ലങ്കയില്‍ പ്രധാനമന്ത്രി രാജി വയ്ക്കില്ല.... രജപക്സെ പ്രധാനമന്ത്രിയായി തുടരും, അടിയന്തര മന്ത്രിസഭാ യോഗത്തിലാണ് തീരുമാനമായത്.
ശ്രീലങ്കയില്‍ മഹിന്ദ രജപക്സെ സര്‍ക്കാരിലെ മന്ത്രിമാര്‍ രാജിവച്ചു. മന്ത്രിമാര്‍ രാജിക്കത്ത് പ്രധാനമന്ത്രിക്ക് കൈമാറിയതായി സൂചനകള്‍. രാജിവച്ചവരില്‍ പ്രധാനമന്ത്രിയുടെ മകന്‍ നമല്‍ രാജപക്‌സെയും ഉള്‍പ്പെടുന്നു.


ഇപ്പോഴത്തെ പ്രശ്‌നങ്ങള്‍ക്ക് പരിഹാരം കാണാന്‍ എല്ലാ സ്ഥാനങ്ങളില്‍ നിന്നും രാജിവയ്ക്കുകയാണെന്ന് നമല്‍ ട്വീറ്റ് ചെയ്തു. പ്രധാനമന്ത്രി ഉടന്‍ തന്നെ പ്രസിഡന്റ് ഗോതബായ രജപക്സെയെ കണ്ട് സ്ഥിതിഗതികള്‍ ബോദ്ധ്യപ്പെടുത്തിയേക്കും.

.മഹിന്ദ രജപക്‌സെ രാജിവച്ചതായി ഇന്നലെ അഭ്യൂഹങ്ങള്‍ ഉണ്ടായിരുന്നു. പ്രസിഡന്റ് ഗോതബായ രജപക്സെയ്ക്ക് പ്രധാനമന്ത്രി രാജിക്കത്ത് നല്‍കിയതായി ശ്രീലങ്കന്‍ മാദ്ധ്യമങ്ങളാണ് റിപ്പോര്‍ട്ട് ചെയ്തത്. പിന്നീട് പ്രധാനമന്ത്രിയുടെ ഓഫീസ് രാജി വാര്‍ത്ത നിഷേധിക്കുകയുണ്ടായി.

ശ്രീലങ്കയില്‍ ഭക്ഷണം, ഇന്ധനം, മറ്റ് അവശ്യവസ്തുക്കള്‍ തുടങ്ങിയവയ്ക്ക് കടുത്ത ക്ഷാമമാണ് നേരിട്ടു കൊണ്ടിരിക്കുന്നത്. രാജ്യത്ത് ഊര്‍ജപ്രതിസന്ധിയും വളരെയേറെ രൂക്ഷമാണ്. സാമ്പത്തിക പ്രതിസന്ധിയുടെയും പ്രതിഷേധങ്ങളുടെയും പശ്ചാത്തലത്തില്‍ വെള്ളിയാഴ്ച അര്‍ദ്ധരാത്രിയോടെ രാജ്യത്ത് അടിയന്തരാവസ്ഥ പ്രഖ്യാപിച്ചു. രാജ്യമെമ്പാടും സൈന്യവും പൊലീസും നിലയുറപ്പിച്ചിരിക്കുന്നു.


അതേസമയം സാമ്പത്തിക പ്രതിസന്ധിയെത്തുടര്‍ന്ന് ദേശീയ അടിയന്തരാവസ്ഥ പ്രഖ്യാപിച്ച കടുത്ത പ്രതിഷേധം തുടരുന്നു. ദേശീയ അടിയന്തരാവസ്ഥ പ്രഖ്യാപിച്ച ശ്രീലങ്കയില്‍ 600 പ്രതിഷേധക്കാരെ അറസ്റ്റ് ചെയ്തിരുന്നു.

കൊളംബോയിലെ സ്വാതന്ത്ര്യ ചത്വരത്തിലേക്കു പ്രതിപക്ഷനേതാവ് സജിത് പ്രേമദാസയുടെ നേതൃത്വത്തില്‍ പ്രതിപക്ഷ എംപിമാര്‍ മാര്‍ച്ച് നടത്തി. ശ്രീലങ്കയില്‍ അവശ്യസാധനങ്ങളുടെ ക്ഷാമം നേരിടുകയാണ്. ഇതിനെതിരേ സമൂഹമാധ്യമങ്ങളിലൂടെയും സര്‍ക്കാര്‍വിരുദ്ധ പ്രതിഷേധത്തിന് ആഹ്വാനം ഉയരുകയാണ്.