ഇന്ത്യയുമായി നല്ല ബന്ധം തുടരണമെന്ന് മനസാ ആഗ്രഹമുണ്ടായെങ്കിലും പാകിസ്ഥാനിലെ രാഷ്ട്രീയ പശ്ചാത്തലം വച്ച് ഇന്ത്യയ്‌ക്കെതിരെ ഇമ്രാന്‍ഖാന്‍ ആഞ്ഞടിക്കുകയായിരുന്നു. ഇപ്പോഴിതാ സകലരും തള്ളിപ്പറഞ്ഞിരിക്കുകയാണ് ഇമ്രാന്‍ ഖാനെ. കാര്യങ്ങള്‍ രാജിയിലേക്കാ പോകുന്നത്.

എല്ലാ പ്രതീക്ഷകളേയും അസ്തമിപ്പിച്ച് പാക്കിസ്ഥാന്‍ പ്രധാനമന്ത്രി ഇമ്രാന്‍ ഖാനും പഞ്ചാബ് പ്രവിശ്യ മുഖ്യമന്ത്രി ഉസ്മാന്‍ ബസ്ദര്‍ക്കുമെതിരെ അവിശ്വാസപ്രമേയം അവതരിപ്പിച്ച് പ്രതിപക്ഷം. ഇതിനിടെ ഇമ്രാനെ കണ്ട് ബസ്ദര്‍ രാജി സമര്‍പ്പിച്ചു. ഇതും ഇമ്രാന്‍ഖാന് വെല്ലുവിളിയായി. പ്രതിപക്ഷനേതാവും പിഎംഎല്‍–എന്‍ പ്രസിഡന്റുമായ ഷഹ്ബാസ് ഷരീഫാണ് ദേശീയ അസംബ്ലിയില്‍ ഇമ്രാനെതിരെ പ്രമേയം അവതരിപ്പിച്ചത്.

161 പേര്‍ പിന്തുണച്ചതോടെ പ്രമേയം അവതരിപ്പിക്കാന്‍ അനുമതി ലഭിച്ചു. 3 മുതല്‍ 7 ദിവസത്തിനകം പ്രമേയത്തിന്മേല്‍ വോട്ടിങ് നടക്കണമെന്നതിനാല്‍ ചര്‍ച്ചകള്‍ക്കായി വ്യാഴാഴ്ച വൈകിട്ട് നാലിലേക്കു സമ്മേളനം മാറ്റി. 342 അംഗ സഭയില്‍ പ്രമേയത്തെ അതിജീവിക്കാന്‍ 172 വോട്ടാണ് ഇമ്രാനു വേണ്ടത്. സഖ്യകക്ഷികളിലെ 23 പേര്‍ ഇതുവരെ പിന്തുണ അറിയിച്ചിട്ടില്ല.

ഇമ്രാന്റെ പാര്‍ട്ടിയായ പാക്കിസ്ഥാന്‍ തെഹ്‌രീകെ ഇന്‍സാഫിലെ (പിടിഐ) 24 വിമതരുടെ അന്തിമനിലപാടും വ്യക്തമായിട്ടില്ല. പിടിഐക്ക് ആകെയുള്ളത് 155 അംഗങ്ങളാണ്. സഖ്യകക്ഷിയായ പിഎംഎല്‍–ക്യു നേതാവ് ചൗധരി പെര്‍വെയ്‌സ് ഇലാഹിയെ പഞ്ചാബില്‍ മുഖ്യമന്ത്രിയാക്കാമെന്നു വാഗ്ദാനം ചെയ്തിട്ടുള്ളതിനാല്‍ അവരുടെ പിന്തുണ ഇമ്രാന്‍ പ്രതീക്ഷിക്കുന്നു. പിഎംഎല്‍–ക്യുവിന് 10 അംഗങ്ങള്‍ മാത്രമാണ് പഞ്ചാബില്‍ ഉള്ളത്.

അതിനിടെ സര്‍ക്കാരിനെ അട്ടിമറിക്കാന്‍ വിദേശം പണം ഉപയോഗിച്ച് ചിലര്‍ ശ്രമിക്കുന്നതായും അതിന്റെ തെളിവ് തന്റെ കൈവശമുണ്ടെന്നും ഇമ്രാന്‍ ഖാന്‍ പൊതുസമ്മേളനത്തില്‍ ആരോപിച്ചു.പാര്‍ലമെന്റ് അവിശ്വാസപ്രമേയം പരിഗണിക്കുന്നതിന് മുമ്പാണ് ഇമ്രാന്‍ പ്രതിപക്ഷത്തെ കടന്നാക്രമിച്ച് രംഗത്തുവന്നത്.

ഇസ്‌ലാമാബാദിലെ പരേഡ് ഗ്രൗണ്ടില്‍ ഒന്നര മണിക്കൂറോളം പ്രസംഗിച്ച ഇമ്രാന്‍ സമ്മേളനത്തിന്റെ ഒടുവിലാണ് ഈ ആരോപണം ഉന്നയിച്ചത്. സര്‍ക്കാര്‍ തുലാസ്സില്‍ ആയതിനു പിന്നാലെ ശക്തിപ്രകടനം എന്ന നിലയില്‍ നിരവധി യോഗങ്ങളാണ് ഇമ്രാന്‍ നടത്തുന്നത്.

നമ്മുടെ ആളുകളെ ഉപയോഗിച്ച് പണം നല്‍കി അട്ടിമറിക്കാനാണ് വിദേശത്തുള്ളവര്‍ ശ്രമിക്കുന്നത്. എന്നാല്‍ ദേശീയ താല്‍പര്യത്തിന്റെ കാര്യത്തില്‍ ഒരിക്കലും വിട്ടുവീഴ്ച ചെയ്യില്ല. ഞാന്‍ പറഞ്ഞ കാര്യങ്ങള്‍ തെളിയിക്കുന്ന കത്ത് എന്റെ കൈവശമുണ്ട്. ആര്‍ക്കെങ്കിലും അതു പരിശോധിക്കണമെങ്കില്‍ രഹസ്യമായി അതിന് അനുവദിക്കാമെന്നും ഇമ്രാന്‍ പറഞ്ഞു.

പ്രധാനപ്പെട്ട 3 പ്രതിപക്ഷ പാര്‍ട്ടികളെയും ഇമ്രാന്‍ കടന്നാക്രമിച്ചു. ഈ 3 എലികളാണ് ഈ രാജ്യത്തെ സമ്പത്ത് കഴിഞ്ഞ 30 വര്‍ഷമായി കട്ടുമുടിച്ചത്. ഇവര്‍ പണം വിദേശത്ത് കുന്നുകൂട്ടിവച്ചിരിക്കുന്നു. ആദ്യ ദിവസം മുതല്‍ എന്നെ ബ്ലാക്‌മെയില്‍ ചെയ്യാനാണ് അവര്‍ ശ്രമിച്ചത്. ജനറല്‍ പര്‍വേസ് മുഷറഫിനെ പോലെ അവരുടെ മുന്നില്‍ മുട്ടുകുത്തും എന്നാണ് അവര്‍ എന്നെപ്പറ്റി കരുതിയത് എന്നും ഇമ്രാന്‍ പറഞ്ഞു. രാജ്യത്ത് സാമ്പത്തിക പ്രതിസന്ധിയുണ്ടെന്ന കാര്യം തെളിയിക്കാനും ഇമ്രാന്‍ വെല്ലുവിളിച്ചു. യോഗത്തില്‍ നിരവധി മന്ത്രിമാരും പങ്കെടുത്തു.

പാക്കിസ്ഥാന്റെ ചരിത്രത്തില്‍ തിരഞ്ഞെടുക്കപ്പെട്ട ഒരു പ്രധാനമന്ത്രിയും അഞ്ചു വര്‍ഷം കാലാവധി തികച്ചിട്ടില്ല എന്നതാണ് സത്യം. മൂന്നര വര്‍ഷമാണു പരമാവധി അവര്‍ അധികാരത്തിലിരിക്കുക. അതിനകം അവരെ ഏതെങ്കിലും മാര്‍ഗത്തില്‍ ആ സ്ഥാനത്തുനിന്നു പുറത്താക്കിയിരിക്കും. അവിശ്വാസ പ്രമേയത്തിലൂടെ പ്രധാനമന്ത്രിയെ നീക്കം ചെയ്ത ചരിത്രം പാക്കിസ്ഥാന് ഇല്ല. എന്നാല്‍, ഇപ്പോള്‍ പ്രധാനമന്ത്രി ഇമ്രാന്‍ ഖാന്‍ നേരിടുന്ന പ്രതിസന്ധി അതാണ് സ്വന്തം കക്ഷിയിലെ വിമതരും സഖ്യകക്ഷികളും പ്രതിപക്ഷവും ചേര്‍ന്ന് അദ്ദേഹത്തെ വോട്ട് ചെയ്തു പുറത്താക്കാന്‍ ശ്രമിക്കുകയാണ്. അത് വിജയിക്കാനാണ് സാധ്യത.