കുടുംബപ്രശ്നം പരസ്യമാക്കിയതിന് ഭാര്യയുടെ പരാതിയില് ജവാനായ ഭര്ത്താവിനെതിരെ കേസ്
തന്റെ അറിവോ സമ്മതമോ കൂടാതെ കുടുംബത്തിലെ പ്രശ്നങ്ങള് ടെലിവിഷന് ചാനലിലൂടെ പരസ്യമാക്കിയ ജവാനായ ഭര്ത്താവിനെതിരെ ഭാര്യയുടെ പരാതി. ജവാനെതിരെ സംസ്ഥാന മനുഷ്യാവകാശ കമ്മിഷന് കേസെടുത്തു. സ്വകാര്യ ചാനല് സംപ്രേഷണം ചെയ്യുന്ന പരിപാടിയിലൂടെ തനിക്കും കുടുംബത്തിനും നാണക്കേടുണ്ടായെന്ന യുവതിയുടെ പരാതിയില് ജില്ലാ ജഡ്ജി കൂടിയായ സംസ്ഥാന ലീഗല് സര്വീസസ് അതോറിറ്റി മെമ്പര് സെക്രട്ടറിയില്നിന്നു സംസ്ഥാന മനുഷ്യാവകാശ കമ്മിഷന് വിശദീകരണം ആവശ്യപ്പെട്ടു.
പരാതിക്കാരിയായ ഭാര്യയുടെ അംഗീകാരത്തോടെയാണോ സ്വകാര്യ ചാനല് അദാലത്ത് നടത്തിയതെന്നു കെല്സ വ്യക്തമാക്കണമെന്നു കമ്മിഷന് ആക്ടിങ് ചെയര്മാന് പി.മോഹനദാസ് പറഞ്ഞു. കെല്സയുടെയോ ജില്ലാ ലീഗല് സര്വീസസ് അതോറിറ്റിയുടെയോ അംഗീകാരമില്ലാതെയാണ് അദാലത്ത് സംഘടിപ്പിച്ചതെങ്കില് പ്രസ്തുത പരിപാടി മേലില് സംപ്രേഷണം ചെയ്യരുതെന്നും കമ്മിഷന് ചാനല് മാനേജിങ് ഡയറക്ടര്ക്കു നിര്ദേശം നല്കി. ചാനല് എംഡി 23 നകം വിശദീകരണം ഫയല് ചെയ്യണം. കേസ് 23 നു പരിഗണിക്കും.
ഡല്ഹി സിആര്പിഎഫിലെ ജവാന്റെ ഭാര്യയാണു പരാതിക്കാരി. കുടുംബത്തില് നിന്നകന്നു താമസിക്കുന്ന ഇയാള് തനിക്കും മക്കള്ക്കും ചെലവിനു നല്കുന്നില്ലെന്നു ഭാര്യ പറയുന്നു. തനിക്കും കുടുംബത്തിനും അപകീര്ത്തികരമായി പരസ്യമായി സംസാരിക്കുകയും സ്വകാര്യ ചാനലിലെത്തി ക്യാമറയ്ക്കു മുമ്പില് കുടുംബ കഥകള് വര്ണിക്കുകയും ചെയ്തു. തന്റെ അറിവോ സമ്മതമോ കൂടാതെ തനിക്കും മാതാപിതാക്കള്ക്കും അപകീര്ത്തികരമായി പരിപാടി ചാനല് സംപ്രേഷണം ചെയ്തതായും തന്റെ അനുവാദമില്ലാതെ തന്റെ ചിത്രങ്ങള് പുറത്തുവിട്ടതായും പരാതിയില് പറയുന്നു.
https://www.facebook.com/Malayalivartha
