പാലുവാങ്ങാന്‍ പോകുന്നതിനിടെ ആക്രമിക്കാനെത്തിയ തെരുവു നായ്ക്കള്‍ക്കു മുന്നില്‍നിന്ന് ഓടി രക്ഷപ്പെടാന്‍ ശ്രമിച്ച വിദ്യാര്‍ഥിനി കിണറ്റില്‍ വീണു മരിച്ചു. എരുമപ്പെട്ടി കടങ്ങോട് തെക്കുംമുറി മേമ്പറമ്പത്ത് ഹരിദാസന്റെ മകള്‍ ഗ്രീഷ്മ(18)യാണ് മരിച്ചത്.

പുലര്‍ച്ചെ 6.15 ഓടെ അയല്‍വീട്ടില്‍ നിന്നും പാല്‍വാങ്ങാനായി പോകുമ്പോഴായിരുന്നു സംഭവം. അയല്‍വാസിയുടെ പറമ്പിലൂടെ പോവുകയായിരുന്ന ഗ്രീഷ്മയെ നായ്ക്കള്‍ ആക്രമിക്കാനെത്തുകയായിരുന്നു. ഓടിരക്ഷപ്പെടാന്‍ ശ്രമിക്കുന്നതിനിടെ ഗ്രീഷ്മ പറമ്പിലെ ചുറ്റുമതില്‍ ഇല്ലാത്ത കിണറ്റിലേക്കു വീണു. നായ്ക്കളുടെ കുരയും ഗ്രീഷ്മയുടെ നിലവിളിയും കേട്ട് ആളുകള്‍ ഓടിയെത്തുമ്പോഴേക്കും ഗ്രീഷ്മ കിണറ്റില്‍ വീണിരുന്നു. കിണറ്റില്‍ പത്തടിയോളം വെള്ളമുണ്ടായിരുന്നു. ഗ്രീഷ്മയെ രക്ഷിക്കാനായി നാട്ടുകാരനായ മോഹന്‍ കിണറ്റിലേക്ക് ഉടന്‍ ഇറങ്ങിയെങ്കിലും രക്ഷിക്കാനായില്ല. കയറിട്ടുകൊടുത്ത് ഗ്രീഷ്മയെ രക്ഷിക്കാന്‍ ശ്രമിച്ചെങ്കിലും കഴിഞ്ഞില്ല. തുടര്‍ന്ന് കുന്നംകുളം ഫയര്‍ഫോഴ്‌സെത്തിയാണ് കിണറ്റിലിറങ്ങി മൃതദേഹം പുറത്തെടുത്തത്.

ഗുരുവായൂര്‍ മമ്മിയൂര്‍ ആര്യഭട്ട കോളജിലെ ഒന്നാം വര്‍ഷ ബിരുദ വിദ്യാര്‍ഥിനിയാണ്. കുന്നംകുളം ഫയര്‍സ്‌റ്റേഷനിലെ സ്‌റ്റേഷന്‍ ഓഫീസര്‍ സി.ഒ.ജോയ്, ലീഡിംഗ് ഫയര്‍മാന്‍ ടി.ഷാജി, ഫയര്‍മാന്‍ കെ.രവീന്ദ്രന്‍, അനീഷ്, മഹേഷ്, അഭിലാഷ്, ലിജിത്ത്, സുനില്‍കുമാര്‍, ശെന്തില്‍ കുമാര്‍, രവി എന്നിവരടങ്ങുന്ന സംഘമാണ് രക്ഷാപ്രവര്‍ത്തനം നടത്തിയത്.

ഒരു ഇടവേളയ്ക്കു ശേഷം തെരുവ് നായ ശല്യം വീണ്ടും ദുരന്തമായ് മാറിരിക്കുകയാണ്. കേരളത്തില്‍ തെരുവുനായ്ക്കള്‍ കൂട്ടമായി മനുഷ്യനെ ആക്രമിച്ച് കൊലപ്പെടുത്തുകയും കുട്ടികളെ ഉള്‍പ്പെടെ ആക്രമിച്ച് ഗുരുതരമായി പരുക്കേല്‍പ്പിക്കുകയും ചെയ്യുമ്പോള്‍, തെരുവുനായ്ക്കളെ സ്വയരക്ഷാര്‍ഥം കൊല്ലുന്നവര്‍ക്കെതിരേ പൊതുസമൂഹത്തിന്റെ സുരക്ഷക്കും സമാധാനത്തിനും ഭീഷണിയാകുന്ന കൊടും കുറ്റവാളികളുടെമേല്‍ ചുമത്തുന്ന കാപ്പ നിയമം ചുമത്തണമെന്ന പ്രസ്താവനയുടെ കോളിളക്കത്തിന് ശേഷം വീണ്ടും തെരുവ് നായ ആക്രമണങ്ങള്‍ വര്‍ദ്ധിച്ചുകൊണ്ടിരിക്കുകയാണ്.

തെരുവുനായ ശല്യം കേരളത്തില്‍ അതീവ ഗുരുതരമായ പ്രതിന്ധി സൃഷ്ടിച്ചിരിക്കുകയാണ്. തെരുവ്‌നായ്ക്കളുടെ ആക്രമണോത്സുകത വര്‍ധിക്കുകയും അവ ചെന്നായ്ക്കളെപ്പോലെ കൂട്ടംചേര്‍ന്ന് മനുഷ്യനെതന്നെ ആക്രമിക്കുകയും ചെയ്യുന്ന പ്രവണതയാണ് കാണാനാവുന്നത്. നൂറുകണക്കിന് ആളുകള്‍ക്കാണ് ഇത്തരത്തിലുള്ള ആക്രമണങ്ങളില്‍ പരുക്കേറ്റിട്ടുള്ളത്. വീടിന്റെ വരാന്തയില്‍ കിടന്നുറങ്ങുന്നതിനിടെ തെരുവ് നായ്ക്കളുടെ ആക്രമണത്തില്‍ ഗുരുതര പരിക്കേറ്റ വര്‍ക്കല സ്വദേശി രാഘവനും, പുല്ലുവിള തീരദേശത്തു താമസിച്ചിരുന്ന ഷിലുവമ്മയും തെരുവുനായകളുടെ ക്രൂരമായ ആക്രമണത്തില്‍ പരുക്കേറ്റ് മരണപ്പെടുകയും ചെയ്തിരുന്നു.