ബസിലെ പരസ്യ കരാറുകാരനില്‍ നിന്നും മുപ്പതിനായിരം രൂപ കൈക്കൂലി വാങ്ങുന്നതിനിടയില്‍ കെഎസ്ആര്‍ടിസി ഡെപ്യൂട്ടി ജനറല്‍ മാനേജര്‍ വിജിലന്‍സിന്റെ പിടിയിലായ കേസില്‍ . തിരുവനന്തപുരം കിഴക്കേകോട്ടയിലെ കെഎസ്ആര്‍ടിസി ട്രാന്‍സ്‌പോര്‍ട്ട് ഭവനിലെ ഡപ്യൂട്ടി ജനറല്‍ മാനേജര്‍ ഉദയകുമാറിനെ കോടതി റിമാന്റ് ചെയ്തു.

തിരുവനന്തപുരം വിജിലന്‍സ് പ്രത്യേക കോടതി ജഡ്ജി രാജകുമാരയാണ് പ്രതിയെ റിമാന്റ് ചെയ്ത് ജയിലിലടക്കാന്‍ ഉത്തരവിട്ടത്. 2023 ജൂലൈ 16 നാണ് വിജിലന്‍സ് കെണിയൊരുക്കി ഡി ജി എമ്മിനെ (കൊമേഷ്യല്‍ ) പിടികൂടിയത്.

കെ എസ് ആര്‍ റ്റി സി ബസുകളില്‍ പരസ്യം പതിക്കുന്നതിന് കരാറെടുത്ത കരാറുകാരനില്‍ നിന്നും 30,000 രൂപ കൈക്കൂലി വാങ്ങുന്നതിനിടയിലാണ് തലസ്ഥാനത്തെ ഒരു സ്വകാര്യ ക്ലബ്ബില്‍ വച്ച് ഉദയകുമാര്‍ പിടിയിലായത്. ബില്‍ തുക മാറി നല്‍കാന്‍ പ്രതി ഒരു ലക്ഷം രൂപ ആവശ്യപ്പെട്ട് ആദ്യ ഗഡുവായി 40000 രൂപയും രണ്ടാം ഗഡുവായി 30000 രൂപയും കൈപ്പറ്റിയെന്ന് കോടതിയില്‍ ഹാജരാക്കിയ എഫ് ഐ മൊഴിയില്‍ പറയുന്നു. ബാക്കി 30000 രൂപ കൊടുത്തില്ലെങ്കില്‍ 12 ലക്ഷത്തിന്റെ മറ്റൊരു ബില്‍ മാറി നല്‍കില്ലെന്ന് പ്രതി ശഠിച്ചതായും പരാതിയില്‍ പറയുന്നു. തുടര്‍ന്നാണ് വിജിലന്‍സില്‍ പരാതിപ്പെട്ടത്.


പരാതിക്കാരന്റെ മൊഴിയില്‍ കേസ് രജിസ്റ്റര്‍ ചെയ്ത് ഫിനോഫ്തലിന്‍ പൊടി വിതറിയ കെണിപ്പണമായ 30,000 രൂപ നോട്ട് നമ്പര്‍ സഹിതം എന്‍ട്രസ്റ്റ്‌മെമെന്റ് മഹസറില്‍ വിവരിച്ച് വിജിലന്‍സ് പോലീസ് പരാതിക്കാരന് നല്‍കി. പരാതിക്കാരന്‍ പ്രതിയുമായി സംസാരിച്ച് മുന്‍ നിശ്ചയപ്രകാരം ക്ലബില്‍ വച്ച് കെണിപ്പണം നല്‍കാമെന്ന് വിശ്വസിപ്പിച്ചു.

പരാതിക്കാരനെ നോട്ടുമായി പറഞ്ഞ് വിട്ട് ഔദ്യോഗിക സാക്ഷികളായ രണ്ടു ഗസറ്റഡ് ഓഫീസര്‍മാര്‍ക്കൊപ്പം വിജിലന്‍സ് മറഞ്ഞു നിന്നു. പ്രതി കെണിപ്പണം കൈപ്പറ്റിയെന്ന സിഗ്‌നല്‍ കിട്ടിയ ഉടനെ വിജിലന്‍സ് പോലീസ് സംഘം പ്രതിയെ ചോദ്യം ചെയ്ത് മഹസറില്‍ രേഖപ്പെടുത്തിയ അതേ നോട്ടു നമ്പരുകളുള്ള കെണിപ്പണം വീണ്ടെടുത്തു. വിജിലന്‍സ് കൊണ്ടു വന്ന പൊട്ടാസ്യം പെര്‍മാംഗനേറ്റ് ലായനിയില്‍ പ്രതിയുടെ കൈവിരല്‍ മുക്കിയപ്പോള്‍ ലായനി പിങ്ക് നിറമായി മാറി. ഇതോടെ കെണിപ്പണം പ്രതി കൈപ്പറ്റിയതായി ശാസ്ത്രീയമായി സ്ഥിരീകരിച്ച് പ്രതിയെ അറസ്റ്റ് ചെയ്യുകയായിരുന്നു.


വിജിലന്‍സ് തെക്കന്‍ മേഖല പോലീസ് സൂപ്രണ്ട് ജയശങ്കറിനു ലഭിച്ച പരാതിയുടെ അടിസ്ഥാനത്തില്‍, തെക്കന്‍ മേഖല വിജിലന്‍സ് ഓഫീസിലെ ഡിവൈഎസ്പിയുടെ നേതൃത്വത്തിലായിരുന്നു അറസ്റ്റ്.