന്നു ഹൈദരാബാദ്. എം.കെ. പാണ്ഡേയുടെയും വി. ശങ്കറിന്റെയും വിക്കറ്റുകളും ചാഹല്‍ വീഴ്ത്തി.

ക്യാപ്റ്റന്‍ വാര്‍ണറുടെ പുറത്താകലിനു ശേഷം ബെയ്ര്‍സ്റ്റോവ്, മനേഷ് പാണ്ഡേ സഖ്യത്തിന്റെ 71 റണ്‍സിന്റെ കൂട്ടുകെട്ടാണ് ഹൈദരാബാദിനെ താങ്ങിനിര്‍ത്തിയത്. ആദ്യ ഘട്ടത്തില്‍ കൈവിട്ട മത്സരം ബൗളര്‍മാരിലൂടെയാണ് ബാംഗ്ലൂര്‍ തിരിച്ചുപിടിച്ചത്. നവദീപ് സെയ്നി, ശിവം ദുബെ എന്നിവര്‍ രണ്ടു വിക്കറ്റ് വീതം വീഴ്ത്തി.

ആദ്യം ബാറ്റ് ചെയ്ത ആര്‍ സി ബി മലയാളി താരം ദേവദത്ത്് പടിക്കലിന്റെയും (56), ഡിവില്ല്യേഴ്സിന്റെയും (51) കളിമികവിലാണ് 163 എന്ന സ്‌കോറിലേക്ക് എത്തിയത്.