മഹാരാഷ്ട്രയില്‍ കോവിഡ് വ്യാപനം വീണ്ടും ശക്തമാകുന്നു. വാഷിം ജില്ലയിലെ ഒരു സ്‌കൂള്‍ ഹോസ്റ്റലില്‍ വിദ്യാര്‍ഥികള്‍ ഉള്‍പ്പെടെ 190 പേര്‍ക്ക് രോഗം സ്ഥിരീകരിച്ചു

ഇതോടെ സ്‌കൂള്‍ പരിസരം കണ്ടെയിന്‍മെന്റ് സോണായി പ്രഖ്യാപിച്ചു. കോവിഡ് വ്യാപനം രൂക്ഷമായ അമരാവതി, യാവത്മാല്‍ എന്നീ ജില്ലകളില്‍നിന്നുള്ള വിദ്യാര്‍ഥികള്‍ക്കാണ് രോഗം സ്ഥിരീകരിച്ചത്.

രാജ്യത്തു തന്നെ കോവിഡ് വ്യാപനം ഏറ്റവും രൂക്ഷമായിരിക്കുന്നത് മഹാരാഷ്ട്രയിലാണ്. ബുധനാഴ്ച സംസ്ഥാനത്ത് 8,800 പേര്‍ക്കാണ് പുതിയതായി രോഗം സ്ഥിരീകരിച്ചത്.

അതേസമയം, പൂനെയില്‍ കര്‍ഫ്യൂ പ്രഖ്യാപിച്ചു കഴിഞ്ഞു. രാത്രി 11 മണി മുതല്‍ പുലര്‍ച്ചെ 6 മണി വരെ അവശ്യ സര്‍വീസുകള്‍ ഒഴികെ മറ്റുള്ളവക്ക് വിലക്ക് ഏര്‍പ്പെടുത്തിയിട്ടുണ്ട്. ഫെബ്രുവരി 28 വരെ സ്‌കൂളുകളും കോളേജുകളും അടച്ചിടാനും തീരുമാനിച്ചിരിക്കുകയാണ്.

ഇതിനിടെ, പ്രതിദിന കോവിഡ് കേസുകളുടെ എണ്ണം വര്‍ധിക്കുന്നത് ചൂണ്ടിക്കാട്ടി കേരളമടക്കമുള്ള അഞ്ച് സംസ്ഥാനങ്ങള്‍ക്ക് കേന്ദ്ര ആരോഗ്യ മന്ത്രാലയം ജാഗ്രതാ നിര്‍ദ്ദേശം നല്‍കി.

പരിശോധനാ നിരക്ക് വര്‍ധിപ്പിക്കാനും ആര്‍ടിപിസിആര്‍ ടെസ്റ്റുകള്‍ ഉയര്‍ത്താനും കേന്ദ്രം മഹാരാഷ്ട്ര, കേരളം, പഞ്ചാബ്, ഛത്തീസ്ഗഡ് , മധ്യപ്രദേശ് എന്നീ അഞ്ച് സംസ്ഥാനങ്ങള്‍ക്ക് നിര്‍ദ്ദേശം നല്‍കി. രാജ്യത്ത് നിലവിലുള്ള സജീവ കേസുകളില്‍ 74 ശതമാനവും കേരളത്തിലും മഹാരാഷ്ട്രയിലുമാണ്.

എല്ലാ നെഗറ്റീവ് റാപ്പിഡ് ആന്റിജന്‍ ടെസ്റ്റ് ഫലങ്ങളിലും ആര്‍ടിപിസിആര്‍ ടെസ്റ്റുകള്‍ നിര്‍ബന്ധമായും നടത്തണം,

തിരഞ്ഞെടുത്ത ജില്ലകളില്‍ കര്‍ശനവും സമഗ്രവുമായ നിര്‍ദ്ദേശം നിരീക്ഷണം നടത്തുന്നതിലും ആവശ്യമുള്ള നിയന്ത്രണങ്ങള്‍ ഏര്‍പ്പെടുത്തുന്നതിലും ശ്രദ്ധ കേന്ദ്രീകരിക്കുക, ഉയര്‍ന്ന മരണങ്ങള്‍ റിപ്പോര്‍ട് ചെയ്യുന്ന ജില്ലകളിലെ ക്ളിനിക്കല്‍ മാനേജ്‌മെന്റില്‍ ശ്രദ്ധ കേന്ദ്രീകരിക്കുക തുടങ്ങിയ നിര്‍ദ്ദേശങ്ങളാണ് കേന്ദ്രം പ്രധാനമായും നല്‍കിയിരിക്കുന്നത്.