തമിഴ്‌നാട് നിയമസഭാതിരഞ്ഞെടുപ്പില്‍ വ്യാജ തിരിച്ചറിയല്‍ രേഖകള്‍ ഉപയോഗിച്ച് വോട്ട് ചെയ്ത 25 വിദേശപൗരന്മാര്‍ അറസ്റ്റിലായി. വിദേശ പാസ്‌പോര്‍ട്ടുള്ളവരുടെ വിരലുകളില്‍ വോട്ട് ചെയ്തതിന്റെ മഷി അടയാളം കണ്ടതിനെ തുടര്‍ന്ന് ബ്യൂറോ ഒഫ് ഇമിഗ്രേഷന്‍ ഉദ്യോഗസ്ഥര്‍ ഇവരെ തടഞ്ഞുവയ്ക്കുകയും പൊലീസില്‍ വിവരം അറിയിക്കുകയും ചെയ്തു. പിന്നാലെയാണ് ഇവരെ കസ്റ്റഡിയില്‍ എടുത്തത്. ഒരാഴ്ച മുന്‍പ് ആരംഭിച്ച പരിശോധന ഇപ്പോഴും തുടരുകയാണ്.

പിടിയിലായവരില്‍ ഭൂരിഭാഗവും ശ്രീലങ്കന്‍ പൗരന്മാരാണ്. എന്നാല്‍, ബ്രിട്ടീഷ്, കനേഡിയന്‍ പൗരത്വമുള്ളവരും ഈ സംഘത്തിലുണ്ട്. തിരഞ്ഞെടുപ്പ് സമയത്ത് നാട്ടിലേക്കെത്തി കള്ളവോട്ട് ചെയ്ത വിദേശികളില്‍ ഇനിയും ഒട്ടേറെപേര്‍ പിടിയിലാകാനുണ്ടെന്ന് അന്വേഷണ ഉദ്യോഗസ്ഥര്‍ സംശയിക്കുന്നു. വിമാനത്താവളത്തില്‍ പരിശോധന നടക്കുന്നുണ്ടെന്നറിഞ്ഞ് അവര്‍ രാജ്യത്ത് തന്നെ തുടരുകയാണെന്നാണ് ഉദ്യോഗസ്ഥരുടെ നിഗമനം. കള്ളവോട്ട് ചെയ്ത വിദേശികളെ പിടികൂടാനായി ചെന്നൈ, മധുര വിമാനത്താവളങ്ങളില്‍ അതീവ ജാഗ്രതാനിര്‍ദേശം നല്‍കിയിട്ടുണ്ട്.

ഇതുസംബന്ധിച്ച വിശദമായ റിപ്പോര്‍ട്ട് തിരഞ്ഞെടുപ്പ് കമ്മീഷന് മുന്‍പാകെ സമര്‍പ്പിച്ചിട്ടുണ്ട്. 2025ല്‍ വോട്ടര്‍ പട്ടികയില്‍ നിന്ന് 100 വിദേശികളുടെ പേരുകള്‍ നീക്കം ചെയ്യാന്‍ ഇമിഗ്രേഷന്‍ ഉദ്യോഗസ്ഥര്‍ ആവശ്യപ്പെട്ടിരുന്നു. ഈ വര്‍ഷം വിദേശപൗരത്വമുള്ള 60 പേരുടെ പേരുകള്‍ വോട്ടര്‍ പട്ടികയില്‍ നിന്ന് നീക്കം ചെയ്തിരുന്നു. മറ്റ് രാജ്യങ്ങളിലെ പൗരത്വം സ്വീകരിക്കാത്ത ഇന്ത്യന്‍ പൗരന്മാര്‍ക്ക് മാത്രമേ ഓവര്‍സീസ് ഇലക്ടറായി വോട്ട് ചെയ്യാന്‍ അധികാരമുള്ളു. പ്രവാസി ഇന്ത്യക്കാര്‍ക്ക് വോട്ട് ചെയ്യാമെങ്കിലും പോളിംഗ് ബൂത്തില്‍ ഒറിജിനല്‍ ഇന്ത്യന്‍ പാസ്‌പോര്‍ട്ട് ഹാജരാക്കേണ്ടതുണ്ട്.