ഇന്നലെ നടന്ന ചെന്നൈ സൂപ്പര്‍ കിംഗ്‌സ് രാജസ്ഥാന്‍ റോയല്‍സ് മത്സരത്തില്‍ ഏറ്റവും അധികം ശ്രദ്ധിക്കപ്പെട്ടത് മലയാളി താരം സഞ്ജു സാംസന്റെ ഇന്നിംഗ്‌സ് തന്നെയായിരുന്നു. 19 പന്തില്‍ അര്‍ദ്ധ സെഞ്ചുറി നേടിയ സഞ്ജു 32 പന്തില്‍ 74 രണ്‍സാണ് വാരിക്കൂട്ടിയത്. തുടർന്ന് ഒമ്പത് സിക്‌സും സഞ്ജുവിന്റെ ബാറ്റില്‍ നിന്നും പിറന്നത്. മത്സരത്തില്‍ 16 റണ്‍സിന് രാജസ്ഥാന്‍ ജയിക്കുകയും ചെയ്തു. ഇപ്പോള്‍ സഞ്ജുവിന്റെ ഇന്നിംഗിസിനെ പുകഴ്ത്തി ഡോ.നെല്‍സണ്‍ ജോസഫ് ഫേസ്ബുക്കില്‍ പങ്കുവെച്ച കുറിപ്പ് സമൂഹമാധ്യമങ്ങളിൽ വൈറലാവുകയാണ്.

ഫേസ്ബുക് കുറിപ്പ്;

പഞ്ഞിക്കിടുക. പരിപ്പിളക്കുക. അടിച്ച് മാട്ടേല്‍ കേറ്റുക.. നാടന്‍ പ്രയോഗങ്ങളാണ്. കേട്ടിട്ടേയുള്ളൂ. ജസ്റ്റ് കണ്ടുകഴിഞ്ഞു.. തൃശൂര്‍ പൂരത്തിന്റെ വെടിക്കെട്ടിനു തിരി കൊളുത്തിയതുപോലെ സിക്‌സറുകളുടെ മാലപ്പടക്കമായിരുന്നു. ഇന്ത്യന്‍ ടീമില്‍ കളിച്ച അനുഭവസമ്പത്തുള്ള സ്പിന്നര്‍ പീയൂഷ് ചൗള. മഹേന്ദ്രസിങ്ങ് ധോണിയുടെ ഇടം കൈ രവീന്ദ്ര ജഡേജ, ഇംഗ്ലീഷ് ബൗളര്‍ സാം കറന്‍ തല്ല് വാങ്ങിച്ച് കൂട്ടിയവരുടെ ലിസ്റ്റിലെ പേരുകള്‍ മാത്രം.

ചൗളയ്ക്ക് കിട്ടിയ വരവേല്‍പ്പ് ഗംഭീരമായിരുന്നു. ഒന്നാം ബോളും രണ്ടാം ബോളും അഞ്ചാമത്തെ ബോളും ആളില്ലാത്ത ഗാലറിയില്‍ വിശ്രമിച്ചു. കൂടെ സ്മിത്തിന്റെ വകയും കൂടിയായപ്പൊ ആ ഒരൊറ്റ ഓവറില്‍ നിന്ന് 28. പത്തൊന്‍പത് പന്തില്‍ നിന്ന് അര്‍ദ്ധസെഞ്ചുറി.. 32 പന്തില്‍ നിന്ന് ഒന്‍പത് സിക്‌സറുകള്‍ അടക്കം 74 റണ്‍.