രാജ്യം കൊവിഡ് പ്രതിരോധത്തിന്റെ രണ്ടാംഘട്ടത്തിലേയ്ക്ക്. മുതിര്‍ന്ന പൗരന്മാര്‍ക്കും, ഗുരുതര രോഗമുള്ളവര്‍ക്കും മാര്‍ച്ച് ഒന്നു മുതല്‍ കൊവിഡ് പ്രതിരോധ വാക്സിന്റെ ആദ്യ ഡോസ് കുത്തിവയ്പ് നല്കും.

60 വയസിനു മുകളിലുള്ളവര്‍ക്കും 45 വയസിന് മുകളില്‍ പ്രായമുള്ള പ്രമേഹം, രക്തസമ്മര്‍ദ്ദം, ഹൃദ്രോഗം, കാന്‍സര്‍, ഗുരുതര ശ്വാസകോശ രോഗങ്ങള്‍, വൃക്കരോഗം തുടങ്ങിയ അസുഖങ്ങളുള്ളവര്‍ക്കുമാണ് ഈ ഘട്ടത്തില്‍ വാക്‌സിന്‍ നല്‍കുക.




സര്‍ക്കാര്‍ കേന്ദ്രത്തില്‍ വാക്സിന്‍ സൗജന്യമായിരിക്കുമെന്ന് കേന്ദ്രസര്‍ക്കാര്‍ വ്യക്തമാക്കി. രോഗങ്ങളുടെ പട്ടിക ഉടന്‍ ആരോഗ്യമന്ത്രാലയം പുറത്തുവിടും. 10,000 സര്‍ക്കാര്‍ ആരോഗ്യ കേന്ദ്രങ്ങളില്‍ സൗജന്യമായും, 20,000 സ്വകാര്യ ആശുപത്രികളില്‍ വില ഈടാക്കിയും കുത്തിവയ്പ് നടക്കുമെന്ന് പ്രധാനമന്ത്രി നരേന്ദ്രമോദിയുടെ അദ്ധ്യക്ഷതയില്‍ ചേര്‍ന്ന കേന്ദ്രമന്ത്രിസഭാ യോഗത്തിനു ശേഷം കേന്ദ്രമന്ത്രി പ്രകാശ് ജാവദേക്കര്‍ അറിയിച്ചു.

സ്വകാര്യ ആശുപത്രികളിലെ നിരക്ക് മൂന്നുദിവസത്തിനുള്ളില്‍ പ്രഖ്യാപിക്കും. തുക സംബന്ധിച്ച് വാക്സിന്‍ നിര്‍മ്മാതാക്കളുമായും സ്വകാര്യആശുപത്രികളുമായും കേന്ദ്ര ആരോഗ്യമന്ത്രാലയം ചര്‍ച്ച നടത്തുകയാണ്.

സര്‍ക്കാര്‍ കേന്ദ്രങ്ങളിലേക്കുള്ള വാക്സിന്‍ ഡോസുകള്‍ കേന്ദ്രസര്‍ക്കാര്‍ വാങ്ങി സംസ്ഥാനങ്ങള്‍ക്ക് കൈമാറും. സീറം ഇന്‍സ്റ്റിറ്റ്യൂട്ടിന്റെ കൊവിഷീല്‍ഡും ഭാരത് ബയോടെക്കിന്റെ കൊവാക്‌സിനുമാണ് കുത്തിവയ്ക്കുന്നത്.

സ്വകാര്യ ആശുപത്രികളില്‍ നിന്ന് വാക്സിന്‍ ഡോസെടുക്കുന്നവര്‍ക്ക് പണം നല്‍കേണ്ടി വരും. ആശുപത്രികളുമായും വാക്സിന്‍ നിര്‍മാതാക്കളുമായും ചര്‍ച്ച നടത്തി വാക്സിന്‍ വില ആരോഗ്യമന്ത്രാലയം നിശ്ചയിക്കും.

ജനുവരി 16 ന് ആരംഭിച്ച വാക്സിനേഷന്‍ നിലവില്‍ ആരോഗ്യ പ്രവര്‍ത്തകര്‍ക്കാണ് നല്‍കിവരുന്നത്. ഇതുവരെ ഒന്നരക്കോടി ആളുകള്‍ക്ക് വാക്സിന്‍ നല്‍കിയെന്നാണ് സര്‍ക്കാര്‍ കണക്കുകള്‍.

അതേസമയം രോഗസാധ്യത കൂടുതല്‍ ഉള്ളവര്‍ക്ക് മുന്‍ഗണന നല്‍കിയാണ് വാക്സിന്‍ നല്‍കുന്നത്. ആദ്യ വിഭാഗത്തില്‍ ആരോഗ്യപ്രവര്‍ത്തകരെയും പൊതുജനങ്ങളുമായി നേരിട്ട് ഇടപെടുന്ന പോലീസ്, തദ്ദേശ ഭരണ സ്ഥാപനങ്ങളിലെ ഉദ്യോഗസ്ഥര്‍ തുടങ്ങിയ മുന്‍നിര പ്രവര്‍ത്തകരെയുമാണ് ഉള്‍പ്പെടുത്തിയിരുന്നു.

കോവിഡ് 19 വാക്‌സിന്‍ സ്വന്തം താത്പര്യ പ്രകാരം എടുക്കേണ്ട ഒന്നാണ്. രോഗത്തില്‍ നിന്നും സംരക്ഷണം ലഭിക്കുവാനും കുടുംബാംഗങ്ങള്‍, സുഹൃത്തുക്കള്‍, ബന്ധുക്കള്‍, സഹപ്രവര്‍ത്തകര്‍ തുടങ്ങി അടുത്തിടപഴകുന്നവരിലേക്ക് രോഗം പകരുന്നത് തടയുവാനും വാക്‌സിന്‍ പൂര്‍ണ്ണമായി എല്ലാ ഡോസുകളും എടുക്കുന്നതാണ് നല്ലത്.

കോവിഡ് സ്ഥിരീകരിക്കപ്പെടുകയോ സംശയിക്കുകയോ ചെയ്യുന്ന ആള്‍ വാക്‌സിനേഷന്‍ കേന്ദ്രത്തില്‍ എത്തിയാല്‍ രോഗം മറ്റുള്ളവരിലേക്ക് പകരാനുള്ള സാധ്യത വളരെ കൂടുതലാണ്. അത് കൊണ്ട് രോഗലക്ഷണങ്ങള്‍ മാറി 14 ദിവസം കഴിയുന്നത് വരെ വാക്‌സിന്‍ സ്വീകരിക്കുന്നത് മാറ്റി വയ്ക്കാം.

വാക്‌സിന്‍ സ്വീകരിക്കുവാന്‍ അര്‍ഹത ഉണ്ടെങ്കില്‍ വാക്സിനേഷന്‍ കേന്ദ്രം, എത്തേണ്ട സമയം എന്നിവ രജിസ്റ്റര്‍ ചെയ്തിട്ടുള്ള മൊബൈല്‍ നമ്പറിലേക്ക് അറിയിക്കുന്നതാണ്.താഴെ പറയുന്ന ഫോട്ടോ പതിപ്പിച്ച ഏതെങ്കിലും ഒരു തിരിച്ചറിയല്‍ രേഖ രജിസ്ട്രേഷന്‍ ചെയ്യുന്നസമയത്ത് കാണിക്കേണ്ടതാണ്.

കോവിഡ് 19 വാക്സിനേഷന്‍ സ്വീകരിക്കുന്നതിന് രജിസ്ട്രേഷന്‍ നിര്‍ബന്ധമാണ്. രജിസ്റ്റര്‍ ചെയ്താല്‍ മാത്രമേ കുത്തിവയ്പ്പ് എടുക്കുന്ന സ്ഥലം, സമയം മുതലായ വിവരങ്ങള്‍ നിങ്ങള്‍ക്ക് ലഭിക്കും. കുത്തിവയ്പ്പ് സ്വീകരിക്കുന്ന ആള്‍ ആരാണെന്ന് ഉറപ്പു വരുത്തുന്നതിന് രജിസ്‌ട്രേഷന്‍ നടത്തുന്നിടത്തും കുത്തിവയ്പ്പ് നടത്തുന്നിടത്തും ഫോട്ടോ പതിച്ച തിരിച്ചറിയല്‍ കാര്‍ഡ് പരിശോധിക്കേണ്ടത് അത്യാവശ്യമാണ്. ഓണ്‍ലൈന്‍ രജിസ്ട്രേഷന് ശേഷം വാക്സിനേഷന്‍ നല്‍കുന്ന തീയതി, സമയം, സ്ഥലം എന്നീ വിവരങ്ങള്‍ മൊബൈല്‍ ഫോണിലേക്ക് എസ്.എം.എസ്. സന്ദേശമായി ലഭിക്കും

ഓരോ ഡോസ് വാക്സിനേഷന്‍ ശേഷവും എസ്.എം.എസ്. സന്ദേശം ലഭിക്കും. കുടാതെ മുഴുവന്‍ ഡോസും പൂര്‍ത്തിയായാല്‍ ക്യു.ആര്‍. കോഡുള്ള സര്‍ട്ടിഫിക്കറ്റ് ഇതേ മൊബൈല്‍ നമ്പറില്‍ എസ്.എം.എസ്. ആയി ലഭിക്കും

കോവിഡ് 19 വാക്സിനേഷന്‍ സ്വീകരിച്ചതിനു ശേഷം കുത്തിവയ്പ്പ് കേന്ദ്രത്തില്‍ അര മണിക്കൂര്‍ എങ്കിലും വിശ്രമിക്കണം. ഏതെങ്കിലും വിധത്തിലുള്ള അസ്വസ്ഥതയോ ശാരീരിക ബുദ്ധിമുട്ടുകളോ അനുഭവപ്പെട്ടാല്‍ ആരോഗ്യ പ്രവര്‍ത്തകരെ അറിയിക്കുക. മാസ്‌ക് ധരിക്കുക, കൈകള്‍ ശുദ്ധിയാക്കി വയ്ക്കുക, ശാരീരിക അകലം പാലിക്കുക.

28 ദിവസങ്ങളുടെ വ്യത്യാസത്തില്‍ ഓരോ ഡോസ് വീതം ആകെ രണ്ടു ഡോസ് വാക്‌സിനാണ് സ്വീകരിക്കേണ്ടത്. രണ്ടാമത്തെ ഡോസ് വാക്‌സിന്‍ സ്വീകരിച്ചതിന് ശേഷം രണ്ടാഴ്ച കൊണ്ട് ശരീരത്തില്‍ ആന്റിബോഡികളുടെ രക്ഷാകവചം നിര്‍മ്മിക്കപ്പെടുന്നു.