ആശ്വാസത്തോടെ കർഷകർ.... കിലോയ്ക്ക് 300 രൂപയെന്ന റെക്കാഡിലേക്ക് റബർ വില കുതിക്കുകയാണ്. ആർ.എസ്.എസ് ഫോർ റബർ ബോർഡ് വില 257രൂപയിൽ എത്തിയെങ്കിലും ഷീറ്റിന് ക്ഷാമമായതോടെ ചില കമ്പനികൾ 262-265 രൂപ വരെ നൽകി റബർ വാങ്ങി. ട്രെൻഡ് തുടർന്നാൽ വില 300 രൂപ കടക്കുമെന്ന് വ്യാപാരികൾ .

അന്താരാഷ്ട്ര വില വർദ്ധിച്ചതും കടുത്ത വേനലിൽ ടാപ്പിംഗ് നിലച്ചതിനാൽ ഉത്പാദനം ഇടിഞ്ഞതുമാണ് വില കുതിച്ചുയരാൻ കാരണം.

കനത്ത ചൂടിൽ തായ്‌ലൻഡ്, മലേഷ്യ എന്നിവിടങ്ങളിൽ ഉത്പാദനം കുറഞ്ഞതോടെ ബാങ്കോക്ക് വില ആർ.എസ്.എസ് ഫോറിന് 287 രൂപ വരെയെത്തി. ഇറക്കുമതി കൈപൊള്ളിക്കുമെന്നതിനാലാണ് ടയർ കമ്പനികൾ ആഭ്യന്തര വിപണിയെ ആശ്രയിക്കുന്നത്.