ഇനി മുതല്‍ മാട്ടുപ്പെട്ടിയിലെത്തുന്ന വിനോദ സഞ്ചാരികള്‍ക്ക് പടയപ്പയില്‍ കയറി യാത്ര ചെയ്യാം... മൂന്നാറിലെ മാട്ടുപ്പെട്ടി ഡാമില്‍ 'പടയപ്പ' ഓടിത്തുടങ്ങി....

വൈദ്യുതി വകുപ്പിന് കീഴിലുള്ള ഹൈഡല്‍ ടൂറിസം വകുപ്പ് മാട്ടുപ്പെട്ടി ഡാമില്‍ പുതുതായി ആരംഭിച്ച സ്പീഡ് ബോട്ടാണ് പടയപ്പ. ഏഴ് പേര്‍ക്ക് യാത്ര ചെയ്യാന്‍ കഴിയുന്ന മൂന്ന് സ്പീഡ് ബോട്ടുകളാണ് പുതുതായി സര്‍വീസ് ആരംഭിച്ചത്

പടയപ്പ, ബ്ലൂ വെയ്ല്‍, ഗോള്‍ഡന്‍ വേവ് എന്നീ പേരുകളാണ് നല്‍കിയത്. കാട്ടു കൊമ്പന്‍ പടയപ്പയുടെ പേര് ഒരു ബോട്ടിന് നല്‍കാന്‍ തുറമുഖ അധികാരികളും ഹൈഡല്‍ ടൂറിസം അധികാരികളും ചേര്‍ന്ന് തീരുമാനിക്കുകയായിരുന്നു. ഇന്ധനം ഉപയോഗിച്ച് ഓടിക്കുന്ന ബോട്ടിന് 16 ലക്ഷത്തിലധികമാണ് വില. ഏഴ് പേര്‍ക്ക് കയറാവുന്ന ബോട്ടിന് 1400 രൂപയാണ് നിരക്ക്. അഞ്ച് പേര്‍ക്ക് കയറാവുന്ന ഏഴും 20 പേര്‍ക്ക് കയറാവുന്ന ഒരു ഫാമിലി ബോട്ടുമാണ് ഹൈഡല്‍ ടൂറിസത്തിന് കീഴില്‍ മാട്ടുപ്പെട്ടിയില്‍ സര്‍വീസ് നടത്തിയിരുന്നത്. ഇതില്‍ കാലഹരണപ്പെട്ട മൂന്ന് സ്പീഡ് ബോട്ടുകള്‍ കണ്ടം ചെയ്ത ശേഷമാണ്, പുതിയ ഏഴ് പേര്‍ക്ക് കയറാവുന്ന മൂന്ന് ബോട്ടുകള്‍ പുതുതായി ഇന്നലെ മുതല്‍ ആരംഭിച്ചത്.