നാല് വയസ്സുകാരനായ മകനെ കൊലപ്പെടുത്തി ബാഗിനുള്ളിലാക്കി യാത്ര ചെയ്തത സംഭവം... പൊലീസ് പരിശോധനയ്ക്കിടെ ബാഗിനുള്ളില് വസ്ത്രങ്ങളും കളിപ്പാട്ടങ്ങളും മാത്രമാണുള്ളതെന്ന് സ്ഥാപിക്കാന് ശ്രമിച്ച് യുവതി
നാല് വയസ്സുകാരനായ മകനെ കൊലപ്പെടുത്തിയ സുചന സേത്ത് മൃതദേഹം ഒളിപ്പിച്ചത് ബാഗിനുള്ളിലെ കളിപ്പാട്ടങ്ങള്ക്ക് താഴെ. ഗോവയില് വച്ചാണ് കൊലപാതകം നടന്നത്. പിടിയിലാകുമ്പോള് പൊലീസ് പരിശോധനയ്ക്കിടെ ബാഗിനുള്ളില് വസ്ത്രങ്ങളും കളിപ്പാട്ടങ്ങളും മാത്രമാണുള്ളതെന്ന് സ്ഥാപിക്കാന് യുവതി ശ്രമിച്ചു. പിന്നീട് ബാഗ് മുഴുവന് കാണിക്കാന് ഉദ്യോഗസ്ഥര് സുചനയോട് ആവശ്യപ്പെട്ടു.
ഇതോടെ പോലീസുകാരില് ഒരാള് വസ്ത്രങ്ങളുടെ ഒരു ഭാഗം മാറ്റി നോക്കിയപ്പോള് കുട്ടിയുടെ മൃതദേഹം കണ്ടെത്തുകയായിരുന്നു. മൃതദേഹത്തെക്കുറിച്ച് ചോദിച്ചപ്പോള്, ഇത് തന്റെ മകന്റെ മൃതദേഹമാണെന്ന് സുചന സേത്ത് സമ്മതിച്ചു. യുവതി കൂടുതല് ഒന്നും പറഞ്ഞില്ലെന്നും പോലീസ് അറിയിച്ചു. കേസില് എഫ്ഐആര് രജിസ്റ്റര് ചെയ്ത പൊലീസ് യുവതിയെ ആറ് ദിവസത്തെ പോലീസ് കസ്റ്റഡിയില് റിമാന്ഡ് ചെയ്യുകയും ചെയ്തു.
ബെംഗളൂരുവിലെ ഒരു സ്റ്റാര്ട്ടപ്പ് കമ്പനിയുടെ ചീഫ് എക്സിക്യൂട്ടീവ് ഓഫീസറായ (സിഇഒ) സുചന സേത്തിനെ ചൊവ്വാഴ്ചയാണ് മകനെ കൊലപ്പെടുത്തിയ കേസില് അറസ്റ്റ് ചെയ്തത്. ജനുവരി ഏഴിന് നോര്ത്ത് ഗോവയിലെ കണ്ടോലിമിലെ 'സോള് ബനിയന് ഗ്രാന്ഡെ' എന്ന സര്വീസ് അപ്പാര്ട്ട്മെന്റില് വച്ച് മകനെ കൊലപ്പെടുത്തിയ ശേഷം മൃതദേഹവുമായി ബെംഗളൂരുവിലേക്ക് ക്യാബില് രക്ഷപ്പെടാനായിരുന്നു ശ്രമം. എന്നാല് സംഭവം അറിഞ്ഞ പൊലീസ്, ക്യാബ് ഡ്രൈവറുമായി ബന്ധപ്പെട്ട് യുവതിയെ കുടുക്കുകയായിരുന്നു. അറസ്റ്റിലായ ഉടന് സുചനയെ ഗോവ പോലീസിന്റെ മേല്നോട്ടത്തില് വൈദ്യപരിശോധനയ്ക്ക് വിധേയയാക്കി. പിന്നീട് പ്രതിയെ പിന്നീട് ഗോവയിലെ കലന്ഗുട്ട് പോലീസ് സ്റ്റേഷനിലേക്ക് തിരികെ കൊണ്ടുവന്നു.
യുവതി പോയതിന് ശേഷം ശുചീകരണത്തിന് എത്തിയ ജീവനക്കാര് മുറിയിലെ ഒരു തൂവാലയില് രക്തക്കറ കണ്ടതിനെ തുടര്ന്നാണ് സംഭവം പുറത്തറിയുന്നത്. ഇവര് ചെക്ക് ഔട്ട് ചെയ്യുമ്പോള് മകനെ കൂടെ കണ്ടില്ലെന്നും ജീവനക്കാര് പറഞ്ഞു. പിന്നാലെ ജീവനക്കാര് പൊലീസിനെ വിവരം അറിയിക്കുകയായിരുന്നു. മകനെ കുറിച്ച് തിരക്കിയപ്പോള് ഗോവയിലെ ഒരു സുഹൃത്തിനൊപ്പമാണെന്ന് സുചന പോലീസിനോട് പറഞ്ഞു. എന്നാല് തെറ്റാണെന്ന് കണ്ടെത്തുകയായിരുന്നു.
ബംഗാള് സ്വദേശിനിയായ ഇവര് മലയാളിയായ ഭര്ത്താവുമായി വേര്പിരിഞ്ഞ് കഴിയുകയായിരുന്നു. എല്ലാ ഞായറാഴ്ചകളില് പിതാവിന് മകനെ കാണാമെന്ന കോടതി ഉത്തരവില് ഇവര് അസ്വസ്ഥയായിരുന്നുവെന്നും ഭര്ത്താവ് മകനെ കാണാതിരിക്കാനാണ് കൊലപാതകം നടത്തിയതെന്നും ആദ്യം റിപ്പോര്ട്ടുകള് പുറത്തുവന്നിരുന്നു. അതേസമയം, കൊല്ലപ്പെട്ട പ്രായപൂര്ത്തിയാകാത്ത കുട്ടിയുടെ മൃതദേഹം പോസ്റ്റുമോര്ട്ടം നടത്തി ബുധനാഴ്ച തന്നെ ബെംഗളൂരുവില് സംസ്കരിച്ചു.
https://www.facebook.com/Malayalivartha
